Museo del Carneàl de Verona, el primo su internet dal 2004
Da le origini ai giorni nostri. Curiosità, storia e materiàl mai publicà sui libri, de la Libreria Storica de La Rena Domila. El materiàl publicà l'è unico, catà sóra i libri de le più grandi Biblioteche, Archivi de la çità de Verona e nel nostro archivio. Un qualcosa de veramente interessante. Se te vol farte una cultura più profonda, basta crompàr el nostro libro "Verona e il suo Carnevale", 'ndóe tute le dimande g'avarà risposta.
CAPITOLI:
- 1.0 - El Carnéal de Verona secondo tradissión
- 2.0 - La Tàola dei Pitòchi
- 3.0 - Tomaso da Vico
- 3.1 - Testamento, vero o falso?
- 3.2 - Mausoleo de Tomaso Da Vico
- 4.0 - El Vènardi Gnocolàr
- 5.0 - I Gnochi in cusìna
- 6.0 - Latino-Macheronico
- 7.0 - Verba volant, scripta manent
- 8.0 - El Palio del Drappo Verde
- 9.0 - Probabili origini del Carneàl
- 10.0 - Da Piassa dei Signori a San Zén nel 1759
- 10.1 - La mascaràda dei Sanzenàti del 1804
- 10.2 - La "Funsión del Gnoco" del 1807
- 10.3 - El càro de la 'Bondansa
- 10.4 - El Bogón
- 11.0 - Curiosità
- 12.0 - El "Sire" nei secoli
- 12.1 - El vestito del "Sire"
- 13.0 - El nostro libro
1.0 - El Carnéal de Verona secondo tradissión
L'origine del Carneàl de Verona la se perde nela note dei tempi e la se liga fórsi par analogia in alcuni elementi costitutivi del "Baccanale" a antichissimi riti pagani e al çiclo de Demetra, dea greca de la sémena e dela fertilità che i Romani i vedéa in Cerere, antica divinità italica del'agricoltura. Ne la sò "Istoria de Verona" el Dalla Corte el conta dopo 60 ani, che in conseguensa de le disastrose inondassioni del'Adese fra el 1520 e el 1531 - e a causa dele devastassioni dei Lanzichenechi todeschi durante la guera tra Carlo V e Francesco I in Lombardia, ne la çità de Verona se moréa de fame. In quéla ocasión i "pistóri" i g'avù l'idea de alsàr el costo del pan e no voléndo ne farlo e ne véndarlo a la popolassión piena de fame, el 18 dugno 1531 la zénte infufà a S.Zén l'éra corsa in piassa (el Dalla Corte dise Piassa ma no San Zén, quartiér co' tanto de Abassia fortificà e un camposanto) saltàndòghe 'dósso e ciavàndoghe pan e gràn. Secondo tradissión el pericolo de la rivolta l'è stà scongiurà co' la nomina de alcuni çitadini, che a sò spese i g'à dato da magnàr ai abitanti piassè pitòchi dela contrada de S.Zén. La tradissión la ne dise che ne la benemerita comissión gh'éra anca el Da Vico, indicà come "istitudór o restauradór" del "Bacanal del Gnoco", avendo fato distribuìr a "màca", su sò lìbara inissiativa ai Sanzenati pan, 
vin, botiér, farina e formajo ne l'ultimo vendri de Carneàl. Nel testamento de Tomaso da Vico secondo i sanzenàti, risulta che ghe fusse scrito, che, tuti i so "beni" i dovéa èssar devolù par tiràr su schèi in modo da podér celebràr, ogni ano, el "Vènardi Gnocolàr", co' la distribussión de pàn e vin sensa contàr de botiér, farina e formàio par far i "Macaròni". In più el voléa èssar sepolto tacà a la "tàola dei pitòchi", poco distante da la césa de San Procolo. Quél scrìto nel testamento l'è ben difarénte, la verità l'è un altra e Da Vico no g'a a che far co' el carneàl.
2.0 - La Tàola dei Pitòchi
Vegnéa invità a magnàr a la tàola, 12 pitòchi del rión de San Zén a spese del’abate e dei signori del tempo. Ne la stampa “La mensa dei 12 poveri” da “Verona in chiaro e scuro” del 1700 se vede propio el taolón.
3.0 - Tomaso da Vico
Tomaso da Vico l'éra un famoso medico, 'na pàrsona a la màn, abitante ne la contrà de San Piéro Incarnario. L'éra considerà tra le personalità più importanti de la vita publica de Verona come ne dimostra la famosa "cavalcata", andóve l'éra presente in compagnia de "gentiluomini" e "prelati" par 'nar incontro al nóvo vescovo de Verona G.Giberti che vegnéa su da Roma. Quando l'è morto, secondo tradissión, nel testamento l'à lassà una fortuna par far ogni ano el carneàl e darghe da magnàr a la pòra zènte. Tomaso, l'è da considerarse quél che l'à inventà o g'à dato nóva vita al nostro carneàl? Assolutamente NO!
3.1. - Testamento, vero o falso?
