CASSÀN DE TRAMÉA (Cazzano di Tramigna)
Popolassión: 1.533 Altessa: 100 metri sóra el livèl del mar Superfice: 12,27 chilometri quadri Comùni confinanti: Tregnago, Ilasi, San Gioàni Larión, Montécia de Crosara, Soave, Colognola.
Comùn de la Val Traméa a est del teritorio de la Val de Ilasi e a ovest de la Val d'Alpón. El nome Cassàn el deriva da “Cadianum” o ”Gadum”, parola tardo-latina par indicar un lógo de cassa (caccia) e boschi o da la "gens romana Cassia" mentre Traméa da “Vallis Terminea”, nome ànca del progno che nasse in difarenti sorgenti ne la zona formando pròpio nel çentro del paese un lagheto picenìn. Cassàn in epoca medioval l'éra identicado come Cadianum, lógo 'ndóe secondo i "Itinera" gh'éra el cambio dei cavài "mutatio" lóngo la via Postumia no distante dal paese. I primi documenti scriti su Cassan jè del X secolo quando vien nominà la pieve de San Giorgio, del XI secolo risulta tra i possedimenti de Cadalo col tempo deventà antipapa e nel XIII secolo un pochi de teréni de la zona i éra gestidi da le Abassie Benedetine de San Zén e Badia Calavena.
Dopo el periodo Scaligero l'è stà la 'òlta de quél Venessiàn. Nel XVI secolo el teritorio del Vicariado de Cassan l'éra stà dà in gestión a la potente faméja dei Pompei, signori del Castèl de i Lasi, na siélta no pròpio feliçe da parte de la Serenissima 'isto le numaròse proteste nei secoli da parte dei abitanti par el bruto comportamento tegnudo da 'sta nòbil casada. A parte qualche episodio, la vita l'è andà avanti tranquilamente in 'sto periodo fin ai combatimenti tra francesi e austriaci del 1809 in zona, con el relativo passàio vitorioso de le trupe imperiali. Tra le cése, da segnalàr la parochiàl dedicada a San Giorgio, rimessa a nóvo nel 1870 in stile gotico su disegno de Don Gottardi, la conserva tochi de la vècia costrussión del '300 sgrandà nel XV secolo, de la quàl gh'è restà 'n tabernacolo in tufo murà ne la sagrestia con scolpidi "Angeli adoranti e i Santi Giorgio e Bartolomeo", l'altàr magior e 'n batistero otagonal in marmo rosso; la cèsa de San Pietro in Brian con afreschi sia drénto che fora del '300 de la Passión, I dodese Apostoli e altri santi; la céseta romanica de San Feliçe a cavàl tra la val de i Lasi e la Val Tramegna costruida tra el IX secolo e 'l X secolo con afreschi tra el XIII e 'l XV secolo del maestro Cicogna.
In 'sto lógo l'è passà papa Lucio III durante 'la so visita a l'Abazia de Badia Calavena; ne la frassión de Campiàn se pól 'édar la ceséta de San Bernardo. Curiosa l'è la presensa dei "gadòi" (iris) un tempo coltivadi come fonte de guadagno (espr. sbondàr i gadòi: dopo la fioritura vegnéa catadi su le raise dei gadòi, netà e utilisadi par parfùmi e uso farmaceutico). Cassan l'è un comune che nel corso de la so storia l'è sempre stà ligà, dal pónto de 'ista economico, a l'agricoltura, infati el prodoto tipico l'è la "Mora", varietà de siresa de la Val Traméa o "Val dei Siresari" con mostra-marcà a dugno.
