Oroscopo del Divìn Pojana 2025

El nóvo 'Ròscopo Veronese del Pojàna, el Divìn che'l varda le stéle e i pianeti sóra a Verona par dar una interpretassión de qual podarà èssar, el destìn de l'òmo su la tera nel 2025. No l'è un semplice 'stròlogo. El Zodiaco Veronese tra i più vèci in Italia, studià par secoli e presente su La Rena Domila in ciàve moderna co' Moltón, Tòro, Zuméi, Moléca, León, Giuliéta, Balànsa, Scarpión, Cavalón, Cavrón, Garda, Àole. Par ogni segno del Zodiaco gh'è un colór che te porta positività, fortuna, schéi e salute nei momenti 'ndóe le robe le va mal. El Divìn Pojàna te dise la verità, no l'è falso. Varda Verona, varda le stéle co' Divìn Pojàna.

Moltón 21 marso - 22 aprìl
El 2024 l'è finì mal, el 2025 pol scominsiàr solo che pèso, grassie a Marte che spaca le ultime bale restà sora l'àlbaro de Nadàl. Forsi in istà, la fortuna vegnàra pestàndo una boàssa ai Parpai. Nel laoro par 'verghe una promossion dovì lecàr el cul al vostro capo e no in senso figurà, dùgno el mese par darse da far co' la vaselina. In amor stasì passando un periodo de merda, ma gnente paura, le cose le cambiarà a deçémbre su co' la vita!

genàr *
febràr *
marso *
aprìl * *
màio * *
dugno * * * *
luio * * * *
agosto * *
setémbre * *
otobre *
noémbre *
decémbre *
colór: bròmba
 

Tòro 23 aprìl - 22 màio
L'ano scomìnsia co' la luna de traérso, ma la Luna nera che l'è in Toro fin a lùio, pol darte sicuressa, cossìta te pol caminàr co' l'ombréla sbusa soto la pióva. Sul laóro te pol far le robe sensa spacàrse la schèna, basta métarse in malatìa e far laoràr un altro al posto tuo. Da agosto in amór, vién fóra el toro che gh'è in ti ma sul più bèl te sonarà l'antifurto de l'auto. In salute, note positive ne l'ultimo test HIV.

genàr *
febràr *
marso * *
aprìl * * *
màio * * * *
dugno * * * *
luio * * * *
agosto * * * * *
setémbre * * *
otobre * *
noémbre *
decémbre * 
colór: sirésa de Cassàn
 

Zumèi 23 màio - 22 dùgno
Grassie a 'na mucia co' Giove, Saturno e Mercurio ogni tanto te pol farte notàr, a 'na festa o par strada, come una stéla che sluse nel çiél, pecà, che la luçe l'è blu e la s-ciantìsa come quéla de 'na volante, béar poco o dir de éssar passà co' el bianco... de Soave. Nel laóro te vegnaré ciamà in ufissio dal capo, mèio presentarse co' le scarpe sensa cordóni, podarìa rivàr un importante comunicassión quando te te cuci par ligàrteli. In amór te convién tor un bel ovo de strusso al posto de la famosa pastilìa blu par darghe drénto, òcio a no sbaiàr co' le pastilie dei freni.

genàr *
febràr * * * *
marso * * *
aprìl * * * *
màio * * *
dugno * * *
luio * * * *
agosto * * *
setémbre * * * *
otobre * *
noémbre * *
decémbre * * * *
colór: pàia da luamàr

Molèca 23 dugno - 22 lùio
In amór, no te vedi l'óra de sposarte a setémbre o aprìl ma una 'olta sposà, la vita sarà difarénte, 10 kg piassé in un mese; par ci l'è sensa morosa/o, gnènte paura, basta córar incontro a l'amór, tante òlte scónto de drio al cantón, òcio a no sbrissiàr descàlso sul pavimento móio e spacàrte la deolìna propio sul cantón. Nel laóro se te credi in ti e te ghe la méti tuta par far sempre mèio, el to posto vegnarà ciavà dal solito lèca-cul.

genàr *
febràr * *
marso * * *
aprìl * * * *
màio * * *
dugno * *
luio *
agosto * *
setémbre * * * *
otobre * *
noémbre *
decémbre * *
colór: schìto de colómbo de Piassa Dante

León 23 luio - 22 agosto
In amór se te speti 'na telefonada da 'na morosa o da un moroso 'pena lassà, te pol star sicuro/a che no te telefona e de sicuro no l'è gnanca Papa Bergoglio ma piassé probabile che'l sia una compagnia telefonica; vérze riscaldà e morosa/o tornà no i-é mai bóne/i. Nel laóro te faré tanta strada...ma a pié, da casa par colpa de 'na busa del cantiér del filobus che t'a spacà la machina. Par desmentegàr i vostri problemi mèio béar do òlte al giorno un bon Recioto, a disnàr e nel resto de la giornada.

genàr *
febràr * *
marso * * *
aprìl * * *
màio *
dugno *
luio *
agosto *
setémbre * * *
otobre * * *
noémbre *
decémbre *
colór: Recioto