Semo sicuri che el nostro carneàl el végna celebrà grassie a Tomaso da Vico da 500 ani? Nel testamento presente a l'archivio de Stato de Verona, se lése, che nel marso 1531, vién messo nero su bianco el testamento dal notàro S.Dalla Mano; a maio dopo l'è stà lèto da parte del fiól del notàro. El 15 dugno 1531 quando, secondo tradissión, gh'è stà la rivolta in Piassa San Zén Tomaso da Vico no l'éra vivo, ma morto da mesi. Tra l'altro no g'a lassà gnénte ai sanzenàti ma come unico erede el fiól Marcantonio mentre la tomba no la dovéa èssar a San Procolo ma dai Canonici sóra Verona. In più, par farla completa, nel testamento, no gh'è scrito da nissuna parte, la parola "carneàl".
3.2 - Mausoleo de Tomaso Da Vico
Sul muro de fóra de la césa de San Procolo, gh'è el mausoleo che i g'a dedicà “Thomas Vicus Philosoph, Medicus et inter rarissimos praeclarus, hic et in his se jussit claudi lapidibus hoc asserens si vixi, resurgam. anno MDXXXI”. Ma visto el testamento semo sicuri che i so ossi i sia in quél lógo?
4.0 - El Vènardi Gnocolàr
Ne l'ultimo vènardi de carnevàl la nostra çità l'à celebrà la "Funzione dei Gnochi" o "Festa de la Bondànsa". Un tempo l'era ciamà Vènardi Casolàr da "caseus" come dito dal podestà Barberigo a la fine del '500. I gnochi un tempo i era impastà co' sola aqua e farina come i "gnochi sbatùi de malga" e ciamà "Macaròni". Solo nel '700 gh'émo l'introdussión de la patata in cusìna grassie a un cogo francese.
5.0 - I Gnochi in cusìna
Secondo la tradissión veronese, in faméia o nei ristoranti se magna i gnochi el vènardi gnocolàr, consà co': 1) botiér desfà e formàio parmigiàn 2) co' sugo de pomodoro e formàio parmigiàn 3) Gorgonsola desfà 4) Pastissada de cavàl par i veronesi D.O.C. 5) Pastissada de musso par i Sanzenàti D.O.C. 6) Sùcaro e canéla ne la Bassa Veronese al confìn co' Pàdoa.
6.0 - Latino-Macheronico
Póchi i sà che a Verona gh'è un grandissimo archivio de latino-macheronico, un missióto de latìn e volgàr veronese. Eco come cusinàr i gnochi secondo F.Dionisi nel 1740
Optima de mostris nascuntur multa cosinis, Sed quae se Gnocchis postulet esse parem?
Tanta roba da magnàr nasse da le nostre cusine, ma qual merita de èssar paragonà al gnoco?
Omnigenos siquidem farsitos, atque bodinis / Hunc Antenates nostri travavere piattum,/ Hunc conservabit sedula posteiritas./ Qui fandi Gnoccos bramasset habere ricettam, / En Verona docet bravior Hippocrate; / Ante tamisatae sex libras sume farinae, / et misce quantum sit satis intus aquae; / Totum impastetur, grandis pyrolona fiatur, / Inque quater centum divide particulas; / Has sfregolando super digito cum pollice, rizzas / Roversis faciat gratacasola busis; / Comque parechiatus steterit parollus ad ignem, / Extemplo in calida praecipitentur aqua; / Quae postquam mediam ad summum bolliverit horam, / Gnocca procul dubio cocta, stracota dabit, / Ne perdas igitur temps, sbosoque manestro / Collige; dum fumant, dumque bazota tremant, / Grattati libram casei, librasque botèri / Adde duas; nec quod sint nimis uncta time; / Gnocca debent etenim cunzari semper abunde, / Ut per gargatum plu molesina fluant. / Composita est pietanza magis bona nectare divum / Felix, si totam solus habere potes!
La faméia dei gnochi l'è più importante de quéla de torte e budini. Un piato inventà dai nostri vèci, conservà da le nóe generassioni. Ci vól la riçéta par far i gnochi, Verona pól insegnarghelo mèjo de Ipocrate. Bisón ciapàr siè "libre" de farina ben tamisà, roersàndoghe drento aqua, quel che serve; impastàr el tuto e fato un gran bigolo, dividerla in quatrosento parti; se sfrega el deolón sui gnochi, che i se inrissola su la gratacasòla roersàda o dai busi roèrsi. Quando el paról el sarà sul fogo, se buta drénto i gnochi ne l'aqua calda e dopo el bojo de mes'ora i sarà bén coti. Col manestro sbusà te devi pescarli che i fuma e jè drio tremàr. Te devi zontàr 'na libra de formajo gratà e do de botiér e no 'verghe paura se jè massa onti; i gnochi i deve èssar ben consà fin a quando no jè bèi morbidi e i va zò par el gargàto. Una pietansa divina. Feliçe, se te pol 'verghela tuta par ti!
