FUMANE
Popolassión: 4.119 Altessa: 198 metri sóra el livèl del mar Superfice: 34,21 chilometri quadri Comùni confinanti: Dolçé, Sant'Ana d'Alfaedo, Maràn de Valpolesèla, San Piéro in Cariàn, Sant'Ambroso de Valpolesèla
El Comùn de Fumane el se cata a 18 km da Verona, ne la parte çentràl de la Valpolesèla e precisamente a l'inissio de la "Val dei Progni" dominà dal Corno d'Aquilio e dal Monte Pastèl, in un teritorio che partendo dai 155 m.s.l.m. el se rampega fin ai 1127 m. con le frassioni Càvalo, Masuréga, Breoni e Molina posissionade ne la parte meridional de la Lessinia. El nome "Fumane" podarìa derivàr da l'espression "a le fumane o fumare", lógo 'ndóe se produsea el carbon de legna forse sul Col Fumana. L'Omo l'è presente nel teritorio de Fumane fin da l'antichità come pól dimostràr le zone 'ndóe jè stà scoerti importanti reperti del Paleolitico e del' Età del Bronso: Casterna, Fumane, Val del Lena, Grota de la Giassara, Val dei Progni, Sacheta de Molina, Riparo Solinas, Scalete de Molina, i Covóloni, Casteion de Molina, Vaio de la Merla, Castèl Sóto Sengia, Castèl de Càvalo, Forte Masua, Breoni (Breonio), Dosso Lonardelli. De l'Età del Fer se pól contàr numarosi castèlieri come quei de Molina, Breonio e Cavalo, probabilmente unidi tra lori, formando un importante sistema fortificado con altri vilai presenti in Lessinia.
In epoca romana Fumane l'éra la capital del "Pagus Arusnatium", un çentro aministrativo che'l se gestiva da solo e comprendea gran parte de l'atuàl Valpolesèla; de 'sto periodo jè restà un poche de scrite su pièra e altri reperti, conservadi ne le cése, in costrussióni del Comùn o al Museo Mafeian de Verona. In epoca Longobarda la val l'éra ciamà Val de Sala o Val Salaria, toponimo che podémo catarlo par la prima 'òlta nel documento del 927 insieme col castèl costruido dopo le invasioni dei Ungari nel IX secolo e ricordà in un documento del 1011; de 'sto castèl no gh'è restà gnente e nel XIII secolo el risulta tra le propietà del Monastero de San Zén dopo èssar stà regalà dai abitanti nel 1054. El nome de Fumane podémo catarlo, par la prima 'òlta, scrito in un documento del 1159 come "in curia Fumansi locus ubi dicitur Malzane (tr. Marzane)" mentre nel 1178 con un decreto de Federico Barbarossa el g'a dà in concessión la gestión del teritorio al conte Sauro de la faméja Sambonifacio. Nel periodo Scaligero la storia de Fumane l'è quasi istessa de quéla de la Valpoleséla deventà contea autonoma nel 1311 sóto Federico De la Scala fin a quando Cangrande l'à capido el tradimento.
Nel periodo venessiàn Fumane l'éra nel Vicariato de la Valpolesèla, e s'à 'isto la nàssita de numaròse vile sparse nel teritorio. Tra le cesé da segnalàr in contrà Vaio la ceséta de epoca longobarda de Santa Maria del Degnano (dal latin Dignus) documentà fin dal XI secolo quando l'éra tra le propietà de l'Abassìa de San Zén, la presenta modifiche del quatrosento e decorassioni del siesento, mentre de la vècia costrussión gh'è restà la base del campanìl e i muri. Altra romanica l'è la "césa vècia" de Càvalo costruida nel XII secolo par vólontà de le comunità de Càvalo, Masuréga e Monte par avérghe un lógo de preghiera insieme. Ristruturada bèn nel XV secolo, conserva ancora i resti del campanìl del '300, mentre nel 1979 l'è vegnuda a la luçe durante el nóvo restauro un ara sacrificàl dedicà a la dea Lualda. L'atuàl césa parochiàl inaugurà nel 1785 conserva dei afreschi co' i Apostoli del 1791 de Marco Marcola, mentre sóra a la porta prinçipal gh'è 'na tela co' la Madona in Gloria, San Zén, Sant'Eurosia e San Luigi de Pio Piatti. A Breoni (toponimo forse da "Breuni" antica popolassión alpina) l'antica césa de San Marziale del '400, afrescà e decorà dal Ridolfi, Morone e Dòminico Brusasorzi mentre l'atuàl césa parochiàl l'è stà costruida nel 1959 su progeto del Ronca in sostitussión de quéla vècia del 1830 'bandonà nel 1952 dopo èssar vegnuda zò quasi tuta dopo 'na frana. Del XVIII secolo l'è l'atuàl parochiàl de Masuréga (Mazzurega) dedicà a San Bartolomeo Apostolo la conserva un bèl dipinto de Antonio Badile del 1556.
