Tra le più bèle òpare religiose de la Lessinia, segnalémo quéla che l'è deventà 
uno dei simboli de la montagna Veronese, conossù come Madona de la Lòbia o de le Lòbie (1290 mslm), dal cimbro "loube", nel senso de “pòrtego”. Una scultura saltà fóra da un tòco de séngio che l'è rugolà zò, 'ndóe co' martèl e scopèl gh'è stà sagomà la Madona dei sète dolori o Adolorà. Par védarla dovì 'nar nel Comùn de Selva de Progno (570 mslm), póco distante da Campofontana (1224 mslm) ne la parte orientàl de la Lessinia al confìn co' la provinçia de Vicensa e più precisamente a Malga Lobia de sóto (1330 mslm), che se cata tra i pascoli in mèso ai prè a 20 minuti a pié da la contrà Pagani (1260 mslm). No se conosse el scultór ma fórsi se conosse quando l'è stà fata, gh'è ci dise che uno dei preti de Campofontàna de la metà del sète-çènto, quando el g'a volù butàr zò la césa del sié-çènto el g'a dito a un artista del posto de far una statua par sistemarla su l'altàr dedicà a la Madona ne la césa nóa, costrussión che l'è stà finìa nel secolo XIX e consacrà el 29 lujo 1834 dal vescovo de Verona Giuseppe Grasser.
Gh'è ci dise, che el scultór, forsi el s'a acòrto che la piéra no l'éra intiera ma che la podéa spacàrse nel giro de póco e cossita l'è tornà a casa co' martèl e scopèl sensa finìr la so òpara. L'archeologo e storico Lanfranco Franzoni morto nel 2005, che el g'a dedicà una vita a la scultura nei XIII Comuni Cimbri veronesi, nei so studi l'avéa scrito che: la "Madona de la Lobia" l'è alta cm 112, larga cm 68 co' un spessór de cm 25.
L’òpara la par "condotta in adesione a severi principi di sintesi plastica", la Vergine "col manto che ghe fa una nicia a torno a la testa, l'è sentà e la tién so Fiól sui zenòci ma sensa che se véda brassi e gambe". La testa "l'è un pél inclinà da la stessa parte 'ndóe pénde la testa del Cristo", che l'è realisà con "intendimento realistico", invésse el corpo te pol védarlo 'pena 'pena con poche linee da la superficie de la piéra. "Arte e religiosità 
si esprimono qui mediante segni essenziali che raggiungono un intenso potere comunicativo".
Nel 2014 la restauratrice Caterina Caporàl la g'a netà in sié giorni la statua, da mus-ci e licheni e so pare Carlo, artista, critico d'arte e esperto de arte religiosa lessinica, molti ani prima el n'a lassà do righe: C’è una Madonna che non ha titolo, / un capitello senza nome, / una “Pietà“ senza colonnato; / un capitello che i silenzi montani / trasformano in concerto. Solo la faggeta diventa chiesa, / e il sentimento tra le malghe / diviene cattedrale. / Madonna “cimbra”, / l’amore, l’amicizia / le ho ritrovate sotto il tuo manto,/ fredda pietra. / Madonna del muschio rosso / come sindone di vita…/ un colore, / un grazie. Par ci ghe piase far do passi in montagna ghe consiliémo de parchegiàr l'auto poco distante da la césa tacà al çimitèro e 'nar a catàr la Madona de la Lobia tra panorami incredibili de la Lessinia Orientàl. (Andrea Toffaletti)