Quando l'è nata Verona?
La çità de Verona no l'è nata in pianura ma precisamente ne la zona 'ndóe gh'è l'atuàl Castèl San Piéro a sanca de l'Àdese par òpera dei "Galli" e dei "Veneti" 'ndoe i avéa creado el primo insediamento. Nel II sec.a.C. i romani i g'à pensà lóri, conquistando la çità e i teritori vissini. Nel 49 a.C. Verona deventa municipio romàn, e la çità l'à scominçià la só espansión. Sóra la colina l'éra stà costruida l'arx (la roca), pìù in 
basso el Teatro Romàn e tuto intorno le mura e l'è stà zontà un ponte nóo vissìn quél in legno de drio ala Césa de Santa 'Nastasia con el nome de Postumio. Col tempo i Romani, come in altre çità i g'a realisado numerose òpere de ingegneria idraulica par portàr l'aqua potabile ala zénte. Cossìta la çità la s'a sgrandà, secondo un criterio urbanistico che se ispirava ai 'campamenti militari cioè su un impianto base costituido da du grandi viai incrosadi a 90° caimà "Cardo e Decumano". Nel caso de Verona el Decumano l'era rapresentado dale odierne Corso Portoni Borsari e Corso Santa 'Nastàsia, mentre el Cardo l'éra rapresentà dale odierne Via Leoni, via Capèl, Piassa Erbe, vicolo Monte e via San Egidio. Al'intersecassión se catàa el "foro" ndóe gh'éra el cór 'conomico, politico e religioso de la çità. El lato sud l'era stà serà con mura bele alte riforsandole con tóri a destra de l'Adese in corispondensa del Ponte dela Vitoria fin al Ponte Navi (tacò a S.Fermo). L'ingresso l'éra consentido dale dó porte: Porta Borsari a Sud e Porta Leoni a Est. Nel 489 d.C. Teodorico re d'Italia, l'à fato costruìr altre mura che le seguiva el percorso del'Adeséto, slargandose a est dela çità, piegando vèrso San Zen in Monte e proseguendo inglobando la Roca e lassando fora la cèsa de San Stefano. Sul col de S.Piero, Re Teodorico l'à rinforsado le mura e al'interno el l'à fato costruir inoltre, la Césa de S.Piéro in Castèl. Nei secoli sucessivi i Scaligeri ià dovudo sgrandàr la çinta muraria 'isto l'espansión dela çità e raforsando così la rocaforte militàr e nel 1390 Gian Galeasso Visconti l'à fato costruir a nord dela Roca, Castèl S.Feliçe dito anca Castel Nóvo cambiando el nome così de quél de San Martin in Aquaro in Castèl Vècio. Al'inissio del XIX secolo tuta la zona de Castèl S.Feliçe e la césa de Castèl S.Piéro l'è stada spacà su dai Francesi prima de darghe el teritorio ai Austriaci. Questi ultimi i g'a rinforsado tute le fortificassioni in colina, sia Castèl S.Piéro che Castèl S.Feliçe tanto che nel 2000 se pól 'edarle nel so splendór.
Probabile origine del toponimo Verona
Secondi alcuni studiosi, la Verona colinàr l'è stà fondà nel'età del bronso dal popolo dei Euganei (unidi ai Liguri). Sucessivamente jè subentradi i Veneti vegnudi dal' Asia minór tra el XIII e XII Secolo a.C. nel'àmbito dele migrassioni dei "popoli del mar". I Veneti i éra penetradi dal'Illiria par via mar, spostando i Euganei verso le Alpi. Inveçe i Reti de origine etrusca, probabili inissiadori in Valpolesèla dela produssión del vin "Recioto", i s'à posissionà sucessivamente a Verona ne la cura del' Adese dove l'è stà fondà la Verona Romana. In epoca preromana i Etruschi i era presenti anca a Verona ma col tempo paradi via dal' Italia setentrionàl par le ripetude invasioni dei "Galli". Da ricordàr anca insediamenti dei "Galli Cenomani" in bóni raporti coi Veneti nela destra de l'Àdese e fórsi in Lessinia. Con i Romani el flusso de nóvi popoli vèrso Verona no'l finisse. Col tempo i fa comparsa anca i popoli dei "Magiari" e dei "Unni". Dunque, l'Àdese insieme con el còl S.Piéro e la val de séto, i g'a dato el via lìbara ala fondassión dela nostra çità. Numaròsi studiosi i dise che el toponimo Verona el sia de origine Etrusca parché la raìsa silabica VE la dovarìa far riferimento ale popolassioni Venete sul còl S.Piéro, la raisa silabica RO dovarìa vegnér dal verbo greco reo (scorro) che caraterisa molti antichi toponomi de fiumi e de çità nate sule rive de fiumi (in alcune çità l'è RE) mentre nela raìsa silabica NA se intravede el significado etrusco de çentro abitato. In pratica Verona l'è "la çità dei Veneti sul grande fiume".