Sul confìn tra Ala de Trento e la Lessinia, a partìr dal secolo XVIII e fin al "Trattato de Saint-Germain" nel 1919 quando el Tirolo meridionàl l'è passà al Regno d'Italia e de conseguensa la montagna l'è stà lassà in bòna parte da la popolassión locàl, una de le atività più conossude, l'éra quéla de nar "de sfróso", o mèio, de "contrabàndo". Disémo che in quéi ani da la contèa del Tirolo prima e da l'impero Austro-Ungarico dopo, in diressión Lessinia, gh'éra un çèrto giro de "carga" come el tòbaco "taba", spirito (àlcol), sal e sùcaro scambià co' forménto, véna e altri cereali trasportà co' la "careghéta".
A tòrno a questo giro de frontiera l'è nata una vera e propia mitologia, presente nei toponimi, nele fòle e ne le tradissioni locali. A partìr dal 1405 quando Verona l'è passà sòto la Serenissima, le tère de qua e de là del confìn, le ghe n'a visto de còte e de crue, in particolàr nel 1411 quando co' el testamento de Azzone Francesco Castelbarco, i Vicariadi de Ala, Avio e Brentònego i-è finìdi in man venessiana e nel tempo anca i feudi de Lizana, el castèl de Rovereto e quél de Mori nel 1439.
Dopo la batàlia de Caliàn del 10 'gosto 1487 tra i soldà de la Republica de Venessia, del Principato vescovìl de Trento e de la Contea del Tirolo gh'è stà dei problemi de tère a Asiago, Valsugana e Lavarón, 
co' Rovereto restà par vint'ani, fin al 1509 nele mane de la Serenissima. Nel 1702 Venessia g'a dito al perito Gasparo Bisognato de disegnàr "li confini tutti di questo Serenissimo Dominio con lo Stato Austriaco e indicare nello stesso disegno li siti tutti dove debbano fissarsi li custodi e caselli" par gestìr al mèio quéle tère.
L'ano prima nel 1701, l'è stà vèrto uno tra i sentiéri piassè conossudi dai contrabandiéri, quél de la Val Fréda, valàda che nasse a sud de Ala in contrà Sdruzinà a quasi 160 metri s.l.m. e che finisse in contrà Sega a 1224 s.l.m., dai soldà del prinçipe Eurgenio de Savoia al servissio de Casa d'Austria. Come émo scrito in un altro articolo, Eugenio el s'a rampegà co' mussi e canóni fin su a Passo de le Fitànse con quatro resiménti par dopo sponsàr tra Fosse e Breonio in compagnia dei altri du resiménti vegnù su da Peri.
'Sta mossa l'è stà pensà par no ciapàrsela nel torototèla dai francesi in un periodo 'ndóe gh'éra la Guèra de Sucessión spagnola e 'l tirolo se catàva tra el fronte de la Baviera a nord e i francesi in Lombardia. Finìa la guèra con' la Paçe de Aquisgrana nel 1748, la Serenissima che l'éra neutràl la voléa métarse d'acordo co' Casa d'Austria par i confini, visto le tante problematiche, cossita nel 1750 una 
comissión la s'a catà a Rovereto par métar zò le regole, da 'na parte Paride di Wolckenstein e Giuseppe Ignazio de Hormayr par l'Austria e dal'altra Pietro Correr e Francesco Morosini par Venessia. El 5 setémbre 1753 nasse el "Tratàdo de Rovereto" dopo riunioni e sóralóghi, l'è entrà in completa funsión nel 1754 (v. foto 4) fin al 1798, co' i Vicariadi trentini divisi a metà.
Condissión cambià quando l'è rivà Napoleón, co' i montanari de la Lessinia che i g'a dovù migràr o darse al contrabando par podér vìvar, anca parché le tasse a la dogana e no solo i-éra deventè pesanti da la parte francese respèto a quéla austriaca. Nel Stato Veneto gh'éra el divieto de coltivàr tabàco ma da la parte austriaca no, defàti in Val Lagarina a parte la coltivassión dei morari par i "Cavaléri" dal '600, se binàva su e se laoràva le fòie. A metà del '700 se produséa tra i 15 e i 20.000 kg de tabàco par un valór de quasi 5.000 fiorini.
