BUSSOLENGO
Popolassión: 19.938 Altessa: 127 metri sóra el livèl del mar Superfice: 24,23 chilometri quadri Comùni confinanti: Verona, Pescantina, Sona, Pastrengo, Castèlnóvo del Garda
El teritorio del Comùn de Bussolengo l'è posissionà a metà strada tra la çità de Verona e 'l Lago de Garda e varda la Valpolesèla. L'òmo l'è presente da 'ste parti fin da la preistoria come i pól dimostràr i reperti de l'età del brónso, del fero e de la çiviltà teramaricola vegnudi a la luçe nel teritorio. In epoca romana l'éra ciamà "Buxumlongum", da la presensa de boschi de bossi (bot. buxus sempervirens) lóngo l'Àdese, ànca se i dise che podarìa vegnér dal longobardo "Gussilingus", "Guxolingo" "Guxolengi", come riportà da antiche carte veronesi dal IX al XIII secolo. La zona l'è deventà importante sóratuto quando, sóto el dominio de Roma, la vegnéa traersà da la Via Claudia Augusta, che vegnendo da Verona, la menàva verso nord. 
Piassè tardi gh'è da registrar el passàio dei "Unni" sóratuto in località Cà de Capri mentre in epoca Longobarda Bussolengo l'éra a le dipendense del Comitato de Verona e 'in 'sto periodo s'à svilupà el comercio su l'Àdese. Nel IX secolo el Monastero de San Zén l'éra parón de una parte del teritorio mentre ne l'807 Re Pipin el g'à regalà el paese e la selva del Mantico al Vescovo Ratoldo de Verona. Tra i documenti storiçi de 'na çerta importansa, da segnalàr quél de l'825 che'l parla del paese "vico Gussilingus" e quél del 1213 'ndóe se lese de la presensa de un castèl 'ndóe 'desso gh'è l'ospedal Orlandi costruì dopo l'invasion dei Ungari del 899. Nel 934 l'è vegnù in Italia Arnolfo del Sud Tirolo ciamà da Milone e Raterio par fermar Ugo de Provensa ma pròpio a Bussolengo l'è stà sconfito dopo 'na batàja. Verso la fin del X secolo Bussolengo faséa parte de l'organisassion aministrativa ciamà Iudicaria Gardense. Nel XII secolo l'è stà costituì la "Libara Università" con a capo el podestà mentre pochi ani dopo Verona, Bussolengo l'è deventà libaro comun. Federico Barbarossa nel 1154 l'à confermà al Vescovo de Verona la gestión del paese. Nel 1233 Eselìn da Romàn l'è passà da "Busiolengo" 'ndóe la messo a fero e fogo el paese mentre nel 1237 l'è stà aiutà da l'amigo Federico II che 'pena vegnù in Italia l'à posissionà el so campo al Mantico.
Nel periodo Scaligero s'à 'isto un çerto svilupo a Bussolengo con el comercio su l'Àdese, l'industria de la lana e l'agricoltura grassie a la nàssita dei molini. Nel 1326 grassie a un decreto de Cangrande, San Vito al Mantico l'éra deventà Comùn con giurisdissión fin a San Massimo. Verso la fin del XIV secolo sóto i Visconti, Bussolengo faséa parte de la federassion de la "Gardesana de tera" che g'avéa sede a tóri, 'ndóe el Capitan e relativo consejo i goernava ànca su la Federassion Gardesana d'Aqua. Nel XV secolo sóto la Republica de Venessia l'éra stà costruì 'na fortessa (bastia) che insieme a quèla de Pescantina riussìa a blocar le vie de comunicassion verso Verona a l'epoca dominà dai Cararesi. Nel periodo Venessian Bussolengo l'éra a capo de uno dei Vicariati de la provincia Veronese con a le dipendense Somacampagna, Sona, Palassol e Ganfardine. Da segnalàr el continuo svilupo economico sóratuto de l'industria de la seda mentre a l'inissio del XVI secolo se vede la nàssita de la Fiera de San Roco e pròpio in 'sti ani l'è stà costruì el Municipio rifato ne la version atuàl nel 1852. Nel 1630 Bussolengo l'è stà messa sóto-sóra dai Lansichenechi che i à portà la peste ridusendo la popolassión de la metà. Nel XVIII secolo l'è stà ocupà, durante la guera de sucession spagnola, dai francesi mentre nel 1711 l'è s-ciopà la malatia del "mal cascà" a bò e vache ma grassie a l'invocassion del patron San Valentin da parte de la popolassión, no s'à pì verificà. Da quél momento l'è nata la tradissional benedission de le bestie trasformà col tempo ne la Fiera de San Valentin. Da la fin del XVIII secolo a metà de l'800 da registrar batàje e scontri tra francesi e austriaçi nel teritorio, con comando prima de uno e dopo de l'altro su Bussolengo.
Nel risorgimento scontri tra piemontesi e austriaçi fin al 1866 quando el paese l'è deventà italian. Tra le cése da segnalàr quèla piasse antica, la pieve de San Salvar de l' VIII secolo con finestre in stil longobardo, un tempo cèsa parochiàl fin al trasferimento de la parochia a Santa Maria Magior nel XIV secolo. Costruì nel XIII secolo e rifata nel 1717 Santa Maria conserva un bèl altàr in marmo con sóra 'na pala del Balestra con rafigurà l'Assunsion mentre su l'altàr de San Stefano se pól 'édar la pala del Santo opera de la Scóla de l'Orbeto. Del stesso periodo l'è la cèsa de San Valentin restaurà piassè 'olte nel corso dei secoli conserva afreschi e 'na Pietà in legno del XVI secolo. Altra cèsa antica l'è quèla de San Francesco ricordà in documenti de l'856 consacrà nel 1747 e usà dai PP. Minori Osservanti l'è stà ricostruì nel XVI con la zonta del convento francescan. Del XV l'è la ceséta de San Roco arènte al çimitero con magnifiçi afreschi mentre altre cése jè quéle de San Michele a la Bastia, Maria Imacolà e l'antica cèsa de San Vito al Mantico in pié fin da l'epoca scaligera 'ndóe arènte gh'éra 'na toreséla; tra le curiosità da segnalàr che la cèsa l'è stà visità secondo 'na storiela da San Carlo Boromeo durante el so viaio da Verona al Concilio de Trento.
Tra le vile da segnalàr Vila Spinola del '600 'ndóe s'à fermà un fraco de personalità, molto bèla con pòrtego e lòsa; Vila Giusti-Benati del '500 su disegno del Sanmicheli. Da ricordàr la costrussión in quarèi 'pena fora el paese, el famoso "Capitel de le quatro gambe" costruì nel 1770 in ricordo de un funsionario Venessian.