SAN PIÉRO DE MORÙBIO (San Pietro di Morubio)
Popolassión: 3.008 Altessa: 19 metri sóra el livèl del mar Superfice: 16,12 chilometri quadri Comùni confinanti: Rociàra, Angiari, Isola Riza, Boolón, Zerèa.
Comùn de la Bassa Veronese che prima de l'unificassión d'Italia no l'esistéa, defàti San Piéro de Morubio el faséa parte del teritorio de Rociàra mentre le frassioni Bonavicina a l'epoca ciamà Malavicina e Borgo i-éra a le dipendense, la prima de Zerèa e la seconda de Bòolón. Nissuna de le tre località g'avéa autonomia e in passà do grandi faméje jè stà ospitade come la Broilo a Bonavicina e la Dal Verme sostituida da la Loredan a Borgo. Parò le g'avéa autonomia religiosa e defàti le parochie jè ricordà fin dal 1526, ànca se quéla de Bonavicina i dise che la sia esisistida almanco dal 1460. 
La césa de 'sta ultima frassión dedicada ai Santi Filipo e Giacomo, la vién citada in un documento del 1318 quando la faméja Broilo dopo avérla dotada dei propi beni la podéa nominarghe el "rector". La césa atuàl l'è stà costruida a metà del XVIII secolo mentre el campanìl nel 1795. Del XV secolo l'è la césa de Borgo de Bonavicina dedicada a Santa Caterina costruida grassie ai Dal Verme; drénto gh'è conservà 'na tela del '700 del Conati rafigurante el martirio de San Bartolomeo. quéla del capologo l'è dedicada ai Santi Piéro e Paolo e ricostruida nel 1797 la conserva un bèl altàr baroco del XVII secolo. Storicamente la zona le stà coltivada par el gran nel XV secolo e col tempo par la canapa e le verdure, mentre nel XVII secolo sóto la Republica Venessiana s'à svilupà la cultura del riso. San Piéro de Morubio l'è ligà a Rociàra fin dal XIII secolo e sóto la Republica de Venessia l'è passà nel Vicariado de Angiari. Famosa l'è la batàja del 1439 combatuda tra venessiani, milanesi e mantovani aleadi fra lori.
In questo teritorio passava la fossa che Nicolò Piccinino a capo de le milissie de Filipo Maria Visconti l'à fato slargàr par portàr le navi da Ostija traersàndo el Tartaro e 'l Menago e da Zerèa, lóngo la fossa, fin a la località Panego arénte a Rociaréta da 'ndóe, navigando su l'Àdese l'à tentà de tacàr la fortessa de Legnago. E ligà a 'sto importante evento storico l'è la famosa strada del Panego, un lóngo retilineo che da nord del teritorio el porta a l'Àdese. A l'inissio de 'sta strada gh'è una corte con colombara afrescada datada 1493, 'na meridiana e la scrita "Si magna quaeris disce pati", mentre difronte gh'è la setecentesca Vila Gobetti. Du bei palassi jè ànca el Menini costruido nel 1777 apartegnudo a Giorgio Volpini, governadór de la Casa de Pietà de Verona, e quél dei Loredan a Borgo de Bonaviçina con mura e merladura ghibelina. Par ci l'è curioso, el nome Morubio, el dovarìa végner dal latin "rubus" rovo o da la faméja Rubbiani che la vivéa in 'sta zona mentre documenti medievali i parla de Moruiolo, Morugio o Moruggiolo.