Curiosità da l'epoca romana a quela scaligera.
In questa scheda, tante iè le curiosità, le mura de la çità, la storia dei Scaligeri, Giulieta e Romeo e la Verona Jerusalem. Se parte da la storia romana passando piàn piàn par miti e fole par finìr el viàio ne la femèja Scaligera. Con domila ani de storia gh'è tanto da contarVe, questa l'è solo una guida che pol èssarVe d'aiuto par scominsiàr le Vostre riçerche, almanco g'avì un idea. Un salto podì farlo in bilioteca civica o quela capitolàr, de libri ghe n'è e de valór. Buta un òcio a la scheda...
Le mura
Le prime mura costruide i è sta in epoca romana (prima metà del I sec.a.C.). Le partìa da la riva sinistra de l'Adese arente al'Arx (antico edificio romano 'ndóe 'dèsso gh'è el Castèl S.Piéro). Dal punto più alto de la colina, partìa le mura, una a ponente del ponte Piéra e l'altro a levante del ponte Postumio.
Se pól notàr ancora Porta Leoni, Porta Borsàri (Porta Iovia) e segni de mura de via Diaz e via Leoncino. Nel 265, Galieno par diféndar la çità dai Barbari, l'avéa costruì altre mura così da riparàr anca La Rena. Tòchi e resti de ste mura se pòl 'edarle ancora de drio a La Rena, Via Diaz, via Cantore e in vicolo San Mateo.
Mura romane rifate anca da Teodorico (vedi iconografia Rateriana). Nel XI sec. re Arduino l'avéa fato costruir el vecio muro de Campo Marso. Nel XII sec. altre mura le partìa dal ponte Castèlvècio andando verso via Adeséto finendo vissin al Ponte Aleardi. Sucessivamente rafforsade da Eselìn da Romàn. In epoca Scaligera Alberto e Cangrande dela Scala iè riussì a sgrandàr el perimetro difensivo comunàl e infine Gian Galeazzo Visconti l'à costruido la Citadela e rinforsà Castèl Teodorico con diése tóri colegandolo con le mura de Cangrande.
La storia d'amor più famosa al mondo
Giulieta e Romeo, i era du butèi che i se voléa gran ben, ma le do fameje quela dei Capuleti (Giulieta) e quela dei Monteci (Romeo), no le se vedéa de bon ocio par via de vece storie e no le voléa che sti du inamoradi i se frequentasse. A la fine Giulieta e Romeo iè morti nel tentativo de realisàr el sò sogno.
Questa storia la vien posissionà intorno al 1303, quando gh'era Bartolomeo I dela Scala capitàn del popolo, che'l çercava de calmàr i animi de le fameje pìù potenti de Verona.
L'è stà tentà de conbinàr un matrimonio ma el Conte Sauro Capuleti l' morto par man de un Monteci (Montecchi).
El fiume de sangue de quéle fameje, el vien citado parfin da Dante. Nel 1320 i Monteci i ghe voléa mal a Cangrande e par sto motivo i è stà esiliadi a Udine. William Shakespeare (Uiliam Scecspir), l'à ciapà ispirassión par el famoso romanso conossudo in tuto el mondo.
Sémo sicuri che Sèspir no sia de origini siciliane? La teoria Crollalanza la dise che Michelangelo Florio, el pare del più famoso John, fusse de origini siciliane, e che la moiér se ciamasse Guglielmina Crollalanza.
Emigrà in Inghiltera, el g'a scominçià a scrìvar i "drammi" che ani dopo se credéa de Uiliàm, tradusendo el nome de Guglielmina Crollalanza in William Shakespeare. Ma parché Michelangelo Florio el g'a tradoto el nome de la moiér e no el so personàl? Boh, no se sà...
In verità, storie come queste le gh'éra ne l'antica Grecia de Senofonte Efesio o anca ne la storia de Piramo e Tisbe, da “Le metamorfosi” di Ovidio, Nel 1476 gh'émo la noèla de “Mariotto e Ganozza” de Masuccio Salernitano; el vesentìn Luigi da Porto el g'a publicà nel 1530 “Historia novellamente ritrovata di due nobili amanti” ambientà a Verona. La versión che ghe soméia piassè de tute a quéla de Sèspir, l'è quéla del 1554 de Matteo Bandello.
Verona come in Palestina
Cosa pol çentràr la nostra çità con Gerusaleme? Al Ritorno da le Crociade, se parla de 600-700 ani fa....i reduci i-avéa pensà de ciamàr alcuni punti çitadini con nomi de loghi Sacri dela Tera Santa. Tra Castel S.Piero e la Fontana de Fero gh'è la ceséta de S.Maria de Nazareth, 'ndoe gh'è l'istituto Don Calabria gh'è la ceséta de S.Maria in Betleme (el nome atuàl dela zona l'è S.Zen in monte), el S.Sepolcro l'è 'ndóe gh'è la césa de S.Toscana a Porta Vescovo, el Monte Calvario l'era sóra a Quinsàn (Monte Cavro) mentre el Monte Oliveto l'è 'ndóe gh'è la césa dela SS. Trinità.
Nel "Sigilo" çitadìn del 1439 vién ricordà adiritura che Verona l'era una "Gerusaleme minore". Par molti Verona l'è una Roma piassè picenina, altri i dise Firense, ma podémo dir anca Gerusaleme!