Se gh'è l'Adese in séca i nostri campi i móre de sé, ma l'unica cosa bóna l'è quél de bèlo che pól saltàr fóra dal lèto del fiume come nel caso de Albaredo. Par calchedùn co' la moto da cross podarìa èssar solo de le piére, ma par ci sà de storia l'è un calcossa de incredibile. Defàti, par, che quél catà a Albaredo i sia i tòchi de un antica fornàsa par cósar i quarèi del primo secolo dopo Cristo tacà a Cà Bianca, Grassie a l'aqua de l'Adese s'a conservà qualche tòco de la mura, de 'na volta del forno e dei cópi. Secondo i studiosi, in epoca romana la fornàsa l'éra sóra a un terén de 15 mila metri quadri, a parte el discorso forni, gh'éra anca el lógo par secàr al sól el pastón de tèra crèa, aqua e pàia. El problema l'è che calchedùn el g'a ciapà le piére par còsarse le brìsole e altri i g'a pensà de utilisarle par un percorso da moto cross. L'ignoransa no la g'a confini, 'desso bisón salvàr quél che se pól, prima che vaga perso quél restà. Ma èlo possibile che nissuni no i g'a visto un casso? Una cosa de 'sto valór desmentegà? La storia del propio paese no l'è stà portà via dal fiume, ma da l'ignoransa... (El Diretòr 09.05.2022)
