Cari Veronesi, vissini e lontani, nel mondo. El 2024 par La Rena Domila l'è stà l'ano de la rinàssita, dopo 25 ani l'è stà fato su da nóvo el vècio sito. Questo parché par un discorso tecnico e de sicuressa no se podéa più nar 'vanti. Grassie a Luca e Nicolò che co' tanta passiensa e professionalità iè riussì a dar 'na grossa man, ma el can no móe la cóa par gnénte. Un sacrificio economico no da póco se tegnémo conto che La Rena Domìla no g'a entrade. Ma cosa podévimo far? Butàr via 25 ani de laóro? Parò el sito l'è stà sgrandà e sistemà nei so contenuti, quindi va bén cossita, no lamentemose.
Lamenti che lesémo sui social contro el sindaco de Verona, a òlte parolasse, come se quéi che iè vegnù prima i g'a fato piassè. La stéla de 'Nadal in Bra co' "luçi laser" come in Goldrake e i Banchéti in Via Balón (Pallone). Nel primo caso l'è colpa de ci gestisse la cosa, i veronesi confonde la Fondassion Verona par l'Arena co' la Fondassion Arena sensa contàr la Sovraintendensa che dopo che s'a sbecà i gradoni de la rena un par de ani fa, la g'a dito che cossita no se pol nar più vanti. Ma la la solussión de la Giunta no l'è stà de le più bèle. Mèio sensa la stéla o la stéla sensa cóa o la cóa de luçe? Se tegnémo conto che quarant'ani fa, la stéla l'éra solo un mùcio de fèr rùseno, nel 2024 l'è deventà el simbolo del Nadàl a Verona. i veronesi l'è da un par de ani che, i ghe ne dise de còte e de crue al Sindaco.
Si l'è véra, a 'òlte l'è pèso el tacón del bùso, ma le parolasse no va bén! Par motivi de sicuressa anca el marcà de Nadàl de Norimberga, che de Norimberga gh'éra póco, gh'è stà un vero tiro al bersajo al Sindaco. Par motivi de sicuressa iè stè spostè da PIassa Dante a Via Balón in onór del sindaco zugadór secondo el veronese medio. Nissuni g'a pensà che par nar da Piassa Bra ai marcà de Piassa Dante, i turisti e i veronesi, i faséa la stéssa strada, imbugando Via Nóa. Daltronde i turisti i g'a in mente solo el balcón de Giulieta e i veronesi i g'a in mente solo le salamèle in quéi giorni. I botegàri ani fa, infufè, parché no i podéa gnanca nar in botéga dal casìn, tanto che, gh'éra i vigili pronti al senso unico pedonàl. I Veronesi i g'a la memoria curta. Sicuressa che no dipende dal Sindaco ma da le Autorità de Stato. Ma el marcà tacà a le mura storiche de la çità no se podéa védar.
Parfìn ci g'avéa el banchéto s'a lamentà che faséa piassè schèi in Piassa Dante. Pecà che un panéto co' la salamèla st'ano costàva piassè e quindi co' la crisi, tanti veronesi i g'a preferì nar a magnarse 'na pissa al caldo e sentè pitosto che in pié e al fredo. El problema l'è che prima de sparàr contro un qualsiasi Sindaco bisognarìa savér la verità. Ma da quando gh'è Feisbuc l'è saltà fóra una nóa specie, quéla del león da tastiera, pronto a sparàr ofése e parolasse. Par quanto te g'àbi rasón, le parolasse no le va mai bén, mèio una critica fata bén, una proposta che se pól realisàr co' póchi schèi. Tanti veronesi i farìa fadìga a gestìr una riunión de condominio, figuremose una çità da piassè de 250 mila abitanti! Par i veronesi sempre in guéra, ghe disémo che, par el 2025, l'è mèio darse da far par el prossimo, de pensàr a la salute, ai familiari e soratuto de farse i cassi propi se no iè boni de dar solussioni, se vive mèio. Bon 2025.(El Diretór 31.12.2024)
