SANGUINÉ (Sanguinetto)
Popolassión: 4.101 Altessa: 19 metri sóra el livèl del mar Superfice: 13,51 chilometri quadri Comùni confinanti: Nogara, Salizól, Gazo Veronese, Zerèa, Concamarise, Caselón.
Comùn de la Bassa Veronese a 40 chilometri in diressión sud-est da Verona posissionà tra i fiumi Tartaro e Menago. Sembrarìa che 'l nome Sanguiné secondo la toponomastica el possa vegnér da la pianta ciamada "Corpus Sanguinea" dai rami colór porpora o rosso scuro e cói fruti neri che no te podéi magnàr; un tempo coi rami piassé zoeni se faséa le spassaóre. El primo vilàio in pratica l'éra stà costruì 'ndóe gh'éra 'na distesa de sanguenele o sanguini come ne dise uno dei primi documenti che i parla del paese. Gh'è inveçe ci dise che'l nome de 'sto Comùn el vegna dal latin "sanguinis" par le tremende batàje che nel corso dei ani jè stà combatù da 'ste parti, ipotesi parò da scartàr. 
El primo documento che ne parla de Sanguiné l'è del 930 mentre tra i primi reperti storiçi da segnalàr la scoèrta de un par de ànfore e 'na cassa de monéde romane in località Venèra. Ànca se Sanguiné l'éra bén fortificada e g'avéa un bèl castèl, nel 1232 l'è stà messa sóto-sóra dai mantoani; cossita del primo castèl no gh'è restà pìù gnente ma poco tempo dopo l'è stà rimesso in pié da nóvo e nel 1377 insieme col feudo l'è stà regalà dai fradei Antonio e Bartolomeo De la Scala a Jacopo Dal Verme che a so 'òlta el ghe l'à consegnà a so fiól. Nel 1451 el feudo el vien confiscà ai Dal Verme dai Venessiani parché ritegnùdi traditori e consegnà al Capitàn de la Serenissima Gentile de la Leonessa con relativo titolo de conte che podéa trasmétar ai dissendenti, sia òmini che dòne; defàti quando l'è morto le propietà de Sanguinè jè stà divise fra le fióle: Milla sposa de Francesco Lion da Pàdoa, Tarsia sposa de Alessandro Venier da Venessia e Batistina sposa de Leonardo Martinego da Bressia. Nel 1438 Sanguinè l'è stà conquistà da Alfonso de Calabria par Ferara e poco tempo dopo riciapà dai Venessiani.
Nel 1509 durante la guera de Cambrai Sanguiné l'è passà sóto le trupe imperiali e nel 1511 i francesi i g'a remissià el paese. Par el resto la vita sóto la Republica de Venessia l'è andà avanti 'bastansa tranquila fin a l'800 quando jè passà: Napoleón (1796 e 1804), l'imperadór Francesco Giusepe (Ceco Bepe 1848) e Giusepe Garibaldi (1863). Tra le personalità famose che jè passà da Sanguiné da segnalàr Carlo Goldoni nel 1751 mentre Ugo Foscolo, Ippolito Pindemonte, Pietro Verri e Giulio Perticari i à sponsà a "l'Albergo de la Posta" la note del 15 setembre 1810. Tra le cése da segnalàr la Césa e 'l Convento de S.Maria de le Grazie conossuda come la "Ceséta dei Frati", complesso costruì a l'inissio del '600 da l' Ordine Minór dei Francescani "Socolanti"; da'édar drénto la césa, tri dipinti in gesso con rafigurà "l'Angelo Musicante", "Madona Sùnta in çiél" e "Du puti con cartijo". Del convento gh'è restà parte del ciòstro e un bèl pósso. Conossudo l'è "l'Oratorio de le Tri vie" ciamà ànca "Ceséta de la Rotonda" o "Ceséta del Capo de Sóto" costruì nel 1747 'ndóe gh'éra un capitèl co l' imagine de la Madona, su progeto de Alessandro Pompei.
La césa parochiàl de Sanguiné, dedicà a San Giorgio, l'è stà costruì su l'area de l'antica césa tra el 1802 e 'l 1826 su disegno de Gioàni Canella e la conserva opere de Agostino Pegrassi e de Gaetano Miolato; la prima césa l'éra 'na Capela a le dipendense de quèla de Caselón (docum. 1145 d.C.) ma passà col tempo ne le mane de le faméje nobili de Sanguiné (Dal Verme, Lion, Venier, Martinengo) con potér decisionàl su la nomina del prete. Tra i palassi da segnalàr Palasso Taidelli e Palasso Betti de fin '700 'ndóe i à sponsà Francesco Giusepe e Giusepe Garibaldi mentre lóngo la strada par Sustinenza gh'è "la Rangona" palasso del XVI secolo. Da visitàr par ci passa da 'ste parti l'è sicuramente el castèl modificà piassé 'olte nei secoli ma sempre magnifico e magico.