El nostro petrolio che pol portarne schèi, l'è la nostra storia, in particolàr quéla che catémo soto tèra. A Montorio in Via de le Lòse durante i laóri de l'AGSM, s'à visto saltàr fóra i mosaici policromi de 'na vila tardoantica forsi del IV o V sec. d.C., disémo ai tempi de Re Teodorico. No l'è che la cosa sia nóa visto che de sóra ghe passava i tubi, defàti altri tòchi se pol catàrli al Museo Archeologico del Teatro Romàn a Verona dei scavi del 1908.
'Desso parò 'sto tesoro el vegnarà quertà, par 'sto motivo ve mostremo le foto parché no vegna desmentegà dai veronesi. Una scoèrta che podéa valorisàr sicuramente Montorio, che podéa portàr prestigio, ma come sucesso par la Via Postumia a Verona, quél che conta vién quertà..... (El Diretòr 23.07.2022)
