I TROMBINI, L'ANTICA TRADISSIÓN NE LA TÈRA DEI CIMBRI
Quéla dei Cimbri l'è un' isola culturàl e linguistica che caraterisa gran parte del’altopiàn dei Lessini. Nel XIII secolo questo l'éra un teritorio póco popolado e Vescovo Bartolomeo de la Scala el g'a pensà de darlo in concessión ai "coloni" de origine bàvaro/bàvaro-tirolése, con el compito de tajàr i àlbari e farghene pascoli par el bestiame. Ai coloni l'è stà concesso de gòdar dei fruti de la tera, de farse su case, aministrarse, far l'elessión dei propi paroci che i parlasse la so léngua, conservàr le propie tradissioni e de unirse in comunità piassè numerose. Quéle comunità, col passàr dei tempi, jè cressude de nùmaro e de popolassión e, vèrso la fine del Treçènto, le g'a costituido i "Trèdese Comuni" de la “Montagna alta del Carbón”.I “trombini” o “s-ciòpi” o “pistoni”, come i vién ciamàdi, i sarìa derivadi da armi da guéra del Sièçènto/Seteçènto usade, par lo più, per spaentàr, per butàr zó palissade, par farse largo tra la zénte, per diféndarse durante i viai. La sò denominassión, probabilmente la provièn da un arma che podarìa somejarghe, al “tromblòn” belga e olandese del passà, e par che g'àbia origine da la “tromba” (o campana) del svaso de la boca da fóngo. Nel passà in ogni borgada de la Lessinia, squadre de “trombonieri” i faséa dimostrassioni folcloristiche con le so scariche a salve a le manifestassioni dei so paesi. Ancó, do associassioni folcloristiche: I “Trombini” de San Bartolomeo e i “Pistonieri” del’Abassia de Badia Calavena le porta inànsi le antiche usanse parteçipando con i sò “s-ciopi” par ufiçialisàr le feste del propio paese e dei paesi de la provinçia de Verona.
STORIA E SIGNIFICADO DEL TROMBIN
El trombin al dì de ancó el g'a la funsión de far un forte bacàn ("el bòto") con fumo, secondo un rituàl de "scongiuro" contro i spiriti maligni o quel de negativo, ma anca con un significado de festa e gioia. La presensa dei trombini l'è presente in varie zone de la provincia de Verona da alcuni secoli, ma in particolàr in Lessinia. A la fin del XVII sec. le visite pastorali del vescovo Francesco Barbarigo a Veste, Badia, Tregnago, Ilasi e Bosco iè salutade dal riçevimento e da le esplosioni con armi da fógo, somejànti a archibugi. E l'è nel secolo dopo, fórsi ne la seconda metà del XVIII sec., che da le cronache de le visite pastorali se rileva la presensa ne le varie comunità de milissie locali, e grupeti de òmeni siélti munidi de trombini che i podéa, nel momento del bisón, èssar impiegadi con compiti de polissia locàl. (Nel 1763 par la prima volta se parla de "schioppi" / s-ciòpi, a indicàr i trombini e non più i archibugi). A 'olte, 'ste milissie i éra ciamade "Sepolcreri" e le g'avéa el compito durante le funsioni de la Setimana Santa de custodir in costume el Sepolcro e de sparàr co' i trombini al Gloria del Sabo Santo e de la Pasqua. Da qual arma nasse el trombin? Molto probabilmente dal`archibugio, dal qual l'è difarénte par "l'apertura" de la cana a forma de tromba, da cui l'a ciapà el nome.
'NDÓE SE USA EL TROMBÌN
L`uso del trombin come ufissialità cerimoniàl. Prima del sparo gh'è la sfilada dei trombini, lo schieramento e el caricamento, cui sovritende un comandante: i "trombonieri" in costume, cói tòchi in spala, i marcia in colona precedudi da bandiere e labaro portadi da butèle in costume e da uno o più sonadori de corno. Lo schieramento el vién fato in una zona giusta, lontana dal publico, con i "trombonieri" messi a semiçercolo e i trombini colocadi a tèra. Par el caricamento e el sparo, ghe vol tanta 'spariénsa: el trombin se carga versando una prima dose picenina de pòlvar nera con grafite ne la cana, distribuida col misurìn dal comandante. Con una bachéta de legno se bate sul fianco del trombìn in modo che la pòlvar impenissa ben el canèl e che'l vaga fin al porta-capsula dove el bate el can. Una seconda dose de pòlvar nera da mina la vien distribuida sempre dal comandante (in ragione diversa a seconda de la grandessa del trombin) e compressa con asta e maza de legno insieme a alcuni tòchi de giornàl. El comandante distribuisse quindi la "patrona" par darghe el "spunto". Ogni pistoniér par ripararse dal bòto e da le scotade el g'à ligà su la gamba sanca un tòco de saco ("s-ciavìn"). Dopo che l'è stà sonà el corno che'l dise a la zénte che manca poco al sparo, ogni tromboniér alsa l`arma in brasso con la cana rivolta al terén e 'l dèo messo sul griléto. I spari i se ripete singoli o in copia, o a tri, secondo i ordini del comandante. El sparo l'è spetacolàr e forte come el bòto de un canón, "fragoroso e fumoso". El trombin inissialmente rivolto verso el basso, par el forte rincùl el vién sospinto in alto e questa manovra va controlada da ci spara 'compagnandola con un mèso giro del busto e una rotassión de 180° alsando el pesante trombin su la spala sanca. El tuto in modo da non èssar butadi in tera dal rincùl. Da la nùgola se spande un forte udòr de pòlvar da sparo. I trombini i se sparava e i se spara ancora durante el "Gloria" del Sabo Santo, durante le feste e le sagre locali in Lessinia, l`ingresso de nóvi paroci e alcuni matrimoni.