La parochiàl de Fumane dedicà a San Zén l'è del '700 costruida al posto de quéla vècia. El Santuario de la Madona de la Salette costruido nel 1860 dai abitanti come ex-voto a la Madona su stil del tempio de Grenoble. Tra le vile da segnalàr Vila Della Torre costruida su imitassión de le struture de le vile romane da la faméja omonima nel XVI secolo, al posto de quéla dei Maffei forse costruida ancora prima dei Scaligeri. El progeto de la vila costruida nel 1560 l'è de Giulio Romano ma gh'è ci dise ànca Sanmicheli e Ridolfi. no sicura ànca l'origine de la tór merlada forse del Sanmicheli come el tempieto otagonàl nel cortil superior. Del '700 l'è la Corte de l'Abate Lorenzi in località Cavarena de Masuréga mentre de l'800 l'è Vila Ravignani a Cà Melchiori costruida su disegno del Barbieri. Da la contrà Paroléto parte la strada par el forte italian Masùa, costruido a la fin de l'800 ora privato. Molina e Breonio jè deventà frassioni del Comùn de Fumane solo dal 1929, quando jè stà tirade ia da Sant'Ana d'Alfaedo.
Da visitàr a Molina gh'è sicuramente el Museo Botanico de la Lessinia arénte al campanìl de la césa, dedicà al botanico nato da 'ste parti nel 1773 Gioàni Zantedeschi, 'ndóe se pól avérghe 'na panoramica su la vegetassion e la flora de la Lessinia e de l'alta Valpolesèla. E sempre a Molina prima de andàr a visitàr el Parco de le Cascate su 150.000 mq. consiliemo de far quatro passi ne l'antico borgo con i vèci molini e le case costruide in piéra tipiche de la Lessinia.
San Marziàl a Breonio
La césa de San Marziàl se cata a Breònio (Breóni) nel comùn de Fumane, realisà, a quanto par nel XII secolo ma il primo documento 'ndóe se lése el so nome l'è del 1268. Nel XV° secolo l'è stà butà zó e tiraìò su da nóvo. El 16 maio 1454 el vescovo Ermolao Barbaro el g'a fato visita, disendo che gh'éra un Retór che'l le tegnéa bén. El 7 de otobre del stésso ano el Vescovo el g'a decìso de métarla a le dipendense de la Pieve de San Fioràn, anca se nei registri de 'sta césa no ghe scrito gnénte in merito. Sicuro l'è, quél che catémo nei documenti del 1564, quando la parochia la binàva su i schèi da una trentina de fitànse. Nel '500 el paroco de la césa l'éra un nobile Paolo Maffei, fiól de Guido Antonio, el g'a volù che la so sepoltura la fusse póco distante, a San Gioàni in Lofa.
Se vardémo come l'è fata la cèsa, gh'è da dir che l'è a una sola navata, con un quèrto a cavalèti ma con un presbiterio co' le 'òlte incrosà. Tra le òpere, segnalémo quéle catè nel 1964 durante i restauri de quéi méssi pèso ne la 'òlta e ne le lunéte de la capèla del presbiterio; dipinti credù de Francesco Morone ma forsi, secondo i studiosi invésse i-éra de Domenico Brusasorzi, a la fin i-éra de le scòle de uno de 'sti artisti. Nei riquadri votivi, sempre de la scòla del Morone, gh'émo le opere del 1513 de Sant'Agapito, San Marziàl, San Gioàni Batista, San Cristoforo tra San Roco e San Bastiàn, co' el nome de ci el g'a ordinà le opere; de la scòla del Brusasorzi gh'é le piture dei Santi Silvestro e Gregorio co'la Pietà, sensa desmentegarse dei 'Vangelisti ne le vele, la Crocifissión, la Dissèsa al limbo e la Resuressiòn, ne le lunete, e i busti dei Profeti nei sottarchi, sempre nel presbiterio.
Da segnalàr che la Cèsa, la conserva su l'altàr magiór un "polittico" con cornisa lignea a do ordini, dei primi decenni del ‘500, su la vita de San Marziàl, i quatro dotori de la Césa e i simboli dei quatro 'Vangelisti. Il primo ordine del polittico l'è costituido invésse da tre nicie postè una a l'altra co' le statue in legno de San Marziàl, San Gioàni Batista e de Sant'Antonio Abate. Nel secondo ordine catémo tri tàole a stùco in bassorilievo co' un òmo e una dòna che i se càta, la Nassita de Cristo e la Fuga in Egito. El tuto completà da un timpano con piturà el dipinto de l'Eterno Padre e du angeli in legno. Par le pitùre del palioto de legno se pensa a la scòla de Nicola Giolfino. La césa l'è stà un poco desmentegà visto che i g'a pensà de costruirghene un altra piassè granda su la strada par Molina nel XVIII secolo.
