PRESSANA
Popolassión: 2.512 Altessa: 19 metri sóra el livèl del mar Superfice: 17,39 chilometri quadri Comùni confinanti: Roarédo de Guà, Minerbe, Veronèla, Cologna veneta, Montagnana PD
A Pressana l’òmo l'éra presente fin dal Neolitico Antico (fine del V millennio a.C.) come ne dimostra i strumenti litici recuperadi in località S.Agata. De l'Età del Rame l'è da segnalàr una lama dopia fassàda in folenda, lónga oto schèi catada nel Fondo Meloto. Nel teritorio de Casele una serie de ritrovamenti ne porta a conossensa de la probabile esistensa de un insediamento umàn riferibile a l'Età del Bronso mentre un bèl siguréto con aléte in brónso catà nel Fondo Graziadio i dise el sia de l'Età del Fero. Sempre in località S.Agata jè stà recuperade de le tombe con drénto roba de un coredo funebre de tipo celtico e ne la stessa necropoli jè vegnude a la luçe monete romane de epoca republicana. Questi jè solo un pochi de esempi de quél che l'è stà recuperado, ma l'è solo par farve capir quanto l'è stà importante Pressana par l'òmo.
Ai tempi dei Romani la strada consolar Emilia-Altinate che partendo da la via Emilia e passando par Montagnana la menàva in diressión Altino e Aquileia la vegnéa unida a la Via Postumia grassie a la costrussión de la Via Porciliana o Via Imperialis che da San Martìn bòn Albergo la passava par Porcile (anticam. Belfiór), Veronèla e Pressana. Cesare Otavian Augusto dopo avér vinto contro Cesare e Cleopatra a Azio nel setembre del 31 a.C. l'avéa deciso de farse valér su i abitanti con nove regole, espropiando i teréni (ànca bonificandoli) e regalandoli ai fedeli soldà veterani, reduci da le batàje. Uno tra i reperti più importanti l'è conservado nel Municipio del paese, un bèl "cippo funebre" con rapresentà un òmo togà con un bisso tacà li arènte. Con la piéna de l'Àdese e la conseguente "rotta della Cucca" antica denominasion de Veronèla, ne l'autuno 589 d.C. tuta la pianura veronese l'è stà modificada brutalmente, compreso el teritorio de Pressana. In documenti antichi de epoca longobarda (569–774 d.C.) vien citada una "Sculdascia" ente teritoriàl aministrativo e un "Fluminis Novi" Fiume Novo, conossù come Guà che da la fonte fin a Montecio Magior se ciama Agno (Corso d’aqua= latin amnis), poi Guà (forse dal latin aguatus = aquatus = impaludà) o Fiume Novo da Lonigo fino a Roveredo de Guà e infine Frassine nel Montagnanese. Da precisàr che da Zimèla a Roveredo el vien ciamà Canàl. Inveçe el Frata (Fratta) el nasse ai pié de la Lessinia col nome de Togna fin a Zimèla, cambiando in Fossa (latin fodio = scavare) fin a loc.Sabión e par ultimo Frata. Sia el Frata che 'l Frassine i deriva dal latin "frango" rotta.
Un documento del 8 marso 1036 el parla de la donassión al monastero de San Nazario e Celso de Verona da parte del Vescovo Gioàni de numarosi teritori tra cui quél de Pressana, avudi in regal da l'imperadór Corrado II. Nel periodo medievàl da sótolinear la presensa de Eselìn da Romàn, dei Estensi e par ultimi i Scaligeri con case brusè, riolte e violenti scontri. Anticamente a Gazo de Pressana, gh'éra la presensa de un "ospitale" gestido da l'ordine ospedalièr dei Cavalieri de San Gioàni Batista de Rodi. Nei documenti antichi, l’ospedàl el vegnéa denominado “mansio jerosolimitana”, un albergo de assistensa par i pelegrini che durante i secoli XII–XIV, i andava par la via Porcilana da Verona a Venessia o viceversa, per imbarcàrse par Gerusaleme par visitàr el Santo Sepolcro. Questa “mansio” l'éra a una giornada de viaio da Verona e l'éra utile par cambiàr i cavài, sponsar e avérghe un poca de assistensa. Con l'avansada islamica, i viagi in Terasanta i éra sempre de manco e così l'è scomincià l'investimento dei nobili venessiani in propietà locali, trasformando così, l'importante ospedàl in azienda agricola.
Prima de entràr parò nel periodo Venessian, da sótolinear ànca la guera del 23 dugno 1404 tra la Serenissima e i Carraresi che i g'à tacà fogo prima de scapàr da Cologna Veneta che l'aministrava ànca el teritorio de Pressana. Sóto el Dogado venessiàn (Venessia+località costiere) parte le opere de bonifica, l'agricoltura e l'artigianado con la produssion de canapa e seda in più autonomia e contról su le aque. Finido el periodo de la Serenissima i s'à alternado i francesi che i g'a portado solo rogne e tasse con numarosi sachegi da parte del popolo ormai stufo e stremà e i austriaci che i à rilanciado l'economia che l'andarà avanti bén ànca sóto el Regno d'Italia fin al 1882 l'ano de la famoso piéna del' Àdese che l'à messo in zenocio la poro zente costreta a emigràr in 'Merica. Par ci ghe piase le curiosità, Pressana l'è comparsa par la prima 'òlta su 'n documento del 903 e sembrarìa che 'l so nome de origine romana el possa derivàr da Persana de Persus nome de persona propietaria de un "fondo". Tra le vile del paese, da visitàr el complesso Querini (antica faméja venessiàna che la gavéa tra i possedimenti le isole Egee de Amorgòs e Astipale) composto da do vile; Vila Persa o Querini-Stampalia con corte, magnifico oratorio con drénto l'afresco de la Madona col butin de Gioàni Maria Falconetto, un pósso con architrave del '500 e caraterisada da le barchesse rinassimentàli e da la merladura ghibelina, mentre a fianco gh'è Vila Gaudio del '600. Da segnalàr Vila Grimani, con lòsa e du tóri, Vila Cainaqua e Villa Gobetti ne la contrà Casele. Tra le cése, gh'è da segnalàr l'importante Césa Vecia o ex-parochiàl de origine alto-medievàl, in antichità intitolada al’Anunciassion de Maria mentre contitolare l'éra San Michel Arcangelo, con campanìl del 1597 de Dòminico Vanzonetto.