7.0 - Verba volant, scripta manent
Semo sicuri che el Vénardi Gnocolàr no ghe fusse prima del 1531 quando Tomaso Da Vico secondo tradissión l'à dispensà i gnochi?
a) Nel 1509 se parla de un "tratamento speciàl" co' i gnochi, ne la mensa dei frati de Santa Maria de la Scala nel periodo de "carnovale".
b) El famoso maestro veronese Panteo nel 1484, par el nóvo Statuto de la Casa dei Marcanti, l'à composto una poesia spedì in anteprima al Podestà nel "periodo de carnovale".
c) Nel 1422 e nel 1423 el predicadór Fra Bernardino (deventà Santo nel 1450), el g'à dito ai veronesi de impegnarse de più dal ponto de vista religioso. Par questo motivo, la tradissionàl corsa del "Palio del Drappo Verde" l'è stà spostà ani dopo, da la prima Dominica de Quaresima al Zòbia (Giòvedi) Grasso.
8.0 - El Palio del Drappo Verde
Secondo tradissión, el catìo Eselìn II da Romàn, dopo aver vinto contro i guelfi Sambonifacio, l'è rientrà a Verona ne la prima dominica de Quaresima del 1208. Par festegiàr i è stà organisà giostre e tornei. El Palio l'è stà messo nero su bianco nel Statuto Albertino e decantà da Dante Alighieri nel XV° Canto de l'Inferno:"e parve di coloro – che corrono a Verona il drappo verde – per la campagna; e parve di costoro – quelli che vince, non colui che perde”…
9.0 - Probabili origini del Carneàl
Come émo visto el Carneàl de Verona el podarìa èssar nato con el Palio ma forsi in epoca Scaligera nel treçento. Ogni ano a maio, defàti, in ocasión de la Festa par celebràr la traslassión del corpo de San Zén, se magnàva, se bevéa, se balava e se cantàva, conossù come "Fiera dei Mercanti". El 25 dugno 1405 la nostra çità la g'a giurà fedeltà a la Serenissima, dopo che i venessiani i g'avéa parà via i Da Carrara; i nostri ambassadori tornà da Venessia i g'a tirà fora, dopo du secoli, da l'Abassia de San Zén, el famoso "Carroccio" nato dopo la sconfita de Barbarossa e portà in processión par la piassa, co' tanto de bandierón regalà dal Doge e messo su dai capi dei magistrati. Secondo el Da Persico, el "car trionfàl de San Zén" o "car de l'Abondansa sarìa la version carnevalesca del Carroccio. Nel 1406 visto che se moréa de fame e no se voléa casini la Serenissima la mésso in pié la "Festa de l'Abondansa".
10.0 - Da Piassa dei Signori a San Zén nel 1759
Da la cronaca del 1759: "Intanto compariscono sulla piazza de' Signori innanzi al detto palazzo esattamente e puntualmente ordinate diverse compagnie di Sanzenati composte di puttelli vestiti da capo a piè di candida tela fiocchettata di nastri rossi di seta, con simil berretta in testa, e di uomini con le loro zerbine per mano vestiti da pulcinella, o in altre curiose guise, e le donne alla giardiniera; e con viva e acclamazioni interrotte dal suono armonioso di trombe, timpani, fagotti, e comi da caccia, grande agli ispettori diletto e piacere arrecano".
El cortèo carnevalesco el va verso San Zén: "Dopo le carrozze di sua Eccellenza e quelle della nobile comitiva, marciano milizie equestri e pedestri. Segue in ultima un gran carro, tirato da quattro bovi, pieno di bianco pane, e con una botte, d'ottimo vino, che al ritomo di Sua Eccellenza si distribuisce ai poveri nella sua corte; e per due ore e più che dura questa popolare esaltazione, gettasi alla ciurma dell'affollata plebe continuamente il pane, e però dicesi il Carro dell'Abbondanza. Innalzato poi si osserva sulla piazza di San Zeno un palco di legno capacissimo, addobbato da ogni parte di verdi e di fioni (de' quali Verona non ha penuria neanche nel più rigidi tempi) e sopra di esso salgono i puttelli, e le maschere tutte. Ivi si impastano gnocchi, e vi se ne fanno cuocere più caldaie, tanto che all'applauditissimo arrivo di Sua Eccellenza, che va a posare nella residenza abbaziale, preparatosene con tutta decenza un piatto, gli viene umiliato. 
Gradisce l'Eccellenza Sua e assapora gli gnocchi, imitando la nobiltà la sua benigna condiscendenza. Deposto infrattanto dai facchini il carico della cibarie e del vino nella corte dell'Abbazia, tutto si distribuisce a tutti gli abitanti di quella contrada". Se parla anca de Tomaso Da Vico: "Sta situata di contro all'effigie del Vico una tavola di pietra considerabile per la mole. Alla medesima pulitamente apparecchiata sono reficiati in questo tempo dodici poveri con i gnocchi e altri cibi ben condizionati; e il rimanente degli gnocchi cotti si trangugiano da coloro che vi si trovano".
