A Dolsé el castèl desmentegà.
Póchi i conosse la storia, póchi i varda cosa gh'è soto casa e i preferisse far le vacanse sul Mar Rosso. La póca storia che savémo vièn imparà a scóla e passémo denànsi ai monumenti sensa vardàrli. Te buti un òcio sul celulàr, te 'scólti la musica ma no te vardi ci gh'è denànsi a ti; no te 
vardi i palassi, le finestre, i fiori sui balconi, gnente de gnente. Nel fratempo che te si lì a farte i cassi toi in Piassa Erbe con tremila turisti, vién zó un tòco de muro del '500. Una ferita profonda, un sbrégo, che par ti no conta un casso. Un tòco de piéra, vècio, magari da parchegiarghe sóra la machina. A Dolsé nota località ne la ValdAdese, che buta un òcio al Monte Baldo e al so sacro fiume, 'ndóe catémo i arsìmi slusénti basà dal sol, l'è stà desmentegà un castél del XIII° secolo. L'è vera, i-è solo piére muciade, scarmenade qua e là a parte un tòco de muro, ma rapresenta la storia del paese. El nome de 'na via, ricorda la presensa de un castél, ma no se vede nissùn cartél che pol testimoniàr quanto sucesso nel 1211, come contà nei so studi dal grande Ludovico Moscardo "i veronesi nel 1211 avendo elèto, par so podestà, el conte Sambonifacio e vedendo che Senìgo, castèl tacà a la Ciusa de Seraìn, vegnéa ocupà co' forsa e utilisà come rifugio da Ribaldo Turrisendo, òmo catìo come 'na brèspa che l'avéa robà e ciavà tuto quel che podéa nei paesi arènte, i-è andà a catarlo butandoghe zò la costrussion fin a le fondamenta". El sentiér par el Monte Pastèl l'è ben segnà, ma par el Castèl Ossenigo (Senìgo) no gh'è informassioni.
Dopo 200 metri a sud-est del paese, in mèso a spini, gramégna e piante de ogni tipo, parte a sinistra un sentierìn co' 'na marògna no tanto alta de piére che se ràmpega su par el monte. El percorso che devénta praticabile solo da Sandokan, l'è pien de marùgoli, piante co' foie larghe o strete, àlbari sensa raìse, rame spacàde, ortighe e giara portà zò da la pióva come fusse un progno. El ris-cio de pérdarse l'è veramente alto, visto che l'ambiente l'è cambià da la nostra ultima visita de 10 ani fa. Grassie al percorso salvà sul gps e a la nostra spariènsa montanara semo riussidi a catàr la via giusta, anca se, un classico labirinto no l'è gnente a confronto.
El ritorno no l'è da far al tramonto o verso sera, sempre mèio lassàr dei segni par tera e caminàr de giorno. Sóra al séngio, se vede un 
panorama unico, incredibile, dal forte de Rìole al Castèl de Avio, Dolsé, la ValdAdese e 'l Monte Baldo. La vècia strada che porta al castèl se vede co' fadìga, fata de piére messe zò a cortèl ormai sbrisolà. Del castèl gh'è restà 'na mura alta 5-6 metri e 'na scala de piéra che va da un piàn a l'altro. Visto che secondo le cronache l'è stà butà zò tuto, quel pòco che l'è rivà fin ai giorni nostri l'è scónto da tera, fóie, gramégna e piante. Un vero pecà. Nei ultimi 10 ani l'è stà perso anca quél pòco che se podéa salvàr. Quél visto pol farne pensàr che no l'è stà ciapà la via giusta par salvàr la memoria de 'sti loghi, deventà sensa ritorno. Tra pòchi ani del castèl ghe restarà solo el nome de la via in paese. No sarìa mal un percorso storico che finisse tra le "ruìne" co' vista su la val. Ma no porta schèi e quindi, a ci ghe ne frega?... (La Redassion 19.09.2019)