I De la Scala.
L'origine de la fameja De la Scala (Della Scala) l'è bastansa scura. Se scominsia a parlàr de éla a tórno al 1147 par via de un çèrto Balduino, console del Comun. Ma el vero capostipite par che'l sia stà Jacopino che el g'avù quatro fiói : MANFREDO Vescovo de Verona LONARDINO deto 
MASTINO(I) -ALBERTO I e FEDERICO deto BOCCA. Lonardino l'era amigo de EZZELINO DA ROMANO e quando questo l'è sbalà, Lonardino (deto Mastino) che l'éra Podestà de Verona(1259) con so fradèl Alberto I iè deventà paroni de Verona e insieme i do fradèi i à fato nàssar la SIGNORIA SCALIGERA(1277). Alberto I el sposa la sióra Verde de Salizzole e da la so union nasse BARTOLOMEO I - ALBOINO - CANGRANDE I e COSTANZA.
Ma Alberto I el g'a anca un fiól naturàl (GIUSEPPE) che'l pensa bén de nominàr Abate de San Zén. Da Alboino che se sposa prima con CATERINA VISCONTI e dopo con BEATRICE DA CORREGGIO nasse ALBERTO II e MASTINO II. Da Mastino II ch'el sposa TADDEA DA CARRARA nasse CANGRANDE II, PAOLO ALBOINO e CANSIGNORIO, oltre ai fiói naturali FREGNANO (che'l pensa ben de far ribelàr contro so pare Verona nel 1354) e PIETRO (che invesse el pensa ben de deventàr vescovo de Veronae de Lodi) CANSIGNORIO el lassa solo fiói naturali che ghe succede ne la dinastia: BARTOLOMEO II e ANTONIO. Cangrande II el lassa solo un fiól naturàl GUGLIELMO che nel 1404 riconquista Verona ma el móre subito dopo.
La dinastia la riprende con BRUNORO e PAOLO che parò i se stabilisse in Baviera dove, par mancansa de fiói mas-ci, né regolari né naturali, la sparisse nel 1598. In sostansa la storia dei DE LA SCALA la pól riassumarse in tri momenti storici: primo momento =fin al 1311 co la creassión de la Signoria; secondo momento =(1311-1336) co la formassión de uno Stato predominante ne l'Italia setentrionàl; terso momento =(1336-1387) co la decadensa dovuda a le incapacità dei capi e a le beghe in faméja. Nel 1387 i Scaligeri i cede a l'assalto dei Carraresi e dei Visconti. La Signoria dei De la Scala l'è ricordada principalmente a Verona da le tombe monumentali (Arche scaligere) presso Santa Maria Antica, dal Palasso dei Signori, da Castèlvècio e dal Ponte Scaligero.