L'è sgolà un balón par piassè de 600 km.
Se scrivémo dó righe su un tòco de carta magari a forma de cór e ghe'l lighémo con un spaghéto a un balon bèlo s-giónfo dopo avérghe supià drénto, ne rèsta che spetàr un fià de vénto par védarlo sgolàr in ciél. Ghe ci scrive un desiderio co' la speransa che nostro Signór ghe daga una man a realisàrlo, ghe ci invéçe vol festegiàr una giornàda che no la deve èssar desmentegà molando un balòn fin a le stéle, come sucesso ne l'asilo de St.Albert a Friburgo in Brisgovia ne la lontàna Germania póchi mesi fa, par i 50 ani de la scóla.
Dopo piassè de 500 km el balón l'è finido sóra ai spini de stupacui a Erbéso e catà dal nostro Diretór in uno dei so giri a pié del fine stimàna. Cossìta dopo la tradussión dal todesco a l'italiàn émo pensà de çercàr su internet qual asilo podéa festegiàr 50 ani a Sant'Albert e l'è saltà fóra la çità de Friburgo. Staolta el vostro Diretór el g'a scrìto a la responsabile in todésco e la risposta che tradusémo l'è stà: "Si sémo noàntri, l'è sgolà lontàn, ghe'l digo subito ai butìni, la speransa l'è che te g'àbi passà una bela giornada, un strucón da tuti noàntri!" A 'òlta basta póco par èssar contenti un sorìso, un strucón e un balón! (La Redassion 25.10.2021)