Cari Veronesi, vissini e lontani, nel mondo. El primo de aprìl, La Rena Domìla smorsa 25 candeline e podémo dir che l'è un calcossa che ne porta nel cór una çèrta emossión. In questi ani émo incontrà tanta zénte no solo su internet ma anca de persona, sensa contàr i lóghi visità ne la nostra magnifica provinçia e podémo dir che émo imparà a volérghe bén ancora piassè al nostro teritorio. No fasso polemica co' quéi che i n'a mésso el bastón tra le rue parché no i merita considerassión, ma voio fermarme a le do parole dei tanti veronesi residenti a l'èstaro, "forsa e coràio". A 'òlte basta póco par tiràr 'vanti e far sempre mèio. Par 'sto motivo el sito l'è stà fato su da nóvo dopo un ano de laóri anca parché se no faséa cossita podéa seràr baraca e buratìni, ma sarìa 'sta massa bèlo par ci ne voléa mal. L'invidia e l'ignoransa iè brute bestie. 'Dèsso co' el nóvo sito se pól far tante bèle robe par mantegnér alte le nostre tradissioni e par questo, devo ringrassiàr par i consilìi. la passiensa e la professionalità i du "tennici" Nicolò Damoli e Luca Giavara. No dimandémo schèi a nissùni, ma solo 'na man, parché quél tramandà dai nostri vèci no'l vaga pèrso, La Rena Domìla l'è un patrimonio dei veronesi. Ringrassiémo anca i "media" che in quésti ani i n'a divulgà le nostre inissiative e soratuto i nostri lètori, presenti da ani e da generassioni. Pensa, 25 ani e semo ancora qua! El Diretor (Verona, 29.03.2024).
