ILASI - I LASI (Illasi)
Popolassión: 5.265 Altessa: 157 metri sóra el livèl del mar Superfice: 25,00 chilometri quadri Comùni confinanti: Tregnago, Cassàn, Colognola, Lavagno, Messàn
Ilasi l'è posissionà al çentro de la so val, a sanca rispeto l'omonimo progno con l'importante frassión Thèlore (Cellore). Sicuramente 'sta zona l'éra abità fin dao la preistoria, ma le origni del paese jè probabilmente romane come pól dimostrarne, scrite, tombe, monéde, tochi de muri e de grandi colone funerarie come quéle che le faséa parte de un monumento funebre de la faméja dei Sertori, conservade al Museo Mafeian de Verona; nel I° secolo d.C. Ilasi l'è stà lógo de colonisassion romana, donà ai veterani de la XI legión. De 'sto periodo l'è ànca l'origine del toponimo, se pensa che possa derivàr dal nome de un centurión romàn del tardo impero, un çerto Gelagio, in latin Gelasius e cambià nel tempo in Jlasio e Jlaso. Tra le prime testimonianse scrite sul paese g'avémo quéla del 883 a la fin del periodo carolingio quando el vien ciamà Illaso e nel 996 in un documento de Ottone III se nota la comparsa de la letara 'I' final Ilasi e curia Ilasii, mentre nel 1004 catémo Castrum Illasii.
Tra i reperti de Epoca Longobarda g'avémo inveçe du crosi in lamina d'oro e numaròse armi come scudi, spade, cortei catà ne la necropoli de Thèlore, nome che deriva dal tardo latin Cellulae "depositi de fruta campestre no grandi". Ilasi l'è stà feudo tra el XI e 'l XIII secolo de Cadalo l'antipapa veronese, dei monasteri de Santa Maria in Organo, San Colomban de Bobio e San Zén come scrito in un diploma de Federico I del 1162, del Vescovo de Verona, dei Montecchi, che jà ricostruido el castèl (forse zà esistente prima del XI secolo) e nel '200 dei Nobili Pompei. Nel 1239 Eselin Da romàn l'à butà zò el castèl e nel 1243 Ilasi l'è deventà el so feudo ma poco tempo dopo jè rivà i Scaligeri che jà ricevù el castèl dal Comùn che a so 'òlta el ghe l'avù da Uberto della Tavóla nel 1270. Nel 1387 dopo el periodo Scaligero se vede i Visconti che contro i Cararesi nel 1390 jà perso el paese ma no el castèl.
Dal 1405 al 1439 Ilasi l'è stà sóto i Venessiani ma dopo jè ritornà i Visconti con a capo Niccolò Piccinino e nel 1509 el ritorno ancora de la Serenissima che i à lassà el feudo ne le mane de Girolamo Pompei in concessión perpetua (confermà nel 1517) 'isto la fedeltà dimostrada fin a l'epoca Napoleónica. Nei secoli sucessivi la storia de Ilasi no la segnala particolari eventi e la vita l'à andà avanti 'bastansa tranquila. El castèl el se cata sóra a la colina che varda Ilasi con el so mastio a quatro lati e i resti de la tór. Ai pié catémo la magnifica vila Perez-Pompei costruida nel 1615 da la faméja Pompei e grandà nel 1737 su disegno de l'architeto Dal Pozzo con saloni afrescadi e un bèl parco; tra le opere artistiche ne la vila, da segnalàr le tele e tempere de Francesco Lorenzi, Gianbetin Cignaroli, Antonio Mela e Andrea Porta. Altra vila l'è la Carlotti-Pompei, sgrandà nel 1737 su progeto de Alessandro Pompei, ma con la parte çentràl e 'l pòrtego tra le do tóri del '600; de un çerto interesse jè le decorassioni e le statue nel parco. Tra le cése da segnalàr la parochiàl dedicà a San Giorgio, antica pieve ricostruida ne l'800 da Bartolomeo Giuliari la conserva do statue del Schiavi con rafigurà San Bartolomeo e San Giorgio e ne la sagrestia 'na Madona col Butìn e i angeli afrescà da Stefano da Zevio nel XV secolo; l'altra parochiàl l'è quéla de Thèlore del 1880 dedicà a San Zén che conserva du crocefissi del XV e XVII secolo, mentre ne la ceséta che ghe arènte se pól 'édar i afreschi del 1500 opere de Francesco Morone e Girolamo Dai Libri.
Sicuramente de origini antiche 'isto che l'éra capela sóto la gestión del Monastero de San Zén come confermà da Federico I nel 1163 e Urbano III nel 1187. Verso Cassan gh'è la ceséta de San Colomban del '500 con un grande afresco con rafigurà 'na Madona in catedra; par finìr dovemo segnalàr quéèla che l'è ritegnù la prima sede de la parochia de Ilasi, l'antica césa de Santa Giustina con campanìl del 1100. E par finìr no podémo desméntegàrse dei oratori de Sant'Ana o Natività de la Maria Vergine del 1650 belo e afrescà, l'oratorio de San Roco e par finìr quél dedicà a Sant'Antonio da Pàdoa del 1656 in località Donselin.
