Curiosità

Le vie de Verona. 

Vicolo Balena, poco distante da Via Quatro Spade. Ciamà cossìta parché un tempo gh'éra 'na botéga che vendéa ossi de baléna, un tempo usà par le ventàle o nei busti da signora. Volto Barbaro a du passi da Piassa Erbe, 'ndóe el 26 otobre 1277 l'è stà copà Mastino I De la Scala, un tempo se ciamàva "Volto dei Centauri". El capitàn Zaccaria Barbaro nel 1476 l'à fato sistemàr 'sto légo; da quel momento l'à cambià nome. Vicolo Borella, de drio al Municipio, ci g'avéa i bordéi o "andava a putane" zugàva a le Boréle, un boowling a la veronese. Vicolo Borgo Tascherio, da Tasquerius; se cata, tacà a Piassa Isolo. Un tempo se tirava su le tasse in natura, poco distante da la Porta Organa e da le mura romane. Vicolo Botte tacà al teatro romàn; un tempo gh'éra una fontana de piéra a forma de botesèla. Vicolo Broglio tacà a San Zèn, da brólo, tòco de terén coltivà a piante da fruta "brolo supra plateam que est ante ecclesia S.Zenoni". Piassa Broilo o Brolo del Vescovado nel XII secolo, deventà Platea Broli 'ndóe gh'éra un marcà dei legnami. Contrada de la Cadrega. Secondo la tradissión, fin al XVIII secolo gh'era 'na stéle romana de Cornelio Annone sestoviro, spacà, che paréa una "cathèdra", in veronese cambià in "carèga". Nel medioevo la contrà l'éra ciamà "dei caliari" quéi che consàva la pèl, fórsi nel tempo cambià in calegari, caregari, quéi che faséa le caréghe, artigiani presenti in compagnia de scarpolini e casolini.

Campagnola, zona coltivà a orti a destra de l'Adese (Borgo Trento) anticamente ciamà "Contrada Sacco" (Spianà nel 1517). In Piassa Cisterna a San Gioàni in val, se pól 'édar ancora una costrussión a forma de pózzo; un tempo ghe finìa drénto l'aqua che vegnéa zò da la fontana de fero. Via de la Costa la g'a un simbolo caro ai veronesi, taca via soto al volto dal 1700 tra Piassa Erbe e Piassa Dante: la costola de un ittiosauro; i dise che sia stà un trofeo de una de le tante botéghe de spezie tacà a quéle dei sogàri (la via, nel XIV, l'era ciamà Bina Sogeriorum). In Vicolo Derelitti nel rión de San Stefano nel 1602, l'è stà fondà el pio istituto par i buteléti sensa genitori che i andàva a manghèl. Via Fama tacà a Corso Porta Borsari, un tempo l'era ciamà Introl del Brentarol ma nel 1704 catémo l'ostària de la Fama trionfante ispirà a 'na statua de Marco Marchesini murà ne la casa dei mercanti. Via Gazzera arénte a via San Leonardo, g'avéa sede nel '700 la "Compagnia de la Gazzara" con òmeni e dòne, che tra l'altro faséa rapresentassioni teatrali nei giardini e parchi. Vicolo del Guasto tacà a la césa de San Matéo a porta Borsari l'éra conossù come "Introl del Guasto". Ghe abitava nel '600 la faméia de Gio.Batta del Guasto "samitario" co' la botéga de seda speciàl "sciamito". A la fine del '400, una cronaca parla che la famèia vegnéa da Pescara, co' el cambio de parola da Vasto a Guasto.

Via Porta Organa tacà a Piassa Isolo un tempo l'éra conossù come Via Ladri. Via Mazzanti a pochi passi da Piassa Erbe, prima del '500, ano in cui l'omònima faméja l'avéa crompà la casa, se ciamava Via dei Pignolati. Co' el termine "pignolà" un tempo se indicava el tessuto de frustagno. El Cortile Marcà Vècio tacà a Piassa Dante, dal 1400 al 1631 l'éra el marcà del gràn. Ciamà "vècio", parché quel novo l'è stà fato in Piassa Bra. Via Nizza tacà al Ponte Novo e Piasseta Pescheria, un tempo l'era conossù come Via Stallaggio Pesce.

