LAZISE (Lazise)
Popolassión: 6.901 Altessa: 76 metri sóra el livèl del mar Superfice: 63,15 chilometri quadri Comùni confinanti: Bardolìn, Castèlnóo del Garda, Pastrengo.
Magnifico Comùn lacustre posissionà lóngo la sponda oriental del Lago de Garda con a le spale coline e campagne coltivade a olivi e vigneti. Lazise l'è uno dei più antichi paesi del Garda abitato fin dal neolitico da popolassióni che le vivéa su palafite. In epoca romana l'éra un "pagus" conossù come "Lasitium" parola che 
podarìa derivàr da "Lacus" o Laceses, lógo lacustre. Infati ne le vicinanse de la frassión Pacengo durante dei scavi jè stà catadi resti de palafite con un fraco de materiali in çeramica, in brónso, folende e ossi. Tra l' 861 e l'961 durante el regno d'Italia da Berengario I° al II° dipendea dal re e dichiarada "vila libara" indipendente dai feudatari. El 7 majo 983 Ottone II de Sassonia l'à concesso a questo comune el dirito de riunirse e fortificarse oltre a importanti autonomie militari e comerciali con dazi par ci pescava ne le aque del lago che bagna el paese e par ci passava da quéle parti, mantegnude ànca sóto la "Judicaria Gardensis", un teritorio con sistema aministrativo e giuridico del'area gardesana, deventando cosita el Comùn piassè antico d'Italia.
Nel 1077 altre concessioni, ma questa 'òlta grassie a Enrico IV, con la costrussión de mura e de un castèl, rinforsadi, col passàr dei ani, dai Scaligeri che i à ricostruido ànca la darsena, Tór del Cadenon e verzendo tri porte Porta Noa, Porta San Zén e Porta del Lión. Dopo el breve periodo Visconteo, Lazise passa ai Venesiani deventando uno dei 10 comuni de la Federassion Gardesana del'Aqua (la g'avéa compiti de repressión e de 
ripartissión dei oneri fiscali con a capo el "Capitan del Lago") e pròpio sóto la Serenissima l'è stà edificada un importante dogana con vissin una Tór merlada. Tra le curiosità de questo periodo, l' imperadór Federico III° l'à fato un giro sul Garda su 'na galea venessiana partendo da Lazise, come ambasiador de la Republica de Venesia. Ai tempi de la Lega de Cambrai contro la Serenissima (1509) 'l proveditor del governo Veneto Zaccaria Loredan prima de scapàr l'à tacà fogo a una galea e a un par de fuste (galee più picenine) par no farle cascar in man al nemigo. In epoca Venessiana da sótolinear le invasioni dei Lansichenechi che più 'olte i à sachegià, robado, portado malatie come la peste nel 1630. In più da parte de la Serenissima, numerosi controi su evasori e briganti via tera e via aqua co 'le barche. Nel 1759 dai Venessiani l'è stà concesso de vérzar el marcà al zobia, con vendita de bestie, gran e prodoti de artigianado. Dal 1797 i s'a alternado domini austriaçi e francesi par un pochi de ani, par finìr in mane austriache fin al 1866 prima de passàr sóto el Regno d'Italia. Da segnalàr le numerose vile del teritorio, la Bernini che comprende el castèl 'ndóe nel 1796 i francesi i gavéa messo drénto una fabrica de salnitro par la pólvar da sparo, la Pergolana con tacà la césa de S.M. de le Grazie, la Montighel; 
ne la frassión Colà (Castrum Colade) la Da Sacco ('del 500), la Fumanelli, la Moscardo-Miniscalchi conossuda come Vila dei Cedri importante çentro termàl, mentre ne l'altra frassión Pacengo (Pacingus v.ultima foto) la Camuzzoni.
Tra le cése, da visitàr, quéla parochiàl vissin al portesèl dedicada ai Santi Zén e Martìn su le roine de 'n antica césa del XIII Secolo, quéla atuàl l'è stà progetada da Luigi Trezza in stil neoclassico e consacrada el 2 setembre 1888; la césa de San Nicolò del XII secolo l'è in stil romanico con afreschi del XIV secolo e canpanil del 1777; in località Mondragón la legendaria céseta dei Santi Faustin e Giovita 'ndóe secondo l'antichità, pròpio chi, le se dava apuntamento le "creature fatate" sensa contàr che l'éra citada ne le numerosi bole papali del XII secolo par la so partenensa al Capitolo dei Canoniçi de Verona; a Colà la bèla césa parochiàl dedicada a San Giorgio l'è stà costruida sui resti de n'altra del XII-XIII secolo e consacrà nel 1927; la parochiàl de Pacengo (1792) l'è dedicada a San Gioàni Batista con dipinti de Pio Piatti del 1792-93. L'altàr magiór, pién de marmi e do angeli marmo bianco de Carara jè opera dei scultóri Francesco Zoppi e Antonio Spazzi. Tra le manifestassioni principali la "regata storica de le bisse" e la fiera internassional del miél. 