Sempre da la cronaca del 1759 vegnémo a conossensa de una de le pì importanti tradissioni carnevalesche veronesi. “Questo bacanale, del qual non avvi il più lieto e grandioso, principia in detto Venerdì all’ora di nona circa, col riempirsi le principali amplissime strade della città di gente innumerevole, la più parte mascherata con sfoggio e ricchezza d’abiti singolare, e con banderuole di carta sopra una lunga canna in mano, marcate con due VV significanti Viva il Principe, Verona e L’Abbondanza, e ancora con picciole ben dipinte e intagliate figure pulcinellesche in testa; e con flusso e riflusso strepitoso per le accennate vie scorrendo in carrozze, landò, ecc., destasi per la città tutta una insolita Carnevalesca notizia.
La nobiltà esce simultaneamente mascherata in gala finissima, e in mute a quattro e a sei portasi al palazzo di Sua Eccellenza Podestà (cui propriamente appartiene il concedere questo Carnevalesco divertimento, e in sua mancanza a Sua Eccellenza Capitano) venendo ivi distinta con prodigo sontuoso rinfresco”. Intanto “compariscono sulla piazza de’Signori innanzi al detto palazzo esattamente e puntualmente ordinate diverse compagnie di sanzenati composte di puttelli vestiti da capo a piè di candida tela fiocchettata di nastri rossi di seta con simil berretta in testa e di uomini con le loro zerbine per mano vestiti da Pulcinella, o in altre curiose guisa e le donne alla giardiniera; e con viva e acclamazioni interrotte dal suono armonioso di trombe, timpani, fagotti, e corni da caccia, grande agli ispettori e piacere arrecano”.
El corteo va inànsi verso San Zén con in fondo un gran car, tirà da quatro bó, pién de panbianco, e con una botesèla de vin, che vién dà ai poaréti; “e per due ore e più che dura questa popolare esaltazione, gettasi alla ciurma dell’affollata plebe continuamente il pane, e però dicesi il Carro dell’Abbondanza. Innalzato poi si osserva sulla piazza di San Zeno un palco di legno capacissimo, addobbato da ogni parte di verdi e di fiori e sopra di esso salgono i puttelli, e le maschere tutte, Ivi si impastano gnocchi e vi se ne fanno cuocere più caldaie […] Deposto frattanto dai facchini il carico della cibarie e del vino nella corte dell’Abbazia, tutto si distribuisce a tutti gli abitanti di quella contrada”.
10.1 - La mascaràda dei Sanzenàti del 1804
Al corteo gh'éra i Sanzenàti, le autorità e 'l càro de la "bondansa". Se partìa da San Zén verso Piassa dei Signori par invitàr le Autorità nel rión dei sanzenàti. Prima de tornàr indrio se faséa tri giri intorno a la piassa dando vita al famoso Bogón.
a) El capo de Macaróni
b) I Macaróni con done vestì da contadine (un tempo i Macaróni i era i capi-famèia de San Zén che i podéa far la siélta tra lori del nóvo capo
c) I Putti (I butèi) de la contrà porta bandiera con soto-capo, un alfiér e un sergente a cavàl con spade in man.
§
d) Pompeo del Gerlo, persona descrita in un dipinto del Marcola ne la lòsa de casa Allegri in Via Muro Padri. El Marchese Dionisi nel 1804 in macarònico (ibridassión del volgàr veronese e latìn) l'a dito:“Un maccherone da un altro sembra portato nel gerlo…e se stesso invece porta con le sue proprie gambe. Ecco colui che s’affatica a portare col gerlo il compagno, o meglio, faticare sembra e perfino gobbo pare”.
e) I Mugnai
f) I Camisoti da la “longa camìsa” par el trasporto dei cassoni con farina bianca, con la fàcia sporca de bianco, 'na caciòla bianca fasciata de nastri color scarlà.
g) Torcoloti, quéi che i portava el vin.
10.2 - La "Funsión del Gnoco" del 1807
Da San Zén l'è partì una delegassión mascarà de Sanzenàti verso i Palassi de Piassa dei Signori, par invitàr el governadòr o podestà e le massime autorità:
a) 36 Macaróni, el Capo dei Macaróni sul musso, 48 munàri (mugnài) a cavài, i torcolòti, 100 camisòti, Pompeo, 48 Butèi de la contrà a cavàl
b) una banda musicàl
c) el càro trionfàl tirà dai bó.
Rivà la delegassión in Piassa dei Signori i s'à postà tacà a i muri, a tórno a la Piassa mentre el Capo dei Macaròni co' el so musso l'è andà su par le scale co' i Macaròni che i urtàva la bestia. L'invito vegnéa fato in Macarónico al governadór. Dopo l’invito l'è partì la bèla delegassión co' la zònta de le carosse de le autorità faséndo tri giri intorno a la Piassa a forma de Bogón.
El ritorno, lóngo l'atuàl Corso Porta Borsari, Cavour, Castèlvècio e Regàste S.Zén co' tanto de soldà armà par mantégner l'ordine e parché no ghe fusse casìni. Rivà le autorità a San Zén, el rapresentante çitadìn, l'è andà su par i scalini del "baldachìn dei gnochi" 'ndóe a 'spetàrlo gh'éra el Capo dei Macaróni, pronto, a métarghe in boca, co' el pirón, i gnochi fumanti e ben consà.
