El 26 de aprìl del 1945 a le 6 de la matina l'è s-ciopà la piassè granda Santa Barbara del Nord Italia in quél de Àesa, con drénto quasi 50 mila casse de tritolo da 50 kg ognun, tegnù d'òcio dai todeschi. El capelàn militàr, vicario del paroco, Don Giuseppe Graziani, paroco de la nota località a nord de la çità, savù de la possibilità che i voléa far saltàr par aria tuto, l'è corso al comando nazista el "Platzkommandatur" de Porta San Giorgio ormai pronto a scapàr da la çità, par farse dar l'autorisassión a udàr la polvariera ne le cave de piéra Galìna. Cossita ne la note tra el 25 e 'l 26 de aprìl, piassè de 1000 avesàni tra òmeni, done e buteleti, i-è riussìdi a portàr fora quasi la metà del materiàl, brusandolo. I avesani credéa de avérghela fata, cossita pian pian anca quéi scapà da Àesa iè ritornè a casa. Ma quél restà ne la Santa Barbara l'è bastà par creàr un buso o mèio un "cratere" de sóto l'Arzàn. Fumo e piére par tuto el paese, camini, porte e finestre smigassè ma el disastro parò, el g'a portà via 8 persone. Se no fusse stà par Don Graziani probabilmente no ghe sarìa più gnanca bóna parte de Verona (El Diretòr 24.04.2022)
