La Rena e Teatro Romàn.
Domila ani fa iè passàdi i romani da Verona lassàndone una bela eredità de monumenti, come la rena e i resti del teatro romàn sensa contàr el ponte piéra e l'arco dei Gavi. Volémo capìr parò, quanto i era grandi in origine e quante persone le podéa tegnér el teatro e l'anfiteatro. Piassè de vintimila persone i era presenti drénto la rena, un bel nùmaro par el tempo, che pol farne pensàr l'importansa strategica de la nostra çità.
La Rena
El nome Rena el deriva dal latin, che vól dir sabia. La Rena l'era posissionada fóra da le mura çitadine, ma nel 265 d.C. Galieno el l'avéa inglobà 
nela recinsión muraria. L'anfiteatro l'è stà fato co' 'olte ben rotondà e muri radiali che i se slarga a onda e i finisse al'esterno con 3 arcade, una sóra l'altra. In caso de àqua a sece roèrse, gh'éra 'na canalèta che le menàva passando soto stradón Mafei nel' Adese. In marmo de le cave de S.Ambroso de Valpolesèla, l'è el terso anfiteatro romàn par via de grandessa dopo Roma e Capua. Ancó la circonferensa esterna l'è de 391 m, na 'olta l'éra 435 m. Ogni piàn el gà 72 arcade su 73 pilastri. El terso anèl l'è croà nel 1117 par un teremoto. Ospitava ben 30.000 persone e podéa èssar quertà in caso de sól león In epoca romana l'éra usada par combatimenti tra gladiatori e lote tra bestie catìe che vegnéa dal'Africa. In epoca scaligera, Alberto dela scala l'avéa usado dei gradoni par rinforsàr le mura citadine, così la rena l'éra deventà 'na cava de marmo, baracopoli e sito 'ndoe butàr materiàl de scavo. Nel 1913 la prima rapresentassion lirica de l'Aida. schema: a: misurassion assi in metri (esterno) b:misurassion assi in metri (interno) c:altessa Rena in metri a 3 piani e 2 piani (atuàl).
Teatro romàn
Prima de costruìr el teatro, gh'éra sta fato un àrzaro su l'Adese vissin a la sèna e una bèla busa par stacàr da la colina la gradinada. Col 
materiàl ricavado dal scavo i romani che no i-era insemenìdi i g'a fato el teatro. La parte sènica l'éra costituida da postsènio, frontesèna e prosènio che se alsava sul piàn del'orchestra da 'ndóe el se destacàva dala fossa sènica profonda 1,40 m. De la sèna davanti se pól notàr ancora la metà de sinistra. 'Na 'olta l'éra divisa in tre buséte: una in meso bèla profonda e du più picenine de fianco retangolari. El spassio par l'orchestra, el coro e dela dansa el gavea un diametro de 30 metri. Al'inissio dela gradinada sóra ale entrade che gh'éra dale parti te podei catàr i tribunalia che i era i posti d'onór (poltronissime). La gradinada çentràl superiore l'éra sostegnuda da muri rotondadi con 'olte in conglomerado. De fóra se vedéa tri stili diversi: ionico, tuscanico e 'n altro pì elaborado. La parte de soto dela gradinada (ima cavea) l'éra divisa in sié setori con çinque scaléte. La parte de sóra, drénto al teatro, l'era rifinìa da 'na galeria. El Teatro l'era alto trenta metri. foto: Incisión del XVIII secolo del Teatro. Come el dovéa presentarse ai tempi dei romani.