Popolassión: 740 Altessa: 1118 metri sóra el livèl del mar Superfice: 31,97 chilometri quadri Comùni confinanti: Bosco césanoa, Gressana, Santana d'Alfaedo, Ala TN
Antico Comun cimbro posissionà su l'altopian dei Monti Lessini ne le prealpi veronesi. El so teritorio che'l parte da quota 700m e l'ariva ai 1.765 de Castèlberto l'è inserido in gran parte nel Parco Natural Regional confinando a nord col Trentin e serà a est dal Vajo de l'Anguila e a ovest dal Vajo Falconi. Storicamente Arbedo come scrito nei documenti, el vien ciamà Herbezium nel 1182, Herbetium nel 1184 toponimo che podarìa indicar i magnifiçi pra de la zona e "Erbeço" nel 1219 campum erbeçi qui est ubi dicitru curte alta. Nel 1224 i canonici e 'l Comùn de Verona i à begà par i diriti ne la Frizolàna, in Arbedo e nei lóghi superiori fin ad Lexinum. 'Ste do località i éra sóto al Comùne de Verona come confermà in una locassión del 4 dugno 1306 Silua Herbezi Communis Verone. Arbedo l'è stà fondà dai Cimbri (che in epoca Viscontea i é deventé el Vicariado de le Montagne, poi XIII comuni) a partir dal 1287 quando el Vescovo de Verona Bartolomeo de la Scala l'avéa concesso a dei boscaioli-cimbri "Tzimberer" originari del Sud Tirolo, dei tochi de tera in Lessinia par abitarghe e disboscàr in parte con importanti privilegi confermadi sia dai Visconti che da la Republica Venessiana ma no da Napoleón nel 1797.
In altri documenti, come quél del 1348 se parla de un prà dei canonici in pradaria de Arbeze e nel diploma del 1354 de Cangrande II de la Scala vien riconfermà i privilegi ai coloni e conferidi de novi a communibus et hominibus de Albezio, Cancari, Alzaredi, Boschis Frizolane, Valbusa et Scolis Buscorum. El 6 genàr 1621 l'antico Comùn de Bosco con Frizolàna se divide in do, Césanoa o Frizolàna e Arbedo o Bosco e nel 1660 vien verificadi i confini tra i du comuni. Da segnalàr la césa parochiàl costruida nel 1720 sui resti de un altro tempio mentre la parochia col "capellanus" poi col "rector" l'è del 1529 "membrum ecclesiae novae sun Grezzianae". Drénto se pól amiràr 'na tela atribuida a Francesco Torbido con La Madona e i SS.Filipo e Giacòmo.
Par ci ghe piase far quatro passi consiliemo el Vajo de l'Anguila e quél dei Modi in mèso a la natura incontaminada e a canyón scavà dai progni o tra le carateristiche malghe come la Menegazzi e Busimo o tra le case con muri in pièra e querti de lastroni de marmo. A Passo de le Fitanse (1399 m) el panorama el se verze verso el Trentin lóngo la Val d'Àdese, con dei particolari unici e de un çerto interesse naturalistico. Arbedo l'è deventà nel corso dei ani un importante çentro montano turistico sia invernal che estivo che se dedica sóratuto a l'alevamento, a l'agricoltura e la produssión del formajo Monte D.O.P. Tra le curiosità, da sótolinear che Arbedo l'è el Comùn piassè alto de la provincia Veronese.
