TREGNAGO - Kalwàin
Popolassión: 4.938 Altessa: 317 metri sóra el livèl del mar Superfice: 37,35 chilometri quadri Comùni confinanti: Badia Calavena, S.Gioàni Larión, Ilasi, Cassàn de Traméa, Messàn, San Mòro de Saline.
Importante Comùn de la Val de Ilasi a 22 chilometri in diressión nord-est da Verona con le frassioni Cogól (Cogollo), Çéntro, Fineti, Marçemigo, Scorgnàn. Sicuramente Tregnago l'è de origine romana come pól testimoniàr i reperti catadi durante la ricostrussión de la césa parochiàl, statuete con Lare e Minerva, are funerarie, monéde, scrite. ànca el nome "Tregnago" el g'à le stesse origini secondo i esperti de toponomastica; dovarìa derivàr dal nome de 'na persona che l'a fondà el paese, un çerto Terinius, Ternius o Trinius e quindi i relativi agetivi i sarìa Teriniacus, Terniacus e Triniacus che i pól indicar le propietà del "colono" o fondatór. In documenti de epoca medievàl, come la pergamena del 1111 vegnemo a savér 'ndóe se cata Tregnago: in finibus et in comitatu ueronensi, in ualle longazeria, in calauena, in uico tergnago (nei confini e nel comitato veronesi, nella val d'Illasi, nella zona detta Calavena, nel paese detto Tregnago). La Calavena l'éra la zona tra le atuàli Badia e Tregnago mentre la "pieve de Calavena" l'éra a Tregnago. 
Nel XIV secolo i cimbri i ciamava Tregnago "Kalvàin", in pratica un alterassión de Calavéna un nome de origini pre-romane; quando jè rivà i romani el primo colono l'a fondà ne la parte sud al confìn del teritorio de la Calavena l'atuàl Tregnago e da chi, secondo alcuni, el nome podarìa derivàr da "Terminiacus" tera de confìn. De origini sicuramente romane l'è el Monte sóra al paese, "Precastio", che'l servìa ai romani come pónto strategico-difensivo posissionà "prima" del 'campamento. Tra i primi documenti scriti g'avémo el testamento del 932 de Dagoberto Diacono 'ndóe Tregnago el vien ciamà Teranciago. Dopo el periodo romàn no gh'è notissie in merito su 'sto comun e bisón rivàr fin al XI secolo quando el Vescovo Walterio l'a fato costruìr el castèl sui resti de un castrum romano. In 'sto periodo Tregnago l'éra tra i possedimenti dei Vescovi de Verona, concesso come feudo al Monastero de San Piéro de Calavena una tra le piassè importante istitussioni religiose del teritorio veronese. Nel 1228, come scrito sui Statuti Veronesi, el Vescovo de Verona el gà concesso a Tregnago, in canbio de Monteforte d'Alpón, tuti i diriti su la zona. Nel 1239 el castèl l'è stà rinforsà dai Scaligeri e consegnà ne le mane del Comùn da Cangrande nel 1328 avendo perso importansa dal pónto de vista strategico. Famose jè stà le beghe e i dispeti tra i abitanti de Tregnago e quéi de San Gioàni Larión par el contról dei pascoli sul Monte Beloca, come nel 1502 quando i tregnaghesi i g'à ciavà le vache e dopo avérle portà nel castèl i g'à organisà un bèl festìn con canti, balade e carne a maca par tuto el paese. Gh'è scapà dei morti, feriti e prigionieri ma con la sentensa del 9 noémbre 1508 la lota l'è finìa.
Per ci l'è interessà al castèl podémo dirghe che'l se cata ai pié del Monte Precastio con çinta muraria a forma de quadrilatero, circa 150 metri par lato, con ogni tanto 'na tór; al çentro de la cortina orientàl gh'è el mastio a forma pentagonàl; la porta par entràr al castèl l'è a sud, ne la tór de l'orolojo, posissionà con la campana nel 1850, data in cui l'è stà alsà la tór. Su la porta gh'è du afreschi con a fianco el stema dei Scaligeri: un león de San Marco e 'na Madona del XVI secolo. Tra le cése da segnalàr l'atuàl parochiàl dedicà a Santa Maria 'Sùnta costruida nel 1879 su disegno de Don Angelo Gottardi e consacrà nel 1922, ma pieve e parochia con arciprete dal 1465 mentre dal XVI secolo par dosento ani l'è stà unida al Monastero dei Santi Nazàr e Celso de Verona, la presenta 'na fonte batesimàl in marmo rosso del 1438 e 'na pietà piturà su legno del '500; arénte podémo catàr la ceséta romanica del XII secolo de la Dissiplina antica sede de la confraternita dei "Dissiplinadi o Flageladi" con du sepolcri tacà del '300 mentre drénto podémo catàr i afreschi del Giolfino del '500, 'na pala del Brusasorzi, 'n opera del Morene e in un cantón de la cèsa gh'è un basso-rilievo in marmo bianco con rafigurà San Martìn patrono de Tregnago; lóngo la strada prinçipàl del paese catémo la cèsa de Sant'Egidio 'ndóe gh'è conservà 'na tela del Brusasorzi con rafigurà Sant'Ana e San Michél; del XV secolo l'è inveçe la césa de la frassión Çentro dedicà ai Santi Ermagora e Fortunato 'ndóe gh'è conservà 'na statua del '500 de la "Madona de la Cintura"; la parochiàl de Cogól dedicà a San Biagio conserva 'na pala del Prunati del '600 e ànca se rifata piassé 'olte, la gà antiche origini, defàti l'è stà consacrà da Papa Lucio III nel 1183.
Tra le vile da segnalàr la Pellegrini-Cipolla del XVI secolo parò rifata nel 1841 la se presenta con un bèl parco, filari de cipressi e statue oltre al stema dei Cipolla; in piassa Massalongo vila Pellegrini del '700 con afreschi del pitór Andrea Porta. E par ci ghe piase far quatro passi in mèso a la natura consiliémo el Sentiero de la lana, antico percorso che i faséa i pastori in epoca scaligera par portàr la lana a destinassión.