La festa del Patrono, San Zén.
Par noàntri veronesi San Zén no l'è solo el nostro patrón ma l'è un vero e propio simbolo. Anca se al dì de ancó se celebra el 21 de màio ne la Diocesi de Verona, el 12 Aprìl par la Césa e i altri comuni italiani l'è Festa... e come se dise a Verona... "San Zén che ride e paparele calde, questo l'è el gonfalón dei Sanzenàti, le paparele le ghe vol ben zàlde e che i veronesi i sia tuti mati!"
Legende & Miracoli
Se 'ndémo drénto ne la basilica te pòl catàr una statua in marmo rosso de Verona, bela granda, dipinta con forme grese. L'è quela de San Zén, vestìo da Vescovo. Ne la man sanca, el gà el pastoràl 'ndóe gh'è tacà un pésse, mentre con la man destra el benedisse. Ve si mai dimandà parchè San Zén el ride? Barbarani ne la so poesia al Santo Patrono el disea: ".....savio, prudente par virtù fornide, da quél'aria de furba santità, che i l'à ciamado el me San Zen che ride, sule batoste de la so çità!....." Gh'è dei studiosi che iè 'rivadi a 'ste tri posibili conclusioni: 1. El ride o sganàssa parchè, se l'è na statua medieval, in quél'epoca, i faséa le statue con quél sorisìn che te par che le te toga par el cul, vedi el monumento equestre de Cangrande. 2. El ride parché nela liturgia, la letissia pasquàl, l'éra ligà al soriso dei fedeli. 3. El ride parché podaria èssar un motivo folcloristico. (El riso, come dator de vita). La risada no l'è sta mai scancelà da Re o Sovrani, la gente la sganassava magari par scapàr da la paura e da la morte. No gh'è gnente de çerto su quél soriso, ma l'è grassie a questo che i Veronesi i s'a ligà al Santo Patrono.
Legende & Miracoli
1. Un giorno mentre San Zén el pescàa, chièto su la piéra, s'à presentà tri mesageri del re Gallieno, che i g'avéa dimandà de andàr a cavàr ià el diàolo a la fióla del re. El Santo, bon come un toco de pan, generoso, l'à volù prima sfamàr sti pòri anbassadori regalandoghe tri péssi. Poco riconossenti, i gà fregà el quarto, ma questo pur cusinandolo, l'è rimasto cruo. Vergognandose iè tornà da San Zén, che'l g'à perdonà el gesto. Da li i Veronesi i s'a ispirà par la riceta dei bigoli con la sardèla a San Zn. 2.Nel 589, l'Adese in piena, l'éra rivà a le porte dela cesa 'ndóe gh'è 'desso l'atuàl basilica. I fedeli çerti de negarse i s'a scónti drénto la césa e invocando el Santo, le aque le s'a fermade e inalsà verticalmente a protessión de i çitadini. 3.I bó de un contadìn i stàva portandolo in un gorgo generà dal diàolo. San Zen che'l stàva pescando l'éra 'ndà de corsa in aiuto del contadin sfidando el diàolo, che prima l'avéa abandonà el poro omo, sucesivamente visto che non se andàva a una conclusion, i avea deciso de sfidarse a tanburèl. In prima batuda el diaolo el g'avéa lancià un toco de montagna contro San Zen che l'avéa respinto con la Rena. San Zen sucesivamente con un colpo da maestro, l'è riussì a butàr el diàolo in una grota. Par la partìa persa el diàolo come pegno, l'à dovù trasportàr na vasca de granito rosso da Verona a Roma che però nel trasportò la gh'è cascà, e anca ai giorni nostri nela basilica a sinistra se pòl védar el toco de vasca con sóra le péste del diàolo.
La Vita
Santo Africàn nato atorno al 300. Vescovo de Verona nel 362. In verità no l'éra de pèle propio nera. I Miracoli principali conpiudi iè su l'Adese e el Diaolo.
(La Redassión 12.04.2023)