Nel locale Abassia i daséa fora el pan, vin e farina a le famèie de la contrà. Intorno a la piassa gh'éra dei palchi, co' presenti tute le classi sociali 'ndóe i daséa el pan e vin a fontane al popolo". Nel lógo de la statua de Tomàso Da Vico, un giro de tòle per darghe da magnàr ai pitòchi. Finìa la "Funsión del Gnoco" le autorità le tornava indrio ai Palassi, compagnà dai "butèi" a cavàl.
El corteo el passàva longo le mura fin a Porta Nóa e a i Portoni de la Bra. I se metéa su do file, una lato volto San Luca e l'altra lato Citadèla. Do “cuccagne” i éra posissionà, una in Pias
sa Bra e l’altra in Corso Porta Nova, co' festa, teatro e magnàr bón.
10.3 - El càro de la 'Bondansa
Ciamà Càro de la 'Bondànsa o Càro Trionfàl de San Zén, el fa riferimento al famoso "Carroccio". caréto de la bondansa. El 24 dugno 1405 el giuramento e la fedeltà dei veronesi a la Serenissima. I nostri ambassadòri de ritorno da Venessia, dopo du secoli, i à volù tiràr fora da l'Abassia de San Zén, el famoso "Carroccio" nato co' la sconfita de Barbarossa, portandolo in piassa co' tanto de stendardo de San Marco avù in dono dal Doge.
Nel 1406 el Governo Veneto, par paura de sentimenti de ribelión dovù a la fame e al costo del forménto, l'à istituì la "Festa de la 'Bondansa". Nel carneàl l'éra in compagnia de la mascaràda dei Sanzenàti e de le Autorità.
10.4 - El Bogón
Ghe partecipava la nobiltà che la dovéa 'nar al rinfresco del Podestà, le compagnie sanzenàte (dei "puttelli, pulcinella e giardiniere" compagné da trombe, tamburi, fagoti e corni da cassa) con denànsi un bel nùmaro de cavalieri sanzenàti con spade "sguainate" e col so stendardo.
Vegnéa messa 'na corona de fiori e "alloro" su la carossa del Podestà, prima de 'nar a catarlo nel so palasso; el capo dei Puti "a cavallo di un ciuco bardato inguisa bizzarra e ridevole" in compagnia de altre màscare el faséa i complimenti e un invito in dialèto sanzenato; da la corte Pretoria vegnéa fora un séntenàr de òmeni carghi de roba da megnàr e de vin par la sfilata a "Bogón", cioè un triplice giro a figura de "chiocciola" intorno a Piassa dei Signori; el corteo de le màscare, nobili, milizie e autorità con de drio el caréto de la 'Bondànsa tirà da quatro bo e cargo de pan e vin, se movéa in diressiòn San Zén, andòe gh'éra un palco denànsi la Basilica par cusinàr e distribuìr gnochi, con ristoro par dodése poarèti tacà al monumento de Tomaso da Vico.
Grande festa, con magnade e balàde serali ne la sede del Podestà, ringrassià el giorno dopo dai Sanzenati pieni de borésso. El tuto l'éra consà ogni ano con varie composissioni de poeti, dediche, sonéti e cansóni.
11.0 - Curiosità del Carneàl veronese
Con queste póche righe te pól savér de le curiosità interessanti e anca cosa l'è sucesso a partìr dal 1650. El Vènardi Gnocolàr no sempre l'è stà festegià e in molti casi "ridotto ad un insipida farsa". G'avù tante rinàssite, quéla più importante grassie al podestà Orti Manara nel 1838 e anca de le disgrassie. Ma quél che vegnémo a savér l'è la verità sul Sire, che no l'era el protagonista de la Festa. Nel corso dei secoli segnalémo anca la visita dei Reali ne la nostra çità par vardàr la nostra manifestassión.
El Vènardi Gnocolàr del 1650 l'è ricordà par un fato veramente incredibile, una strage. In Piassa dei Signori durante el famoso "Bogón", la sfilada del Vènardi Gnocolàr, el Capitàn Giacomo Venieri a la guida de 'na quarantina de òmeni armadi, vegnù fora da le vie che le sbuca ne la piassa, s'a butà in mèso tra le màscare del Bacanàl e 'l Papà del Gnoco.
I soldà con una vera e propia assión militàr de guera urbana, i à brincà quatro butéi de nobili faméje veronesi mascarà, copàndoli. Alessandro Turco e Alvise Nogarola colpì a la schéna da l'archibugio mentre Agostino Giusti e Francesco Nogarola lassadi in fin di vita àrente a le Arche Scaligere, andóe i s'à sconti. I soldà con Venieri a capo i è scapà sui caréti de le dame sparàndo su la zénte. 
Ne le antiche cronache del 1650 se parla de una "supplica" rivolta al Consilio Comunàl da parte dei genitori del butéi copà...."Lo spargere il sangue et il vedere caduti a terra questi in felicissimi giovani non mitigò punto la diabolica ferita del Venieri, anzi imperversando maggiormente contro i caduti et spiranti, sbarò scaricando le armi tre o quattro volte archibugiate, con spavento et orrore di chi ciò vide et osservò". No se conosse i motivi de sto grave fato de sangue e al Venieri a quanto par no gh'è stà fato gnénte. Purtropo el Comun no podéa far più de tanto, se non dirghelo al Doge de Venessia. Gnénte giustissia par le faméje nobili veronesi; de 'sta storia, nei secoli, nissuni l'a s'avù più gnente.
