CALDIÉR
Popolassión: 7.804 Altessa: 44 metri sóra el livèl del mar Superfice: 10,37 chilometri quadri Comùni confinanti: Lavagno, Belfiór, Zevio, Colognola, San Martìn bón Albergo.
Caldiér l'éra conossù fin dai tempi dei romani come "Calidarium" con le so magnifiche terme, costruide dal console Petronio. Le terme de Giunon così ciamade, par la presensa de un tempieto dedicado a la dea venerada dai romani, che'l se catava un tempo su la colina vissina. L'è solo nel '500 che'l paese l'è deventà stassión de cura. L'aqua che sgorga da le risorgive "Brentela e Cavala" l'è stà classificada come "Ipotermal, Mediomineral, Bicarbonato, Solfato Calcio-Magnesiaca" con presensa de metai alcalini come el stronsio, cloruri e floruri a la temperadura costante de 26.4° C con Ph 7.3, limpida, incolor e inodor.
Queste do vasche-risorgive ancora in funsión le g'a un çerto significado storico: la Cavala, così ciamada parchè nel 1796 i soldà francesi i s'éra fermà par curarghe le feride ai cavài dopo la famosa batàja de Caldiér tra l'esercito napoleonico e i austriaci; la Brentela inveçe l'éra de uso esclusivamente de la nobiltà, tanto che nel muro esterno, gh'è incastonada una lapide che la ne ricorda la visita del marchese Federico II Gonzaga nel 1524. Su la stessa colina gh'éra, un tempo, un castèl, distruto da Eselìn da Romàn nel 1233 e in recenti scavi, l'è stà portà a la luçe un deposito archeologico de l'età del brónso ( XVI-XIII secolo a.C.). S
óra ai resti l'è stà costruida Vila La Roca. Par bòna parte del medioevo, vegnéa considerado "disdicevóle" frequentar le terme, e così pian pian l'è andà in disuso. Le aque de Caldièr le vegnéa così utilisade da i abitanti par "maseràr el lino" e infati la fonte dei bagni de Giunon se ciama "Masera". Da visitàr l'è la cèsa parochiàl dedicada ai Santi Piéro e Matia che presenta 'na tela de Felice Brusasorzi "Cristo che consegna le chiavi a San Pietro". Da visitàr l'è ànca la céseta del XII° Secolo de San Piéro in col, con numerosi afreschi. A Caldierìn se pól far un salto a la cèsa de San Lorenso Martire, parochia del Comùne de Rota nel 1595. Nel teritorio de Caldièr da segnalàr gh'è ànca la Vila Zénobio del XVI° Secolo, Vila Panarota del XVII° Secolo, Vila Bressan del XVIII° secolo e a Strà, la Vila Cà Rizzi con a l'interno un ciclo pitórico che'l ne parla del laoro dei campi.
