POIÀN - POÉIÀN (Povegliano Veronese)
Popolassión: 7.113 Altessa: 47 metri sóra el livèl del mar Superfice: 18,53 chilometri quadri Comùni confinanti: Castèl d'Assàn, Nogarole Roca, Mossecàn, Vilafranca de Verona, Vigàsi
Comùn a 15 km in diressión sud-ovest da Verona, posissionà ne la parte setentrionàl de la Bassa Veronese 'ndóe anticamente gh'éra paludi e caraterisà da la presensa de risorgive naturali che le da vita a un gran nùmaro de corsi d'aqua: el fiume Tartaro, i fossi Calfura, Giona, Bora, Draga, Liona, Moreta, Ladisa, Aqua Bassa, Gambisa, Fossona, Gambarela. L'òmo l'è presente a Pojàn fin da la preistoria come pól testimoniàr el siguréto del X secolo a.C. catà ne la zona e le necropoli de località Gambaloni e de contrà Vignol de la Gambisa con scheletri, armi in brónso, folende e utensili vari; in pratica 'ste antiche popolassióni le vivéa su palafite in un teritorio pién de aqua e impaludà. Arènte a 'ste do località jè stà catà dei scheletri, monéde, armi tochi de lapidi de Epoca Romana; e pròpio de 'sto periodo l'è l'origine del toponimo "Pojàn", da "Popilius" un militàr romàn conossù come Caio Popilio Lenate de la Gens Popilia che nel 172 a.C. l'à travérsà el Po con un esercito de Liguri che i avéa ricevù la libertà e 'l parmesso de coltivàr tere da 'ste parti. 
Durante tuta la dominassión romana gh'è sempre stà scontri mentre nel V° secolo le robe no jè andà al mejo 'isto el passàio dei Uni de Atila che i à scancelà el paese. Altre tombe jè stà catà a l'Ortaia de origine celtica, romana e longobarda. 'Pena jè rivà i Longobardi s'à 'isto la rinàssita del vilàio distruto e pròpio de 'sto periodo jè le prime testimonianse scrite su Pojàn, come quéla del 763 che parla de 'na donassión "in vico Pubiliano" mentre quéla del 774 parla de 'na vendita de beni "in fundi Publiano". Del 846 e 861 jè i documenti del testamento del Conte Ingrimaldo da Arbedo 'ndóe el paese el vien ciamà "curtis", probabilmente Pojàn l'éra un vilàio fortificà. Nel 1037 l'Abate de l'Abassìa de Nonantola el g'avéa concesso a dei veronesi un poche de tere, ma con l'obligo de darghele indrio dopo la tersa generassion. Nel 1136 quando Verona l'è deventà Comùn Pojàn l'éra diviso tra l'Abassìa de San Zén de Verona e un s-ciàpo de feudatari mentre nel 1137 su 'na pergamena se lese par la prima 'òlta de la presensa de la césa dei Santi Martìn e Ulderico; de epoca carolingia l'éra la prima césa esistente a Pojàn la Basilica de Sant'Andrea andà in malora.
Ne l'otobre 1154 Federico Barbarossa rivà in Italia l'à sponsà con i so soldà pròpio da 'ste parti e dopo la suplica spedì dal Vescovo de Verona Tebaldo, l'à riconfermà come scrito su 'n diploma i antichi privilegi e la gestión de 50 località ne la provincia, a la Césa Veronese. Verso la fin del XII secolo Pojàn essendo al confìn con Vilafranca s'à catà in mèso a le guere tra Mantoa e Verona, stesso destin poco tempo dopo durante le batàje tra el Conte Sambonifacio e Eselìn da Romàn. 'Pena l'è rivà la signoria Scaligera in paese l'è rivà la paçe rinforsando l'economia. Pojàn in 'sto periodo el risultava in possesso de Francesco fiól de Bartolomeo de la Scala mentre nel 1378 i Visconti i éra riussidi a devastar el teritorio dopo avér butà zò le difese tra Vilafranca e Povejan de quél sistema difensivo ciamà "Serajo" costruì da Mastino II. Nel 1405 jè rivà i Venessiani e Pojàn l'éra sóto el Distreto de Vilafranca mentre nel XVI secolo jè passà i soldà de la Lega de Cambrai scontrandose coi Venessiani, portando parò morte e distrussión ànca in paese. E dopo l'introdussión de la coltivassión dei morari par i cavaleri che l'à dà 'na çerta sicuressa economica nel 1630 l'è rivà la peste che l'à dimesà la popolassión. Par el resto la vita l'è andà avanti in paçe fin a quando jè rivé i francesi e i austriaçi par el resto podémo segnalàr che nel 1866 ànca Pojàn l'è deventà Italiana. Tra le cése da segnalàr la parochiàl dedicà a San Martìn Vescovo del 1965 in sostitussion de quéla vècia del 1780 costruida sóra a 'n altra del '400.
Interessante l'è el Santuario ne la frassión de la Madona de l'Ua Seca ligà a 'na legenda che, la ne conta de 'na vigna che la se sarìa secà parché un contadin el s'à rifiutà de regalàr a 'na dona che passava de lì un graspo de ua; quéla dona in verità l'éra la Madona. La césa l'è ricordà in documenti del XII secolo, conserva 'n afresco sóra l'altàr maiòr che'l rafigura "La dormizione de la Vergine" forse de la Scóla de l'Altichiero e Avanzo da Zevio e do tele una de la Scóla de l'Orbetto e l'altra del Falceri. In verità el nome de la frassión sembrarìa végner da 'na storpiadura del nome de la ceséta che gh'éra prima ciamà "de la Via Seca", defàti in antichi documenti se lese S.Maria vici sicci. Da segnalàr ànca do oratori, quél dedicà a la Concezion de la Beata Vergine ne la frassión Pignolà e quél dedicà al Redentor del 1630 al Dosso Regio. Tra le vile da segnalàr la grande Vila Balladoro del '600 con barchesse e bèl giardìn. Par ci ghe piase la natura alora podarìa far un salto a l'Oasi de la Bora gestida dal WWF su 'na superfice de 12.500 mq. in mèso a piante e àlbari lóngo in sentier a un tiro de s-ciòpo dal paese.