Nel 1660 le novità del Doge D.Contarini e 'l Podestà F.Grimani s'à podù “'nàr mascarà nel tempo de carnovale, la qual cosa no l'è stà mai vista tempo indrio”.
Partensa del Corteo nel '700 “al’ora de nona”.
Nel 1778 Ferdinando I° de Borbone e Duca de Parma l'éra presente al nostro carneàl.
Come da le cronache, l'ultimo "Carneàl d'altri tempi" vén festegià nel 1796, ma gnénte ne fa pensàr che el vénto supià in tuta Europa con la Rivolussión francese el sia riussì a smorsàr zò l'alegria del Carnevàl Scaligero. Anca nel primi anni del'800, secondo quanto riportà da le cronache, vegnéa festegià el "Vènardi Gnocolàr". El pensiér "razionalista" nato dal'"Iluminismo" e con i francesi che a la fin del '700 i era deventà i paroni de Verona no i éra riussì a cambiàr la mentalità de la çità. I Francesi par paura de un rebaltón popolàr nei so confronti, i g'a lassà la tradissiòn ai veronesi.
Un carneàl costa 4.700 lire italiane nel 1806. Un particolàr interessante rilievo, come riporta Tullio Lenotti nel so libreto sul Carneàl veronese publicà da "Vita veronese", l'è nel Vènardì Gnocolàr del 1806. El vice rè Prinçipe Eugenio decreta: "Sposta per l'anno 1806 a disposizione del Prefetto del l'Adige la somma di Lire 6.000 per la festa del Venerdì Gnoccolare".
E in più, el Prefeto Pio Magenta, nel dar notissia del decreto, el dise come organisàr la festa "con tutte quelle dimostrazioni di esultanza che sogliono accompagnarla". Le 6.000 lire milanesi, (circa 4.700 lire italiane) i era quanto ghe voléa par realisàr l'evento a carico del Comune. "Per palco, palchetti, fontana e steccato, due portoni e statue, con ornati di pini formanti il marciapiedi, e compreso il vino che zampilla da una fontana, e il pane che si fa sortire da una bocca sovrapposta alla figura di Bacco: lire 1.000.
Per 58 sacchi di frumento per fare il pane: lire 2.340". Tre sachéti de farina i servìa par far i gnochi da distrubuìr ne la giornada, co' un'altra spesa de 87 lire par 70 libbre de botiér, 87 lire par el formàjo e 787 lire par tri botesèle de vin. Con la farina che restava se faséa 5.350 bine, in pratica "due coppie di panetti di 22 once", 3.600 vegnéa dispensà ai vari invitadi de la contrà, 590 al capo dei Maccaroni e a la so comitiva, 110 al capo dei 100 Camisòti,309 al Gastaldo dei caréti e bine de pan, da butàr zò dal car trionfante longo el corso, 48 ai deputàdi, curato, paroco e 343 par altre persone.
I schèi del Bacanàl par la Gran Guardia. Nel 1812 el Consìlio Comunàl l'à cavà dal bilancio la voçe “sussidio de 4600 lire al Bacanàl” per completàr la fassàda (facciata) de la Gran Guardia.
El bilancio del carneàl 1813. a) Segnalémo la spesa par “el conservadór de la testa in piéra che soltanto nel giorno de Festa vén messa sul busto de Tomaso Da Vico” b) L’ispessión de tuta la festa vén fata dal “Podestà del Comune” e “l’economico particolàr" da una Comissión Muniçipàl sóto i so ordini”.
El podestà G.Orti Manara nel 1838. A l'inissio de l'800 el carneàl l'era messo mal, un "insipida farsa". Dal 
1838 grassie al Podestà G.Orti Manara i è stà fate de le modernità: a) La cavalcata de Tomaso da Vico con 24 cavalieri, b) i caréti Carnevaleschi de le varie corporassioni çitadine da zontàr a quél de la "'Bondansa".
Anca nel 1839 gh'è stà un grande sucesso del Bacanàl come i pol testimoniàr i documenti conservà negli Archivi Veronesi; disegni che i vegnéa portà a la comissión par un contròl, in caso fusse stà rafigurà un tema politico da censuràr. Nel 1843 scominsia la sfilada a tema-storico con el ritorno in Europa de Cristoforo Colombo dopo scoèrta de la Merica. Nel 1848, quando iè scominçià le guere de indipendensa, el Carneàl s'a smorsà. La sfilada no sempre l'è partì el vènardì. In caso de pióva vegnéa spostà al primo giorno de sól (tra sabo e marti) come nel 1838. A volte a la dominica sfilava solo i càri.
I reàli austriaçi a Verona. 
Nel 1857 Ceco Bepe I e la principessa Sissi in visita al nostro carneàl.
