VERONÈLA - CUCA (Veronella)
Popolassión: 5.059 Altessa: 21 metri sóra el livèl del mar Superfice: 20,88 chilometri quadri Comùni confinanti: Zimèla, Cologna Veneta, Pressana, Minerbe, Bonavigo, Albarèdo d'Àdese, Belfiór, Àrcole.
El teritorio de Veronèla el comprende oltre al comune ànca le frassioni S.Gregorio e Miega con un poche de località Giavón, Desmontà, Opi, Caséta da le origini antiche. Ne la zona de Sabionara l'è stà catado durante i scavi del 1989 un çentro abitado de l'età del brónso. Arènte a l'ex-laghéto de Canaviera a Desmontà gh'éra una necropoli e numarosi reperti archeologici del secolo X-IX a.C. conservadi al Museo de Cologna Veneta. Tra i più importanti da segnalàr una cùbia de schinieri del sec. X a.C. Altre testimonianse de l'età preistorica jè la torbiera dei Gradenighi a sud-est de Veronèla che la s'à formada in epoca Quaternaria e un casteliér a Opi (Oppi) del neolitico 'ndóe in epoca romana ghe passava l'antica Via Imperiàl o Porciliana che da San Martìn bón Albergo la finìa a Este. 
In epoca preistorica l'Àdese el passava par Desmontà-Veronèla-Sabión deviando verso Albaredo-Legnago dopo la famosa "Rotta della Cucca" del 589 d.C. Prima parò de 'nar avanti analisémo el termine Cucca. No l'è altro che l'antico nome de Veronèla fin al Regio Decreto del 23 genàr 1902 trasformado nel toponimo atuàl grassie a un alterassión de "Verona". podémo dir ànca che i romani i s'à fermà in questo teritorio come i ne dimostra i bèi reperti scoérti, come i quarèi, ànfore, urne e luçernéte. Verso l'ano mile un póche de tere lóngo l'Alpón jè passade dai franchi e longobardi a laici o religiosi. Intorno a la capèla de S.Apolinàr a Sabionara s'à formà nel XII-XIII sec. d.C. l'antico Comùn de Cavalpone "Caput Alponis" e un fraco de teréni a sanca de l'Alpón i è passè in man dei monasteri de S.Fermo Minor e Santa Maria in Organo de Verona oltre a feudatari come i nobili Cressenzi e San Bonifacio. A l'inissio del 1300 i vilai de Cucca, Miega, San Gregorio e Bonaldo j-è riussì a deventàr piassè importanti dal pónto de 'ista giuridico e urbanistico. Nel 1307 Federico de la Scala e col tempo la Fatoria Scaligera g'a ciapà el contról. Antonio de la Scala el g'a regalà nel 1382 a Cortesia Marassi di Serego la Cuca e Miega mentre l'antico feudo de San Donato-San Gregorio l'è passà da la Césa Vesentina ai feudatari Lavagnoli.
Sóto la Serenissima grassie a la bòna vólontà de le faméje patrisie venesiane e veronesi, s'a scomincià a bonificàr e disboscàr el teritorio, somenandoghe çereali e vigneti. Nel 1600 l'è partìda anca la coltivassión del riso ede la canapa deventando una vera e propia fonte de guadagno par Venesia. Dal 1797 s'a alternà i domini francese e austriaco fin a l'unità d'Italia. Uno dei monumenti simbolo del paese l'è la famosa "Cuchéta" (lat. coccum=nocciola) o "corte granda" 'ndóe gh'è passà du imperadori Massimilian I nel 1509 e Carlo V nel 1532. Questa costrussión col tempo l'è stà trasformada da fortessa con relative tóri a palasso e modificada da Andrea Palladio (1564-70) con la zonta de le barchesse. Tra le Vile da segnalàr, in via Marconi, la classica vila Serego del 1870 con un bèl parco, Vila Lavagnoli a San Gregorio costruida nel '700 che secondo tradissión l'à ospitado Napoleóne Bonaparte dopo la batàja de Àrcole del 17 noémbre 1796.
Tra le cése, da segnalàr quéla de San Gioàni Batista (diocesi vesentina v.foto) deventà parochia nel 1388, ricostruida più 'olte, la conserva ancora numaròse opere: el batesimo de Gesù (Melchiorre Galluzzi, 1586), l'Anunciasion (secXVI), S. Roco e altri Santi (Antonio Dal Bianco, 1782), Madona con Butìn (copia otoçentesca de un bassorilievo del Victoria & Albert Museum de Londra, atribuido a Desiderio da Settignano, sec.XV), la Vasca del batistero (1485), un póche de statue (S. Pancrazio, S. Rocco, S. Dòminico, la Vergine), de Alessandro Vittoria (1524-1608); la césa de S.Gregorio (diocesi vesentina) del XIII secolo con magnifiche tele; quéla de Sant'Antonio Abate a Miega de la fine del XV secolo con opere d'arte del XVII secolo; par finìr l'oratorio de la Beata Vergine del Carmine a Giavón.