SOAVE
Popolassión: 7.116 Altessa: 40 metri sóra el livèl del mar Superfice: 22,72 chilometri quadri Comùni confinanti: Belfiór, Colognola, Ilasi, San Bonifacio, Monteforte d'Alpón, Cassàn de Traméa, Montécia de Crosara.
Comùn de l'est veronese a l'inissio de la "Val Tramigna o Traméa" anticamente Vallis Terminea, a i pié dei Monti Lessini con le so frassioni Castèlsarìn l'antico Castrum Ecerini (con le contrà Coste, Lelli, Megian), Castèleto (con Valona), Costesola\Costiòla it. Costeggiola (con Batocchi, Pressi, Tamellini), Fità (con Monte) e le contrà de Soave, Borgo S. Mateo, Campagnola, Fontanele, Fornaçi Michelon, Molin d Sóra, Mondel, Preare, S. Lorenso e Tebaldi). Tra le testimonianse storiche che pól dimostrarne de l'esistensa de l'òmo fin da l'antichità, g'avémo a Castèlsarìn e sul Monte Rocheta reperti de l'Età del Bronso come un fantastico muro a seco mentre a Soave un poche de tombe del Eneolitico. In epoca romana el teritorio l'éra travérsà da la Via Postumia contrólà da un Pagus fortificado. 
Tra i reperti romani da segnalàr monéde, tombe, tochi de pavimentassión o de steli come quèla catà de la cèsa de San Martìn nel castèl de Soave conservà a Verona nel Museo Archeologico del Teatro romàn con sóra scrito i membri de la gens Vitoria: V(ivi) f(ecerunt) / L(ucius) Vitorius L(uci) f(ilius) Festus, / Q(uintus) Vitorius L(uci) f(ilius) Severus,/ VI viri aug(ustales), sibi et / Cassiae Sex(ti) f(iliae) Maxim[ae], [Cominiae L(uci) f(iliae) Festae, / Catiae M(arci) f(iliae) Secundae, / uxoribus, et / L(ucio) Vitorio L(uci) f(ilio) Feroc(i), / C(aio) Vitorio L(uci) f(ilio) Festo, / Q(uinto) Vitorio Q(uinti) f(ilio) Festo, / filiis, VI viris augustalibus]. Sembrarìa che el çentro storico de Soave el sia stà fondà in epoca longobarda, nel 500, da 'na tribù de Svevi vegnudi in Italia con Alboin e che de conseguensa el nome el possa derivàr pròpio da lori "Suaves", "Suevi", toponimo cambià in "Soavi" e par finìr in "Soave". Nel IX secolo sóto Berengario par limitar i casini combinà da le invasioni ungariche, numarosi paesi i éra stà autorisà dal re a fortificarse e pròpio 'de 'sta epoca se dise la sia la roca modificada col tempo da Scaligeri e Venessiani. In 'sto periodo el Monastero de San Nazàr el gavéa 'sta zona tra i vari possedimenti de la provincia.
El primo documento scrito su Soave l'è del 877, 'na "controversia" del Monastero de San Zén. Nel XII secolo Soave l'éra tra le propietà prima dei Conti de Sambonifacio come ricordà da un diploma del XII secolo de Federico Barbarossa, col tempo de la faméja Greppi e prima de passàr ai Scaligeri, al Comùne de Verona che gà mandà a comandàr un capitàn. El castèl dopo èssar stà conquistà dai "traditori" veronesi con a capo Pulcinela da le Carçeri amigo dei Conti Sambonifacio, nel 1280 l'è stà ciapà da Mastin De la Scala. Soave l'è deventà un importante pónto de frontiera de la signoria Scaligera, quando Alberto de la Scala dopo "acordi de paçe" con i Padovani, l'à fato butàr zò tute le fortificassioni a est de l'Alpón. Nel 1338 el castèl l'è stà conquistà dai Fiorentini aleadi ai Venessiani par ripassar un par de ani dopo ne le mane de Mastino II de la Scala. Nel 1369 Cansignorio dopo avér rimesso a posto el castèl nato sul Monte Tenda, l'à fortificado bèn Soave, con mura merlade rinforsade da 24 tóri ancora bèn conservade mentre nel 1387 dopo la fin de la Signoria Scaligera, i Visconti i éra entrà in possesso del paese, con a capo, incaricà da Gian Galeasso, un çerto Balzarino da Pusterla. Dopo i Carraresi nel 1405 jè rivà i Venessiani che 'isto l'importansa de Soave jà vólù costruìr el tersa anel de muri intorno al paese. Dal 1509 al 1517 numaròse jè stà le batàje tra la Lega de Cambrai e la Serenissima in tuto el teritorio veronese con cambio de parón 'bastansa de spesso, come ànca a Soave. Tornà ai Venessiani, l'è stà consegnà ne le mane del proveditor venessiàn Andrea Gritti no ancora Doge. In 'sto periodo fin a l'arivo dei francesi. Dopo el Congresso de Viena, nel 1815, Soave l'è passà sóto el regno austro-ungarico, par deventàr italiana dopo la tersa guera de indipendensa nel 1866.
Nel periodo 1889-92 la faméja Camuzzoni, deventà paróna del castèl l'à bén pensà de restaurarlo. Oltre al castèl con i so ponti levadori da visitàr ghe ànca el Palasso de Giustissia costruido nel 1375 par vólontà de Cansignorio con i contributi de 22 comunità del Capitado de Soave deventà sóto i Venessiani palasso dei Capitano; poco distante in stil gotico venessiàn gh'è el Palasso del Capitan Nicolò Cavalli del 1411 con fassàda afrescà dal Falconeto; Arènte a Porta Aquila gh'è el Palasso Scaligero vólù da Cansignorio come residensa dei governadóri de Soave; el Palasso dei Conti Sambonifacio del XIII secolo; i Palassi Pullici del '400 e Moscardo del '600.
Tra le cése da segnalàr la césa parochiàl dedicà a San Lorenso del 1303 ricostruida nel 1758 e forse costruida inissialmente sóra ai resti de n'altra, che la presenta un batistero del 1430, statue e tele del Morone, Farinati e Cignaroli del '400; la césa dei Padri Dòminicani in stil lombardo del 1443 dedicà a S.Maria de Monte Santo; el Santuario de la Bassanella dedicà a "Santa Maria Sùnta" con statua ritegnù miracolosa del XI secolo con afreschi e statue del XIV secolo; la césa de San Giorgio costruì dai Francescani nel XIII secolo; la cèsa de San Roco del XV secolo rifata nel 1521 con drénto 'n afresco del XV secolo con el Santo e 'na pala del '500 con Sant'Ana, la Madona e San Gioànin de la Scóla de Giulio Romano; la césa de Sant'Antonio del 1677 fata costruìr da la faméja Cusani, presenta interessanti quadri de la Via Crucis. E 'désso ne resta che béar un bèl gòto de Soave bianco D.O.C. a la Vostra salute.....