Nel 1877 el primo articolo del Coriere de la Sera sul nostro Vènardi Gnocolàr: "Il carnovale Veronese ha subito la sorte che toccò o sovrasta ai suoi fratelli delle altre città. I classici Gnoccolari non sono più che una splendida quanto lontana memoria. Ogni anno si cerca di risollevarli, ma sono sforzi inutili. Anch'essi come ogni cosa, hanno fatto il loro tempo".
Novi comitati dopo el 1866. Dopo la liberassión de Verona dal dominio austriaco e dopo èssar entrà nel Regno d'Italia, nel 1866, el Bacanàl ritorna, a quel de un tempo. Grassie a la nàssita de noe màscare 
come el Duca de la Pignata de Santo Stefano nel 1882, e de novi comitati carnevaleschi ne le varie contrade come Santo Stefano e San Giorgio (comitato unificà), San Gioàni in Vàl e Santa Maria in Organo, altri ancora in piassa Erbe e in piassa Bra e via Nova.
Nel 1892 el record de “càri trionfali”, 31
La rinàssita del 1923. Dopo un pochi de ani tra ciari e scuri, el Bacanàl rinasse nel 1923 con el concorso de la Reginèta de Verona; ogni rión dovéa presentàr la so candidata e la votassión l'éra a la sera del vénardi gnocolàr al Teatro Novo con la proclamassión durante la festa mascherada al filarmonico del sabo de sera. Ne la rinàssita gh'è anca grandi personalità de la cultura e de l'arte come Renato Simoni, Angelo Dall’Oca Bianca, Berto Barbarani, Luigi Messedaglia, el profe Avèna, Nereo Vignola. Nel 1927 vèn istituì el premio par el più bel carèto realisà a tema, co' una poesia che vegnéa musicà.
A cavàl de la IIa guèra mondiàl. L'ultimo Sire prima de la seconda guera, l'è stà Giuseppe Simoni nel 1932. Nel 1949 le prime elessioni del nóvo sire (Oreste Godi) dopo la guera, co' i voti dei capifameia del rion de San Zén, e no più nominà par via ereditaria, come par el Duca de la Pignata de San Stefano. Nel 1950 vién costituì vari comitati compreso quél d'onòr dal Prefeto e con presidente onorario el sindaco, Aldo Fedeli. El primo Sire co' elessión popolàr l'è stà Attilio Martini su' un s-ciào dep5 candidati indicà dai capi-famèia de San Zén. e se vede l' introdussión de la figura del “galopìn” Nel 1953 anche l'antico riòn dei Filipini forma un pròpio comitato, co' la màscara de "Reboano Dalle Carceri", impersonà par la prima volta da Berto Pedrazzoli. Nel 1955 anca piassa Erbe entra nel Carneàl, con el "Podestà" e la "Podestaressa".
El golpe. Nel 1957 durante le elessioni, un galopìn s'a sentì mal, magnàndo 'na salamèla ai feri de l'altro candidato. Un schèrso de carneàl! Co' questa idea l'a vinto quèl che nel 1958 l'a costituì co' un "golpe" el nóvo "Comitato Libero di San Zeno". Dal 1960 al 2015 l'è stà Presidente del comitato.
La partensa del corteo l'è cambià tante 'olte:
a) Da Piassa dei Signori nel XVI sec.
b) Ritrovo in Piassa Navona 1840 ore 13 (part.P.ssa dei Signori)
c) Da Sant’Nastàsia nel 1899 (vedi foto)
d) Largo Divisione Pasubio nel 1952
e) Corso Porta Nova
(Foto Archivio Morando)
12.0 - El "Sire" nei secoli
Nel XIII° secolo, catèmo el dissendente de Reboano dalle Carceri, un çerto Ponzinella (da ponzìn). L'a barufà e piantà casini co' Coradìn I° e Mastino De la Scala, par 'sto motivo l'è stà parà via da Verona. Par el so modo de 
far, l'era conossù ne le principali Corti del tempo. Se vardémo i dipinti del '700 de Marco Marcola se vede che ghe soméia ben a Pulcinella e al "Capo dei Macaróni". El Papà del Gnoco al tempo "Macarón Magiór" l'éra vestì con una specie de tuta intiéra de colór avòrio con davanti òto botóni grossi come batòcoli e g'avéa el capèl fato a còno.
Anca la barba l'éra difarénte: del tipo venessiàn, a ponta, come quéla de Pantalón, sensa contàr el grosso naso finto. Segnalémo anca, che dopo l'unificassión d'Italia, catémo nei documenti e manifesti, el nominativo "Papà del Gnoco", invésse prima, come dito, vegnéa ciamà “Capo de’ Macaróni” o “Macarón Magiór”. "Tomaso Da Vico l'éra considerà el "protagonistà prinçipàl de la festa".
12.1 - El vestito del "Sire"
Par vestirse ghe vol almanco 'na mes'ora co' l'aiuto de un cerimoniere. Quando vedémo sfilàr el Papà del Gnoco con in testa el capèl e indosso el so vestito avòrio e rosso, tegnéndo in man el pirón, no podémo gnanca pensàr quali particolari se sconde drio.
