ZIMÈLA (Zimella)
Popolassión: 4.952 Altessa: 29 metri sóra el livèl del mar Superfice: 20,10 chilometri quadri Comùni confinanti: Veronèla, Àrcole, Cologna Veneta, Lonigo VI
Comùn a 39 chilometri da Verona, posissionà ne la parte orientàl de la provincia veronese. Numarosi reperti de l'età preistorica, del brónso medio e del fero le pól testimoniàr de la presensa de l'òmo fin da l'antichità. L'origine del primo nucleo abitativo l'è de epoca romana come i ne pól dimostràr i reperti catadi ne le varie località del teritorio, tra queste, contrà Caldamura, 'ndóe jè ritornà a la luçe 'na sepoltura, tochi de mosaici, utensili vari e monéde de l'epoca de Costantin, Valentiniano e Adriano mentre de un çerto interesse ne la zona, jè ànca i resti de la strada romana che da Cologna la menàva a Vicensa ricordà col nome de "Strà". 
El toponimo Zimèla se pensa che'l possa vegnér da la legione romana dei "Gemina" che da ste parti nel 68 d.C. la s'éra fermà, come ricordà dal grande studioso romàn Tacito o da la presensa ne la zona de un sacel dedicado ai zumèi Castore e Polluce o da la faméja Gemina de stirpe Atestina, de sicuro col tempo el nome l'è cambià in Gemella, Jumella, Zomelle, Gimelle, Zomella, Zumilla, Zumella fin a 'rivàr a la forma atuàl. Dopo un tremendo aluvión e una grossa inondassión con relativa "rotta" a la Cucca (anticamente Veronèla) del 589 d.C., l'Àdese l'à cambià percorso, spostandose verso sud e lassando Zimèla ma creando el Guà, corso d'aqua che passa ancora dal paese e nel teritorio. Dopo i romani e le invasioni barbariche l'è stà la 'òlta dei monaci benedetini che i éra riussidi a bonificàr le so propietà de Zimèla e Bagnolo impaludè par i motivi sóra indicadi e portando el "Vangelo". I primi documenti che i parla de Zimèla jè del 975 quando el Vescovo de Vicensa Ridolfo l'à regalà al monastero de San Feliçe, 'na capèla in contrà San Vito. Storicamente la giurisdissión del paese la passa dai Vescovi vesentini ne le mane de Alberto dei Conti. Unida ne la storia con Cologna Veneta, dal' IX secolo fin al 1204 l'è stà dominada da la dinastia dei Maltravérsi. Subito dopo i se vede i Estensi con Azzo VI che l'à maridà Alisia, ciapandose la dota de "duo milia marcorum" e con sti schèi l'à comprà el teritorio de Zimèla. El 1212 l'è l'ano del riscato, quando la comunità de Zimèla l'è riussida a darse un ordinamento comunàl. A l'inissio del '300 Zimèla passa sóto i Scaligeri (fin al 1387) come 'ne dimostra un documento del 2 febrar 1307 'ndóe Federico de la Scala el concedéa a un pochi de abitanti el dirito de sfrutàr el teritorio par el pascolo e la legna. In sti ani se continua l'opera de bonifica scomincià ne l'alto medioevo, canàlisando canài e contrólando le aque con l'aiuto de ciàveghe.
Dal 1405 al 1797 Zimèla l'è passà sóto la Serenissima, che l'à favorido la coltivassión del forménto, l'introdussión del riso e dei cavaléri sensa contàr che grassie ai laori de bonifica le atività agricole jè ripartide sóratùto con la canapa par far soghe. L'ondese setembre 1807, el vicerè Eugenio de Beauharnais fiól adotivo de Napoleón, el costituisse la comunità de Zimèla che comprendea San Stefano, Volpino e parte de Bonaldo mentre in precedensa Volpino e San Stefano le formava un Comùn separà. Dopo Napoleón jè rivè i austriaci e Zimèla l'à imposto el pròpio stema: "due Gemelli fasciati in campo roseo superiormente e rosso nella parte inferiore". Nel 1866 quando s'à creà el Regno d'Italia l'è nata 'na discussion tra Zimèla e S. Stefano, risolta con un compromesso: el nome del comune l'è stà mantegnudo mentre la residensa municipal l'è andà a a San Stefano. Ai primi del Novecento un regio decreto l'à cambià el stema, che l'è ancora l'atuàl: "di verde, alla gemella in fascia ondata d'argento". Tra le cése da segnalàr quèla parochiàl de Zimèla rifata a l'inissio del XX secolo sul lógo 'ndóe gh'éra un antica pieve ricostruida nel XVI secolo. Dedicà fin al 1140 a San Fioran (S.Floriano) l'è stà consacrà nel 1904 dal Vescovo de Vicensa.
De la césa originaria ghe resta una pièra bèn fissada a l'esterno rafigurante 'na "Crocifissión" con ai pié la Madona, Madalena e S.Gioàni, òpara del X secolo mentre la fassàda l'è stà progetada nel 1896. Drénto gh'è çinque altàri, 'na statua de legno, 'na tela dedicada a Sant'Antonio del pitór Andrea Michieli. A Bonaldo podémo 'édar la césa de S.Apolinàr benedeta e inaugurada el 22 noémbre 1885 mentre el campanil l'è stà costruido nel 1928. A San Stefano (v.foto) la césa òmonima l'è stà costruida nel 1792 su disegno de don Francesco Antonio Ziggiotti, che l'à progetà ànca el Dòmo de Legnago. Su la fassàda se pól amiràr du festoni, du statue in tufo che le rafigura la "Mater Dolorosa" e "Sanctus Joannis" e due bassorilievi con le sène de la "Samaritana al pozzo" e dell' "Apparizione ai discepoli di Emaus". Sul cornisón del timpano gh'è tri statue che le rafigura i santi Piéro, Stefano e Paolo. A Volpìn la césa de Santa Maria Madalena l'è del siéçénto. Tra le vile da segnalàr a Zimèla "Casa de Brunello" in stile sanmicheliano, Vila Cavazzocca arénte l'arzaro de sanca del Guà mentre difronte gh'è Vila Dondio del '700 con un bèl parco; a San Stefano vila "La Morosina" del '600, Vila Cornaro e Vila Donà de le Rose del '700 con barchessa, capèla e tór colombara; a Volpìn Palasso Nievo e Vila Volpi.