Una signora che ne lese, l'à spedì un documento molto interessante che parla del nostro Berto Barbarani. Un so amigo de Trento, paron de 'na casa ne la frassion de Povo, el g'à, tacà via in cusina, una poesia del nostro poeta, incornisà. "La canson de la pipa" l'è una de le tre che fa parte de "Cansone de Autuno" presente nel secondo Canzoniere Veronese del 1911. Ne la dedica del poeta se lése:"Par la casa dei sete bocài, Ognisanti 1927". De quèi bocài ghe n'è restà solo tre. Ma ci l'era el paron de 'sta casa e parchè Berto el g'à regalà propio una poesia che parla de la pipa? Podémo pensàr che l'omo el fumava, che l'era amigo del poeta, sicuramente Berto l'è passà da Povo e forse, quel l'omo, l'è el stesso presente ne la tersa poesia "...Olà, quel bon omo de Trento".
Un altra possibilità l'è, che i nomi sui bocài i sarìa riferidi ai paroni de la casa, ne l'ato de compra-vendita dei ani '30 risulta ghe ne catèmo 7. Berto el g'avéa conossense del Trentìn, difàti drento le Adesìne catèmo oltre a le Cansone de Autuno, Qua dove l'Adese e La mora del ponte par dirne un poche, anca "La Margarita de Trento", scrita a Folgaria ne le vacanse montane a casa de amiçi. Una poesia del nostro Berto l'è sconta in una casa trentina e sicuramente tante altre poesie iè sparse par l'Italia, lu l'è stà uno dei poeti a livèl nassionàl più conossù nel primo '900. Nel giorno de l'aniversario de la morte del poeta (27.01.1945), publichemo questa storia curiosa...(Verona 27.01.2019 - La Redassión)
