Musei Civici, par ci l'è de Verona gh'è una bèla novità dal 1° Febràr 2024. Se te vól visitàrli a póchi schèi te convién farte un abonamento MUV, una schèda eletronica co' 12 euri, cossìta da podér nar drénto e fóra tute le 'òlte che te vól par un ano intiéro (a parte la casa de Giuliéta), invéçe par i butèi fin a 17 ani e 364 giorni l'è a maca. Come sempre, la prima dominica de ogni mese da marso a noémbre, par visitàr i musei, ghe vól 1 euro e sóra ai 65 ani l'è a maca. Se invéçe te vól spéndar schèi come i turisti le cose le cambia. 12 Euri par la Rena e Casa de Giuliéta; 9 euri par Museo de Castèl Vècio, Museo Archeologico e Teatro Romàn; 6 euro, par Museo de Storia Naturàl, Museo Lapidario Mafeiàn, Museo dei Afreschi a la Tomba de Giuliéta e Galeria d’Arte Moderna – GAM. A maca le "arche scaligere" se te gh'è un biliéto de quéi qua de sóra. Par una òlta l'è stà tegnù conto de ci l'è veronese.. (La Redassión 12.11.2023)
