Quante pégore se vede a Verona, più che in Lessinia. El sport dei ultimi du ani l'è dirghe su al Sindaco che essendo montanaro de poche parole che preferisse i fati a le ciàcole, no informa la so zénte su le so decisioni. Questa Giunta par çercàr de scurlàr la çità ferma inciodà al so destìn, la fa de le sièlte da far saltàr i nervi ai çitadini. Se le cose no jè stè fate fin 'dèsso gh'è un motivo. Parò l'è giusto provarghe, par mal che la vaga le robe le resta come prima. La comunicassión del Sindaco e de la so Giunta l'è scarsissima, invece sarìa mèio dir le cose come le stà, dir parché vién scancelà de le manifestassioni, parché i soliti vol piassè contributi de l'ano prima, parché gh'è tanta burocrassia. La Giunta se ciapa in tante ocasioni responsabilità che no g'a, defàti se no te porti le fàture de le spèse la Corte dei Conti va in Comun dal sindaco e da ci g'a firmà el Contributo co' in man un bilièto par el Campón. No l'è che parché te salta in mente de far calcossa el Comùn l'è pronto a tiràr fóra i schèi dei contribuenti come un bancomat. Altro problema l'è la sicuressa che in calche manifestassión l'éra póca, co' el Preféto no propio convinto de la cosa. El veronese medio, no'l se fa queste dimande, ma preferisse darghe del mona al proprio sindaco, come se quéi vegnù prima i fusse andà su Marte! Calchedùn g'a dato el voto o l'è vegnù zò dal çiél? Altro capitolo iè le bùse ne le strade, presenti dopo cinque ani da l'ultima sfaltà, anca in questo caso nissuni se dimanda de la qualità e del vècio Sindaco. Par el discorso gramégna, le gestión l'è quéla che l'è, anca se nissuni ghe vién in mente dei "problemini" de ci gestiva in precedensa la stessa cosa. El veronese medio, no lése i giornài o lése solo i titoli, el veronese medio no se informa, el veronese medio no se fa dimande, el veronese medio no g'a memoria, el veronese medio no scólta quel che vién dito. Se vede solo dei leoni da tastiera! Quel che dimandémo al Sindaco l'è de comunicàr piassè co' la zénte e dir el parché de certe decisioni, anca se el veronese medio no g'a sempre la volontà de scoltàr.