Giulieta 23 agosto - 22 setembre
Da genàr te consìlio 'na vacansa a Taranto ma par colpa de la to vista, el to aereo te portarà a Toronto co' -15. Da marso scominçia un nóvo percorso de vita, la bruta persona de un tempo no la gh'è più, nassarà una nóa bruta persona. A lùio grassie a Marte, te riussiré a finìr tuto quél lassà da 'na parte in amór e nel laóro. A otóbre co' Mercurio te pol far un mùcio de schéi, tanto da usàr la carióla par depositarli in Banca.

genàr *
febràr * *
marso * * *
aprìl * *
màio * *
dugno * *
luio * * *
agosto * *
setémbre * * * *
otobre * * * *
noémbre * *
decémbre *
colór: piéra de Prun
 

Balànsa 23 setémbre - 22 otóbre
Grassie a Saturno in Garda, te riussirè a vìnsar a briscola co'un to amìgo che par quanto fusse orbo g'a sempre avù cul nel zugo. El pianeta pol sistemàrte i problemi in faméia anca co' parenti che no te vedi da vint'ani, visto che to cusìn che l'è drio a crepàr l'è pién de schèi. Te pol cromparte casa a marso, i mobili d'arte a Zaréa a lùio e visto che gh'è Giove in trigono te pol nar a starghe a decémbre. Voia de laoràr sàlteme 'dosso... fin a noémbre, nel mese de decémbre te pol scominsiàr a laoràr par far schéi nel 2037.

genàr * *
febràr * *
marso * * *
aprìl * *
màio * * *
dugno * * *
luio * * *
agosto * *
setémbre * * *
otobre * * *
noémbre * * *
decémbre * * * *
colór: téra giàla de la Valdonega
 

Scarpión 23 otóbre - 22 noémbre
Te gh'è voia de stàr da par ti sensa nissuni che te rompa le bàle, cossìta te pensi de far un mese ne l'Eremo dei Camaldolesi a Garda o a montàr una barca a vela in garage co' i 85452 tóchi catà sul giornàl del fa da ti. El laóro manuàl pol darte sodisfassión ma no in amór parché te pol deventàr òrbo. Urano pol zontàr sfiga a sfiga, no te riussìrè a destacàr gnanca el fèr dai sòcoli dèl cavàl par tacàrlo sóra a la porta.

genàr *
febràr *
marso * * *
aprìl * *
màio * * *
dugno * *
luio * * *
agosto * *
setémbre * * *
otobre * *
noémbre * * *
decémbre *
colór: bianco Custosa
 

Cavalón 23 noémbre - 21 decémbre
Grassie a Saturno e Giove, el Cavalón a fine ano podarà vìnsar al SuperEnaloto sensa zugàr la schedina, ma da genàr a otobre no faséndo un càsso, g'avarà la possibilità de no catàr su un càsso. In amór gnénte de nóvo, ci l'è sposà da vint'ani oramai l'è rassegnà e ci l'è da par lu/éla l'è rassegnà. Salute, mèio béar un bèl bicèr de graspa par desmentegàr tuto, ma te vegnarè fermà dai Carabinieri e te perdarè anca la patente.

genàr *
febràr *
marso * *
aprìl * *
màio * *
dugno * *
luio *
agosto * *
setémbre *
otobre *
noémbre * * * *
decémbre * * * *
colór: Adese verde-griso
 

Cavrón 22 decémbre - 20 genàr
Plutón in Cavrón par altri tri ani, in póche parole no cambia gnénte.. in amór o nel laóro. Ogni ano da setémbre a decémbre g'avì la speransa che co' l'ano nóvo, le cose le vaga al mèio, cossìta ghe sarà la tentassión de far nóe 'spariense come cusinàr la Pearà co' la Caponada Siciliana, ma ci vive sperando móre cag....

genàr *
febràr * *
marso * *
aprìl * *
màio * *
dugno * *
luio * *
agosto * *
setémbre * * * *
otobre * * * *
noémbre * * * *
decémbre * * * *
colór: Pastissada de cavàl

Garda 21 genàr - 19 febràr
Saturno passa dal Garda fin a marso, pol darte quel urtón par finìr le cose lassà a metà. Se te magni una pasta e fasói te speri de nar su Saturno, ma forsi, l'è tanto se te parti da Vilafranca e te rivi a Malpensa. In amór grassie a Giove, a fine ano, te catarè el to òmo/dòna dei sogni, basta oltàr el galón e seitàr a ronchesàr. Salute, co' tuti i asterischi ne le analisi, 'sa vuto che te diga?

genàr *
febràr * *
marso * * *
aprìl * *
màio *
dugno * *
luio * * *
agosto * *
setémbre *
otobre * *
noémbre * *
decémbre * * * *
colór: Pandoro
 

Àole 20 febràr - 20 marso
Netùn ne le Àole fin al 2026, podì far tuto quél che volì, anca el base jumping dal ponte de Veja co' l'àstico de le mudande o sgolàr co' un parapendio sbuso dai Colonei de Cavrìn. In amór, nel laóro e nela vita va tuto ben, ma volì sempre piassé, cossìta sbregarè la schedina del SuperEnalóto che podéa darVe 'na man a finìr el mutuo de la casa in pié da 20 ani.

genàr * * *
febràr * * * *
marso * * *
aprìl * * *
màio * * * *
dugno * * *
luio * * *
agosto * * * *
setémbre * * *
otobre * * *
noémbre * * *
decémbre * * * *
colór: maron de San Mauro