Misure
Se parte dal 54 par i «magri» che no i pésa più de 80 chili al 64 par quei che no i supera i 110 chili. Ne la sede del Bacanàl a Porta San Zén i è conservà almanco 'na diésìna de vestiti da sire. Quando un candidato devénta sire o va a cromparlo da un sarto o el ciapa quél che ghe vién dato, parò no deventando parón e a fine serata el deve portarlo da nóvo in custodia. El costo l'è de sóra ai 5000 euri.
La Pànsa
El vestito come dito l'è 'na cromia de colori da l'avòrio al rosso: denànsi, sóra el cussìn che fa la pansa de la bondànsa" anca ai candidati più magri inpicà, gh'è la pansa con i botoni dorà, che sóto la gola vién serà con un "foulard", mentre sui orini (orli) sia de la giaca che de le braghe, finisse con un "pizzo" ricamà e vari campanéi: 12 par gamba e un pochi sul fondo de la giachéta.
Dal Tabàr
Da la schéna sbusàndo el tabàr rosso de "pannolenci" fodràdo de raso bianco, vién fóra "el macarón".che ricorda la distribussión del 1531.
El capèl
No l'è facile da realisàr e g'a la forma de un baldachìn colorà da andóe vién zò perline e strasse de ogni tipo e l'orìn dorà. Par ci no le savesse, rapresenta el palco che in passà vegnéa posissionà a San Zén par la distribussión dei gnochi a la popolassión. I 5 nastri colorà che vién zò par de drio i rapresenta i 5 rioni de Verona nel XIII secolo.
Le scarpe
Le scarpe i è bianche, con sora du batòcoli rossi de lana, istesse a quéle de l'Abate de San Zèn, un tempo tre le Abassie più potenti del Nord Italia.
El Pirón
El "scettro" conossù come «pirón col Gnoco», una "forchetta" che ne dise, de la distribussión dei gnochi volù, secondo tradissión, da Tomaso Da Vico. Come dise el proèrbio: «Porta Gnoco sul piròn, sempre alegro mai passión».
La barba e i cavéi
La barba l'è fata in lana de bùfala, la deve èssar lavà e petenà; la costa almanco domila euro. I finti cavéi un tempo i vegnéa confessionà da la storica botéga de corso Porta Borsari.
13.0 - Verona e il suo Carnevale
El nostro libro, dedicà a tuti quèi che ghe iè contenti de èssar veronesi e ghe piase mantegnér vive le nostre tradissioni come quela carnevalesca, da tramandàr a le future generassioni. Una publicassión che vol mètar in primo piàn, la storia, la belessa e quèl "unicum" che l'è, el nostro carneàl, tra i più antichi d'Europa, fato da màscare storiche e de volontari che i riesse ogni an dar lustro al carneàl de Verona anca fora dai confini de la provinçia. No l'è un libro "aqua e saón" ma un viàio a la scoèrta de un mondo poco conossù e fato de emossioni. Se va drento le sfilàde de l'800, ne le curiosità màcaroniche sensa desmentegàr le origini e i bacanàli, el tuto consà co' documenti mai publicà, cartoline, manifesti, foto antiche e moderne.
Drénto al LIBRO:
Cap. 1 - Cenni storici della città di Verona
Cap. 2 - Il vero significato del Carnevale
Cap. 3 - Anno 1094, Venezia, il vocabolo Carnevale parte da qui
Cap. 4 - Quando è nato il Carnevale di Verona?
Cap. 5 - Perché “Baccanale”?
Cap. 6 - Com’era chiamato il Papà del Gnoco prima del 1866?
Cap. 7 - Quali sono gli elementi pagani del nostro Baccanale?
Cap. 8 - Pulcinella è nato a Verona?
Cap. 9 - Qual è il significato del vestito dell’attuale Papà del Gnoco?
Cap. 10 - Come avveniva l’elezione del Capo dei Maccheroni nel 1779?
Cap. 11 - Come si svolse nel 1807 la “Funzione dei Gnocchi”?
Cap. 12 - Come si svolse il Vènardi Gnocolàr dal 1838 al 1847?
Cap. 13 - Quando giunsero a Verona Francesco Giuseppe e Sissi?
Cap. 14 - Nel carnevale, cosa si intende con il termine “Cavalchina”?
Cap. 15 - Quando furono ospitate le maschere italiane?
Cap. 16 - Quale fu l’innovazione nel Carnevale Veronese del 1882?
Cap. 17 - Quando nacque il “Baccanale di S. Stefano e di S. Giorgio”?
Cap. 18 - Quali furono le novità del Vènardi Gnocolàr nel 1923?
Cap. 19 - In che periodo i carri furono a tema con poesia e musica?
Cap. 20 - Fatti e curiosità del Carnevale Veronese
Cap. 21 - San Zeno: un rione, una storia
Cap. 22 - Le maschere della città di Verona
ogni capitolo el g'a tante e tante dimande con risposte che pol capìr tuti
Crompa el libro e spedissi el to materiàl, vién a le nostre conferense
Crompa el libro a 18 Euro, isbn 9788892710825 da l'editòr - www.edizioni03.com o varda ne le librerie onlain o se te vol te pol ordinarlo ne la to libreria soto casa. Se te gh'è materiàl che te vol vegna publicà, spedissi 'na meil a