La crisi l'è rivà co' le tasse del goèrno bavarese e dopo con quél austriaco; a parte questo produssión industriàl nel 1852 l'éra importante e vegnéa colttivà quasi 15 milioni de piante, tanto che a "Borgo Saco" de Rovereto gh'éra piassè de 1000 laoradòri ne l'industria e nel 1912 quasi 2000 par la magiór parte nati a Ala.Nel 1815 el Veneto l'è passà soto l'Austria, cossita el contrabando l'è sparido fin al 1866 quando 
semo passadi sòto al Regno d'Italia.
Con l'inissio de la Prima guera mondiàl iè stè tirè via i simboli de l'Austria (v.foto 3) da le piére de confìn da parte de le popolassioni locali, anca se no l'è servido a gnénte, parché el confìn l'è restà cossita fin a quando, finìa la guèra, el Trentìn e l'Alto-Àdese i-è finìdi a l'Italia, 'ndóe s'a visto la nàssita del confìn regionàl tra Veneto e Trentìn A.A. fin al 1943 quando l'Italia g'a firmà "l'Armistissio de Cassibile". Finìa la Seconda guèra Mondiàl el confìn l'è deventà tra la Región Veneto e quéla "autonoma" a "statuto speciàl" del Trentìn A.Adese. Come émo visto, 'nar "de sfròso" l'éra un grosso ris-cio in 'stè tère, ma le guére e i vari govèrni i g'a contribuì a l'arte del rangiàrse in modo no propio onèsto. Disémo che, par come i-éra fate le montagne co' scurtoli, sentieri pericolosi, càvoli par scondarse, sénge da farte vègner i sgrìsoli e boschi bèi fissi, i podéa dar 'na man a s'to tipo de atività.
El problema piassè grosso l'è nato co' el Regno d'Italia quando la marcansia straniera la vegnéa tassà a la grande e la zénte la moréa de fame dando vita a la grande migrassión in Merica de fine '800 sensa contàr che quando la Prima guèra mondiàl l'è finìa, i paesi de confìn passadi tuti sòto a l'Italia i s'a udè par mancansa de "entràde". Tra i sentieri che savémo bén frequentà dai contrabandieri e soratuto documentà, gh'éra quéi del Passo de Roca Pia a 1250 m.s.l.m., quél de la val dei Falconi tacà a Passo Fitanse a 1400 m.s.l.m., quél a Nord de Podesteria che finìa ne la Val Bóna, quél dal Passo Pertica verso la val dei Ronchi a 1530 m.s.l.m. e quéi denànsi al Reòlto, la Val Frasèle e Campofontana.
In particolàr quél che dal Passo de Roca Pia, te menàva da Borghéto in Val Lagarina in diressión Pealdéta passando sul lato ovest del Corno d'Aquilio par finìr malga Pealda, con un dislivèl de piassè de mile metri; quél de la Val dei Falconi arénte al Passo Fitanse, che vegnéa su da sud par finìr ne la Val fréda passando tacà a l'Ostaria Boldiera in contrà Sega de Ala; quél piassè alto el passàva a nord de Podastarìa e finìa in Trentìn da la Val Bona, piassè utilisà dai contrabandieri respèto a quél de la val 
de fiànco de la Val Mata; quél del passo Pertica che co' diressión sud-nord finìa in busa ne la Val dei Ronchi, séntiér da ciapàr vegnéndo da Giassa e passando par el Rifugio Reòlto 'ndóe tacà gh'éra el confìn co' una caserméta de la guardia de finansa; da la parte Vesentìna gh'éra quél de Durlo che'l passava da contrà Pagàni de Campofontana, tiràndo drìto par Malga Laghéto, Frasèle in diressión Monte Séola, Tre Crose e Campobrùn, una strada militàr conossù fórsi fin dai tempi dei romani co' el nome de Gassa e utilisà anca dai Longobardi. Un tempo el percorso che vegnéa su da la Val Bona, quando l'éra ancora un sentieréto, l'è stà utilisà par "cargàr montagna", compagnando le bèstie nei pascoli de la Lessinia.
