El 6 de agosto del 844 d.C. Ireneo Pacifico, arcidiacono de la Catedràl de Verona ma anca architeto, paleografo, matematico e teologo, de origini longobarde, nato forsi a Quinsàn, el g'a fato consacràr da Itiprando, un vescovo che'l visitava Verona in compagnia de l'imperadór 
Lotario, la cèsa dedicà a S.Alessandro ai pié del monte Cavro; dedica confermà nel 1140 dal vescovo Tebaldo che parò el diséa che fasesse parte del vissìn monastero de San Martìn de Àesa e no al Capitolo dei Canonici de la Catedràl veronese.
Ma quando fra el 1478 e 'l 1480, Verona el g'a subì una bruta pestilensa, s'a volù far una processión el 16 de agosto ne la ricorensa de S.Roco, protetór contro la peste, da la pieve longobarda de S.Gioàni in Val a la césa de Sant'Alessandro, che da quél giorno l'è stà dedicà propio al Santo da Monpelliér. L'iconografia de 'sto santo che tién d'òcio el portàl de ingresso, el vién rapresentà con i simboli tipici del pelégrìn come el bastón, tabàr, capèl, boràcia e 'na capasanta de Giacomo de Compostela.
A 'sto oratorio se pól rivàrghe grassie a 'na scalinada magnà e intaià ne la prèa de la colìna co' da le parte le marogne tirè su con el stésso materiàl dei teràssi che gh'è lì tachè. Dopo la famosa processión, el santuario de San Roco l'è stà visità tante e tante òlte e par le numaróse ofèrte tiré su, la "Magnifica çità de Verona" la g'a dimandà al Capitolo de la Catedràl che l'éra deventà el parón de le Césa, el "giuspatronado", co' l'òbligo de butarla zò e de fàrla su da nóvo ma piassè granda sensa desmentegarse de métarghe tuto quél che serve par celebràr la Messa e de artistico-sacro, zontandoghe anca la casa par el custode. L'ato publico co' la concessión dei Canonici al Comùn de Verona l'è stà el 19 luio 1486 par man del notaio Bartolomeo Della Corte.
La zénte del Comùn de Quinsàn par paura che la césa la podésse seràr par le bèghe tra Stato e "Chiesa", la g'a dimandà al Capitolo e al Municipio de Verona de ciaparla in gestión, cossita el 30 de maio 1878 San Roco l'è passà in man del Muniçipio de Quinsàn restandoghe fin al 
17 febràr 1927, quando i Comuni tacà a la çità iè deventè frassioni del Comùn de Verona. Grassie a le òferte dei fedeli la césa de San Roco l'è stà sistemà, slargando le porte, piturando le tribune, costruendo la cantorìa e sbianchesando i muri de drénto e in particolàr quéi de fóra a righe de finto quarél e piéra galìna, sensa desemntegarse de spianàr el piassàl e de farghe diése scalini davanti al portón e çinque par davanti la portesìna de fiànco. I laori iè stà veramente tanti.
Dal pónto de vista artistico, drénto la césa, co' una solo navàda longa 36 metri e larga 11 metri, catémo çinque altàri, quél piassè grando el g'a da le parte, do cantorìe del çinquecénto tegnù su, da le colonéte in marmo rosso co' arcàde gotiche; drénto gh'è du "trìtici" che i va a riciamàr quéi de la Basilica de San Zén del Mantegna, in uno gh'è la Natività co' San Roco in adorassión del Butìn, San Bastiàn e San Martìn, invésse ne l'altro catémo la Madona co' Butìn, Sant'Alessandro e San Roco. Su l’altàr magiór catémo un dipinto de Francesco Bragaglia co' la Vergine e 'l Butìn, San Roco, Sant’Alessandro e San Bestiàn. A metà césa, podémo catàr anca una pala co' San Francesco, San Piéro, sant’Alessandro e la Beata Vergine col Butìn in Gloria che secondo la tradissión ne fa védar come l'éra la prima costrussión.
Da l'altra parte un altàr con una tela del 1588 de la Scòla de Claudio Ridolfi co' San Piéro Martire Veronese, Santa Veridiana e Sant’Antonio Abate. Tra le curiosità segnalémo l'iscrissión in latìn de un tochetìn de lapide de epoca romana, ne l'ingresso che gh'è de fianco, MARCIAE / VXO / MARC. dedicà a Marcia moiér de Marco. Defàti el nome Quinsàn podarìa 'vérghe origini romane, forsi vegnér da 'na faméia romana "gens" Quinzi, o forsi da la distansa dal foro romàn de Piassa Erbe, el quinto méjo romàn (7km e mèso); el paese de "Quintianum" se catàva, 
'ndóe 'dèsso gh'è, la piassa San Valéntìn (a nord de Quinsàn) anca se, de case ghe n'éra fin a San Ròco.
Una césa da visitàr de drénto e soratuto de fóra, vardando quél che resta de la campagna veronese mastegà da le costrussioni che pian pian iè sempre più tachè a la césa.