Cari Veronesi, vissini e lontani, nel mondo. El primo de aprìl, La Rena Domìla smorsa 26 candeline e podémo dir che l'è un calcossa che ne porta nel cór una çèrta emossión. Te pensi quando te si partì e come el tempo l'è scapà via, portandose drio un sécio de sodisfassioni. L'an passà el sito l'è stà fato da novo, grassie a i du "tennici" Nicolò Damoli e Luca Giavara e nel giro de sié mesi l'émo sgrandà del 30%. Le manifestassioni organisà da La Rena Domila in colaborassion co' el CTG La Fenice iè stè veramente tante comprese quéle co' el Comùn de Verona al Museo del Ricamo e le celebrassioni par Berto Barbarani. Anca le conferense iè stè tante e anca par el prossimo ano ghe n'émo previste un bèl mucio, cossita da portàr la cultura e la tradissioni nel cor dei veronesi de tute le età. In tilivision e sui giornài ueb, el Vostro Diretor el g'a portà la so sapiensa par el carnevàl e 'l balon come a TeleNovo da l'amigo Gigi Vesentini. Presenti anca a le nùmarose manifestassioni veronesi come, Vènardi Gnocolàr, finàl Nassionàl de le boti a Brentìn e l'inaugurassion dei presepi a Ferara. Quésto par dirVe che no vardémo ci ne vol mal, no vardémo cossa fà i altri, ma vardémo de far sempre mèio par le tradissioni Veronesi! Pensa, 26 ani e semo ancora qua! El Diretor (Verona, 31.03.2025).
