Secondo el "Dietrich von Bern-Forum" 'ndóe i piassè grandi studiosi i se cata par ciacolàr de storia e de le antiche fòle "epiche" de la leteradura todesca, i ne dise che, el storico Dietrich de Berna l'è stà Re de Bonn, Verona e Berna sul Reno, ma no g'a a che far co' el famoso italico "Teodorico el grande" Re dei Ostrogoti, nato a tòrno al 453 d.C. come sempre pensà par cólpa de le fòle tramandà de pàre in fiòl. Bisón capìr quando e come i g'a fato la fusión ne l'Alto Medioevo.
El re franco Teodorico I (Merovingi, 485 - 534 d.C.) e so fiól Teodoberto I, iè le figure de riferimento originali par Dietrich de Berna. Tuti e du i re i g'avéa le tère a Colonia e a Bonn nel VI secolo. Defàti l'antica "saga" norrena Þiðrekssaga af Bern del XIII secolo, se lése la storia dei so eroi, ne la Franconia orientàl, nel a Bassa Germania e nel Baltico. I Annales Quedlinburgensis, scriti ne la Bassa Germania, i ne dise che gh'éra “Ermanarico”, che sarìa vissudo nel V e VI secolo. Gh'è anca una cronaca de Dietrich von Bern ne l'antica léngua svedese . Ne la saga de l'Antico Nord, Ermanarico l'è el re de Roma, o mèio, Roma secunda Treviri o Roma del Nord co' la so Porta Nigra che noàntri savémo fondà da Augusto.
El Duca Bartoldo V de Zähringen secondo quel dito dai vèci, el g'a ciamà una çitàdina Svissera co' el nome de Bern o Berne par ricordàr le fòle de Teodorico da Verona (Dietrich von Bern), anca se, come émo visto no l'éra la stessa persona. Storia fórsi fantasiosa, i dise che ghe piaséa sparàr a i orsi e come trofeo el ghe l'a messo come simbolo de la çità, altri i ne dise che vién dal celtico "fessura" come ne dimostra un iscrissión de zinco catà nel 1980.
In poche parole, l'antico nome todesco de Verona l'è Bern o Wälsch-Bern o Welschbern. La zonta la servéa par no ciamàrla come la çità de Berna che ancó catémo in Svissera, ciamà in latìn anca Verona.il cui nome latino è anche Verona. 
Ma a parte questo, Teodorico l'è scolpido su la fassàda de la nostra Basilica de San Zén co' la so "Cavalcada infernàl" che ve invitémo a vardàr de parsona. Ma alóra cosa çéntra Berna co' Verona? Bern l'éra el nome de la çità de Verona in medio alto todesco. Secondo el studioso Karl Weinand: "Verona l'è el nome latinisà de Berna, come ne dise documenti, monede e un timbro de çèra de la çità. Le vèce fòle o mèio conossù come saghe, le ne dise Berna. Da la fusión de Bonn e Verona nasse Berna=Bonn. Quando ne l'alto medioevo parlémo de Berna, fémo riferimento a Verona. La çità todesca de Bonn fin al XIV secolo se ciamava Verona e sóra 'na medàia del 1244 catémo una cosa incredibile; in mèso gh'è San Cassio, sóto un baldachìn co' ai pié 'na bestia-mostro.
Ne la man a sanca, el Santo tién su 'n scudo con un aquila. Ne la man destra, San Cassio tién una lansa. Sul sfondo, se vede çinque tóri de la Basilica minor de Bonn, un tempo dedicà a San Cassio, po', a San Cassio e a San Fiorenzo, e, ancó, a San Martìn". Par finìr secondo el studioso: "la scrita latina, su la parte esterna de la medaia l'è importante, visto quél che gh'è scrito. SIGILLVM· ANTIQUE· VERONE· NVNC· OPPIDI· BVNNENSIS“, che vol dir, sigil de l’antica Verona, ora, çità de Bonn".
Nel X secolo, una “Passio sanctorum Gereonis, Victoris, Cassii et Florentii Thebaeorum martyrum:” ne dise de "Veronam civitatem in ripa Rheni fluminis", la çità di Verona, su la riva del fiume Reno.
Nel X secolo, un documento ne dise de una “tabula” d’altàr, ne l’antica Césa de San Pantaleón a Colonia, costruida, sóra una vila romana, che g'avéa scrito; “Volcmarus ... Veronae tabulam radienati scemate claram fecit". Sóra un episcopàl del X secolo, gh'è scrito: "Everacus cisalpinae Veronae praeposistus, quae Bunna dicitur (MGH SS 7, p. 201): in questo caso, se dise calcossa de Verona e soratuto che gh'è una seconda Verona "Everaco governadór de Verona Cisalpina, ciamà Bunna". Gh'è anca monede de la "Verona renana L'arcivescovo Pil(i)grim de Colonia (1021-1036) el g'a fato bàtar i denari, con la scrita marginàl "FERONA", (la F l'è la V). Anca ne le parole scrite 'De Reginhardo' nel secolo XI, catémo la frase “apud Veronam, quae usitatius Bunna vocitatur” (MGH SS 7, p. 209), Verona volgarmente ciamà Bunna. Se pensémo che par i Cimbri, Verona se ciamàva Bearn, no gh'è altro da dir.
Una fòla deventà storia come quéla de Tomaso da Vico co' el carneàl e de Giuliéta co' el balcón. Fòrsi un giorno, se capirà la verità, anca se, a òlte l'è piassè bèla la fantasia, che scónde le magagne e le guère.