1-El ponte Garibaldi nel 1864 l'è stà batesà co' 'n'altro nome:
Ponte Newille; 2-Da 'ndóe vién el termine "Braida" dela césa de S.Giorgio? Dal longobardo breit che vol dir "campo del signór"; 3-I molini su l'Àdese oltre ai cereali, cosa i masenàva? Zolfo e calçina; 4-Dove gh'è 'dèsso el palasso Barbieri, una 'olta gh'éra: 'n ospedàl e 'na césa; 5-Come se ciamàéla ai tempi dei romani Porta Borsari? Porta Iovia; 6-Da 'ndóe deriva la parola "Lessini" ? Dal celtico "lessins" che vol dir "çità de rocia" ma secondo el studioso Sauro el toponimo Lessinia el vién da "Luxino" Lux par capirse, fóra dal bosco gh'è la luçe dei alti pàscoli; 7-Come se ciamà-èla 'na 'olta Porta Cadèna (Porta Catena)? Porta Fura; 8-Di ci l'éra fiól Cangrande II? Mastino II; 9-Da quale architeto romàn l'è stà fato l'arco dei Gavi? Lucio Vitruvio Cerdone; 10-Da ci l'è sta donà l'orologio sui portoni dela Bra?; Conte Antonio Nogarola 11-Quando l'è stà fata la prima rapresentassión lirica in Arena? 1913; 12-Quando l'è stà fondà el Monte de pietà? 1490; 13-Quanti posti gh'éra da sentarse in Arena ai tempi dei romani? 30.000; 14-Parchè Quinto de ValPantena se ciama cossìta? In Epoca Romana, l'éra la distansa dal çentro del Foro Veronese, el "Quinto Miglio"; 15-In che ano gh'è stà le Pasque Veronesi? 1797; 16-Piassa Erbe la g'avéa 'n'altro nome, qual? Piassa Grande; 17-In che ano l'è stà inaugurà el Vilajo de l'Oca Bianca? 24/12/1939; 18-In che ano gh'è stà la più grande epidemia de peste a Verona? 1630; 19-In cortil marcà vècio ai Tempi dei Scaligeri, quale tipo de roba se vendea? Gran e fién; 20-'Ndóe gh'è 'dèsso la Càmera de Comercio, a fianco a Porta Nóa, nel 800 gh'éra un Teatro. Come se ciamà-élo? Mondini; 21-El Trenin: El primo tòco Verona-Cavrìn quando l'è stà inaugurà? 03/08/1889; 22-Via Granzara o Gran Zara l'è el vecio nome de quale via? Via Oberdan; 23-Come se ciamà-éla Porta Palio in origine? Porta S.Sisto; 24-'Ndóe gh'è 'désso la Césa de S.Nastasia, in epoca medioevàl gh'éra do ceséte, come le se ciamàva? S.'Nastàsia e S.Remigio; 25-In che ano Bartolomeo de la Scala l'è stà nominado Capitàn del Popolo? 1301; 27-Come la se ciamà-éla Via Mazzanti in origine? Via dei Pignolati; 28-Nel XII° secolo Piassa Broilo l'era diventada un marcà...cosa se vendéa? Legnami; 29-Prima del 1871 Come se ciamà-èla Via Porta Organa? Via Ladri; 30-Come se ciamà-élo Castèlvècio prima che vegnesse i Visconti a Verona? Castèl de San Martin in Aquaro; 31-Ci élo stà el primo Vescovo de Verona? Euprepio; 32-El nome del paese Soave el deriva da: Dala dinastia dei Svevi; 33-Andó élo stà copà Berengario 1° Re d'Italia? Nela césa de San Piéro in Castèl; 34-In che ano la Republica de Venessia l'à costruido a Negrar la colona col Leon de San Marco? Nel 1791; 35-Quale piassa faséa parte nel '400 dela contrada Ferraboi? Piassa Bra; 36-Come se ciamà-élo el vècio castèl de San Piéro In Cariàn del 1106? Rotario; 37-Càpavo, l'era l'antico nome de... Torbe.