A cavàl del '900 i poeti veronesi i-éra veramente tanti, Barbarani l'è quél che l'è riussido a deventàr famoso in tuta Italia ma a Verona Attilio Turco "Turcaine" con poche righe riussìa a descrìvar Verona e la so zénte in maniera incredibile. La so specialità l'éra el "soneto", le 14 righe formà da do quartine e do tersine, defàti qua su La Rena Domìla, ghe ne podì catàr bén 125. Ma no gh'éra solo l'amor par Verona, Turcaine el g'a scrito tanto anca su la prima guera mondiàl, su i fati nassionali e veronesi sensa contàr poesie su la società veronese dal pitoco al sior passando par l'amor. Tuto quél che vedéa spassesando par Verona riussìa a métarlo in poesia co' delicatessa. Quél che stupisse l'è, che 'sto poeta, no l'a ricevù i riconossimenti che meritava, noàntri volémo ricordarlo co' le so poesie, parché quél tramandà no'l vaga perso. Se lési i "sonetti veronesi" podì capìr che drio a la so poesia gh'è quéla Verona che ancó no gh'è più. Attilio el scrivéa anca òpare teatrali come quéle andà in sèna nei teatri Veronesi e Milanesi. No Ve restà che butàr un òcio a la poesia de Attilio Turco "Turcaine" (El Diretor 23/03/2025)
