TÓRI (Torri del Benaco)
Popolassión: 3.023 Altessa: 67 metri sóra el livèl del mar Superfice: 46,30 chilometri quadri Comùni confinanti: Brensón, S.Zén de Montagna, Garda, Costermàn.
Tóri del Benaco, stupendo Comùn che se spècia con el so maestoso castèl nel Lago de Garda. Numàrosi reperti durante dei scavi, i fa risalir 'sto paese al periodo preistorico; tochi de çeramica decorada, materiàl de folénda de l'età del brónso, resti de un antico çentro abitado su palafite, sensa contàr le interessanti incisioni rupestri. Sucessivamente Tóri (Tulles) l'è entrà a far parte de l'Impero romàn verso la fine del I° Secolo a.C. come le pól testimoniàr le monéde romane catade e i toponimi ancora esistenti, come Le Sorti (Sortes) e Il Salto (Saltus). Col tempo i g'a scomincià le invasioni dei Góti, poi Longobardi, dei Franchi e nel X° Secolo i Ungari. Par questo motivo Berengario Re d'Italia rivà a Tóri nel 905 l'à fato costruìr le mura (ancora visibili) e la tór che gh'è ne la piassa de la césa. 
Questo comune l'éra politicamente importante intorno a l'ano 1000 essendo sede del Consijo de la "Judicaria Gardensis". Nel XII secolo passa da la sponda veronese del Lago de Garda ànca le trupe de Federico Barbarossa e in questo periodo vien costruide le cése de la Trinità vissin al Porto, quéla de San Gioàni vissin al vècio çamposanto (con resti de afreschi del Morone e de Gioàni da Bardolino) e quéla de San Gregorio ne la frassión de Pai. Nei ultimi ani de la dominassión scaligera, Antonio de la Scala l'avéa pensà de fortificàr le difese, del porto con la costrussión de una "darsena" fortificada e de un bèl castèl sui resti de una fortessa precedente. Nel 1387 tuto el teritorio gardesn veronese el passa sóto ai Visconti, nel 1404 ai Da Carrara e nel 1405 ai Venessiani.
Propio sóto la Republica Venessiana questo comun el deventa con Malsé∫en sede de la Gardesana del'Aqua, federassion de 10 comuni con compiti de repressión e de ripartissión dei oneri fiscali. El consijo con a capo el Capitan del Lago el se riuniva nel palasso dove 'dèsso gh'è l'albergo Gardesana un tempo dei nobili Calderini mentre nel XVI secolo drénto nel castèl. Purtropo nel '600 a Tóri come nel resto de la provincia veronese, l'a fato comparsa la peste; i maladi i vegnéa portadi vissin a la césa de San Gioàni e nel monastero de la césa de San Faustin. E pròpio de quél periodo l'è l'afresco che ghe ne la césa de Sant'Antonio (verso la contrada Coi) che ne spiega come l'éra el teritorio in quél'epoca. Dal 1797 i s'a alternado domini austriaçi e francesi par un pochi de ani, par finìr in mane austriache fin al 1866 prima de passàr sóto el Regno d'Italia. Da segnalàr la césa parochiàl dei Santi Piéro e Paolo con relative statue, un organo del 1743 Angelo Bonatti, numerose altàri e pale de Piéro Rotari (XVIIsec.), Simone Brentana (1733), Sabastiano Aragonese (1538). 
Se vólì gòdarVe un bèl panorama del Lago alora Ve consiliemo de far un salto ne la frassión Albisàn, con césa parochiàl del 1700 (esistente nel XIII secolo). El nome de questa località el dovarìa végner da un nobile romàn, un çerto Albucius, mentre un documento del 1184 ne parla de Albisanum. L'altra frassión, Pai l'antica "Pali" o "Palli", no l'éra çircondà da mura ma l'éra composta da una serie corti fortificade. Re Berengario l'avéa fato costruìr un bèl castèl butado zò dal Barbarossa. Ne la césa parochiàl de San Marco Evangelista del 1703 gh'è un batistero del 1522 e su l'altàr 'na Madona del Rosario del XV secolo mentre l'abside l'è del 1400. Da segnalàr inoltre la césa 'pena fóra Tóri dei Santi Faustino e Giovita con a l'interno la tomba de l'eremita Pietro Malerba morto nel 1469 e afreschi del XV secolo con rafigudi ànca i San Roco, San 'Bastian e la Madona col butin.
Da visitàr assolutamente l'è el museo del castèl scaligero con sale 'ndóe ne vién spiegà la costrussión e la riparassión de le barche, la coltivassión de l'olivo con slita da trasporto e un bèl torchio, la pesca nel Garda con atressadure e una serie de reti antiche, come l'éra el paese nei secoli con numerose ricostrusioni e cartine topografiche, la storia de l'antica "Corporasion dei Originari" de Tóri e Garda nata nel 1452 e ancora operante, le incisioni rupestri del teritorio sensa contàr che gh'è la possibilità de visitàr ànca la "serra" dei agrumi ancora in funsión sul Garda del 1760. Tra i personagi famosi nati in questo comune gh'è l'umanista Domizio Calderini nel XV secolo, el botanico Gregorio Rigo, Giuseppe Nascimbeni sensa contàr la citadinansa onoraria al grande Angelo Dall'Oca Bianca.