SAN ZÉN DE MONTAGNA (San Zeno di Montagna)
Popolassión: 1.355 Altessa: 590 metri sóra el livèl del mar Superfice: 28,24 chilometri quadri Comùni confinanti: Tóri del Benaco, Brensòn, Ferara de Monte Baldo, Cavrin Veronese, Costermàn.
San Zén de Montagna, l'è possionado sul versante oçidentàl del Monte Baldo, con vista panoramica sul lago de Garda e i monti del Bressiàn come el Monte Pizzocolo (el naso de Napoleón par i veronesi). El teritorio l'è costituido oltre che da San Zén con Ca' Montagna, Ca' Sartori, Castèl La Ca', Laguna, Pora, Vilanoa, ànca da le frassioni Lumini e Prada. In questo Comùn se pól gòdar dei magnifiçi panorami e far escursioni tra i prà, boschi e pascoli in mèso a la natura incontaminada. Da Prada Alta se pól tór la funivia arivando in pochi minuti al Rifugio Fiori del Baldo (1815 m) e magari decìdar se proseguir par le çime de la montagna passando par el Rifugio Chierego (1911 m) fin al Rifugio Telegrafo (2200m) o tornàr indrìo con la strada che passa prima par la Bocheta de Naole (1648 m) e dopo par l'ex Forte. Storicamente le prime testimonianse preistoriche i è stà rinvegnude ne l'abitado de Prada 'ndóe i g'a scoèrto una pónta musteriana (paleolitico medio), mentre in varie zone intorno al'abitado de San Zéno de Montagna i è stà rinvegnudi, in superfice o in depositi de argila, numarosi materiali litici atribuidi al paleolitico medio, al paleolitico superiore, al mesolitico, al neolitico e al'età del brónso.
A Lumini inveçe l'è stà rinvegnudo un ras-ciatoio, mentre ne le località Laguna e Ca' Schéna jè stà scoèrte de le tombe fórsi de età romana. Da segnalàr che el nome coreto del paese el sarìa San Zén dei Montagna, 'isto che anticamente i teréni de questa zona i éra de propietà de l'Abassìa de San Zén de Verona e nel periodo scaligero de la faméja Montagna. Questi nobili i possedéa una casa "Cà Montagna" ne l'omònima contrada e essendo amiçi dei scaligeri i possedèa n'altra residensa nel palasso de fronte a la cèsa de Santa Maria Antica a Verona, fasendo così i pendolari tra la çità e 'l Baldo. Par questa profonda amicissia i scaligeri i avéa nominado uno de dissendenti dei Montagna un çerto Piéro, Capitàn de Soave e che a so 'òlta l'à finansià come da documenti del 1375, el palasso de la Pretura de Soave, nel periodo scaligero de Cansignorio dela Scala. Ma un altra amicissia importante l'éra con i nobili Dal Verme (ànca questi amiçi dei Scaligeri), 'isto che, come scrito su 'n diploma de Martino II del 1351, el vicariado de Pésina, Ceredél, Montagna e Albisàn l'éra deventà de propietà de questa faméja, mentre in una pergamena del 1354 risulta che i Dal Verme i gavesse pascoli sul Monte Baldo sensa contàr che in un altra pergamena del 1395 la proprietà dei Dal Verme la vegnéa fitada ai omini de la comunità de San Zén de Montagna. Cà Montagna 'désso l'è la Sede de rapresentansa del Comùn e dopo un bèl restauro se pól amiràr decorassioni e afreschi come el magnifico "San Cristoforo". San Zén g'avéa una so capèla dipendente da la pieve di Garda, che nel 1530 l'è stà visitata dal vescovo Gian Matteo Giberti.
La césa del paese dedicada a San Zén de Verona, zà nel 1464 l'éra parochiàl con "rector", l'è piéna de marmi e altàri, con pale del pitór veronese Pietro Manin eseguide intorno al 1850. Ne la frassión de Lumìni, gh'è la césa de Santa Euròsia, del 1724, nominada parochia nel 1943 e ne l'altra frassión Prada la çeséta de San Bartolomeo. A la fine del XIX secolo questo Comùn l'ospitava un importante poligono militàr con esercitassioni de i regimenti de la División de Verona. Atualmente l'economia locàl l'è votada al turismo con numerosi albergi e struture de sogiorno. Molto importante l'è la "Festa del Marón" ai primi de noémbre, con mostra e marcà del prodoto tipico de queste zone.
