Grassie a Don Maurissio Viviani e i amiçi del Comitato San Roco de Quinsàn semo riussì a far una visita particolàr, che no penso podarà ripetarse. Nar soto al querto de la Cesa de San Fermo l'è un esperiensa incredibile. Un qualcosa de veramente ecessionàl, un capolaòro del '300. El sofìto de San Fermo, te par 'na nave rebaltà soto-sora, con 16 capriàde longo 54 metri. Lì se pol catàr dei dipinti de 416 Santi su àsse de legno sistemà in archi scolpìdi, come un album de figurine. Questo sofìto in làrese rosso l'è stà volù prima dai Benedetìni e finì soto i òci dei Francescàni in 30 ani, grassie al laòro de grandi artisti co' a capo Fra Daniele Gusmàri. Ma se no fusse stà par Guglielmo da Castelbarco àmigo Scaligero che l'à tirà fora schèi e fato segàr no se sà quante piante a so spese, con tuta probabilità restavà un òpera grandiosa solo su carta. Par i nostri letòri, un ricordo a vinti metri da tera.....… (18.02.2018 - El Diretòr)
