A pochi passi da Piassa Erbe, par precisión Vicoléto òrbo pósso San Marco, gh'è 'na casa che la g'a tanti secoli sora le spàle, piturà co'un colór ciàro de drìo al tubo de 'na grónda. El pitór secondo noàntri el deve darghe 'na man de vernìsa al muro de l'istésso colór del tubo, gh'è màssa difarénsa. A parti i schérsi, ci g'a dato el parmésso de métar un tubo denànsi a 'na pitùra de valór storico? Le ostarìe del céntro storico in çérti casi, ghe tóca métar le caréghe e i taolìni de un cérto tipo, quéle che rispéta el lógo storico o se te vól cambiàr 'el portón de casa tua nel rión de la Caréga ghe vol l'autorisassión. De cose de 'sto tipo i veronesi i n'a contà el coto e 'l crùo, Bisón farse de le dimande parché qualchedùn pól sgrafàr la storia e par altri ghe tóca tribolàr par cambiàr 'na lampadina. Gh'è póco rispéto par la storia, come la musica sparà a tuto volume denànsi ai monumenti da le òstarie o drénto la Rena co' la musica rock. Se volémo che i butéi rispéta la nostra storia, tuti dovémo rispetàr le regole, ma pròpio tuti. (La Redassion 04.10.2020)