Co' el passàr dei ani, l'è stà utilisà dai contrabandieri co' tanto de carga sul mul, in tute le stajoni e nel cór de la nòte, anca se el periodo mèio l'éra da maio a otobre, parché a caminàr ne la neve no l'éra façile. In questi casi, vegnéa montà le sóle dal vèrso sbaià, cossita i finansiéri vandando le péste ne la neve i finìa ben distanti dai contrabandieri. Dovì pensàr che da in fondo a la val a l' "Ostaria de la vecéta" a 1200 m.s.l.m. i ghe metéva quasi 5 ore. I finansieri da la parte Tirolese i serava un ocio, visto che te fasévi el contrabandiér par disperassión, par paura de morìr de fame e quindi anca lóri a 'òlte i ris-ciàva la pèl par far i contròi, cossita i vardava 'ndóe el contrabando no'l passava.
El casolàr de la Vecéta nei ani l'è deventà un calcossa de mitologico da contàr ne le fòle de filò. Una dòna vècia secondo quél contà, la ghe faséa coraio e ghe diséa una parola de conforto ai contrabandieri che vegnéa su da la val o gh'è ci dise che la sorgente lì tacà no l'è altro che le so làgreme e che éla la sia restà imprisonà in una cascàda o che la gestisse un ostarìa. In verità, el nome podarìa vegnér da la val de le Vécce, 'ndóe la véccia l'è el nome de 'na piantà utilisà par darghe da magnàr a le bestie. Par rivàr da la vecéta, 'ndóe gh'è restà quatro sassi, te pól vegnér su da Ala passando par Malga Fopiam (v.foto 1) o da Podestarìa in diressión de le malghe de Scortegara de çima e nar zò fin al bosco de soto al Monte Aguz.
ARTICOLO 17 APRIL 1886 - ARCHIVIO STORICO LA STAMPA DE TORIN
Trèdese contrabandieri "assediati" in una casa. — Nela note tra martì e mercolì (13 e 14) in quel de Tregnago l'è stà compiù un operassión da parte de le guardie de finansa de la logotenensa de Giassa. Gh'éra un strano giro de zénte nel paese de San Francesco che passava el confìn. Cossìta le guardie le s'éra sistemè a Boca Galvàno sul confìn, Roarè de Velo in Val Squaranto e in contrà Gaspari sóra Squarantolo, invéce el tenente l'éra andà a controlàr ogni burón. Sonà le do de nòte, el sotobrigadiér Enrico Avanzi e la guardia Molocelli i g'a sentì un fraco de zénte pestesàr, 40 contrabandieri carghi de bandòti de spirito. Le guardie anca se in nùmaro minór i g'a dito ai contrabandieri de fermarse, che a quél pónto i g'a butà zò nel vaio i bandòti.
El sotobrigadiér e la guardia i g'a corso drio fin a la contrà Squaratolo 'ndóe un mùcéto de contrabandiéri i s'a scónto in una casa, no riussendo a védar da che parte iè scapadi i altri. Cossita Avanzi el g'a dito che, se i scapàva da la casa el g'avarìa sparà, nel fratémpo el g'a dito a la guardia de nar a San Francesco e dimandàr altre guardie. Cossita el tenente, el brigadiér e 5 guardie de la riserva iè andà a Squarantolo 'ndóe i g'a catà Avanzi a tegnér d'òcio la casa. El tenente e le guardie i s'a mésso a tórno a la costrussión spetàndo el giorno dopo, in quanto per "Lése" (legge), no se podéa butàr zò la porta e entràr in casa de note.
Dal camìn vegnéa fóra, un fumo bèlo fisso e un udór de brusà. Secondo el tenente e le guardie, i contrabandieri voléa brusàr el spirito. El giorno dopo, el tenente Dal Monte el g'a dito ai contrabandieri de vèrzar la porta ma una òlta entradi, i contrabandièri dopo avér brontolà i g'a dito de no savér gnénte de quél sucesso de nòte. Le guardie dopo avér rumà dapartuto, a parte le sgaùie del magnàr e dei cortèi, no i g'a catà gnénte, invéçe nel bosco e nel vaio 31 bandòti de spirito del péso de 260 kg. I contrabandieri seradi in casa i éra 13, portadi a Verona da Porta Vescovo ne la caserma de Via Nicola Mazza compagnà da un mùcio de zénte. I vegnarà deferìdi a l'Autorità Giudissiaria... Andrea Toffaletti