SAN PIÉRO IN CARIÀN (San Pietro in Cariàno)
Popolassión: 12.897 Altessa: 151 metri sóra el livèl del mar Superfice: 20.24 chilometri quadri Comùni confinanti: Fumane, Maran, Negràr, Pescantina, Sant'Ambroso, Verona.
Comùn posissionà nel cor de la Valpolesèla con le frassioni Bure, Castèlroto, Corubio, Pedemonte e S.Fioràn. L'òmo l'è presente in 'sto teritorio fin da la preistoria come i pól dimostràr i reperti del Neolitico vegnudi a la luçe in diverse località e 'n vilàio protostorico a Castèlroto. Ai tempi dei romani el teritorio de San Piéro in Cariàn, dovarìa èssar stà 'na zona de un çerto prestigio, 'isto i resti de case rusteghe rinvegnù a Ambrosan de S.Fioran (it.Floriano), Castèlróto e in località Quar. El toponimo Corubio (da Quadrivium incroso de quatro strade) e 'l reperto de un segnàl meiàr (it. miliare) i ricorda el passàio de la Via Claudia Augusta Padana o de 'na so derivassión. Altri reperti de l'epoca romana jè le stéli funebri come quéla dedicà a Arnia Aquileia catà a Corubio e altre a Bure, are funerarie come quéla de Arria Protilde sempre a Corubio e quéla de Vario Massimo a San Fioràn, le scrite e i pilòti de piéra ne la fassàda de la Pieve de San Fioràn e le tombe vegnù a la luçe a S.Piéro in Cariàn. Secondo i storiçi el nome "Cariàn", che l'è ànca 'na contrada arènte al paese, el par vegnér dal tardo latin Carilianus, terén de propietà de Carilius.
'Sto teritorio l'è posissionà tra Verona e la Val d'Àdese el nel corso dei secoli la 'isto el passàio de numarosi eserciti. Un pónto strategico difensivo che'l vardava da l'alto la campagna l'éra el borgo fortificà de Castèlróto, cossita ciamà dal nome del probabile costrutor del primo castèl "Castrum Rotharii", el re longobardo Rotario; el castèl l'è restà in pié fin al periodo visconteo e al dì de ancò podémo 'édar solo qualche toco de muro. Nel periodo Scaligero la Valpolesèla l'éra goernà da Federico De la Scala fin a quando no l'è stà butà fora da Cangrande parché l'avéa tentà de ciavàrghe el poter a Verona. Sóto la Serenissima San Piéro in Cariàn l'è stà sede del Vicariato de la Valpolesèla, un organo aministrativo che'l se gestiva da solo, sóratùto grassie ai privilegi in bòna parte concessi ne l'epoca Scaligera da Federico De la Scala e riconfermadi dai Venessiani. La costrussión piassé importante dal pónto de 'ista storico e artistico nel teritorio de San Piéro in Cariàn, l'è l'antichissima Pieve de S.Fioràn nata nel periodo longobardo (fórsi costruì al posto de un tempio pagano) come i pól dimostràr i numarosi reperti de l'VIII secolo presenti ne la césa; quéla atuàl parò l'è del XII secolo modificà nel XV e XVIII secolo. In 'sto lógo nel 905 l'è stà scrito un diploma 'ndóe se lése che Re Berengario l'à concesso a un so servo un poche de tere.
De la césa originaria ghè restà el muro a nord e un toco de abside che'l va dal campanìl a la sagrestia. no podémo desméntegàrse del magnifico campanìl con parti antiche, fórsi un tempo tór de 'na fortificassión usà par difendarse dai barbari, el ciòstro del XVI secolo, el fonte batesimàl in mono bloco de marmo rosso. La césa l'è a tri navade, un tempo sede religiosa de la Valpolesèla con altre do pievi, conserva afreschi sia drénto che fora, 'na tela del Brusasorzi e 'na Madona in legno del '400. La césa de San Piéro in Cariàn l'éra parochia zà dal 1458 mentre quéla atuàl l'è stà costruì nel 1830 su disegno del Barbieri. Del '300 l'è l'origine de la césa de Bure dedicà a San Martìn e ricostruida nel '900; del 1828 l'è la césa parochiàl de Castèlroto dedicà a Sant'Ulderico costruì sóra ai resti de un altro tempio; nel teritorio de la parochia de Castèlroto da segnalàr ànca la Capela de Ognissanti in contrà Negarine del 1300 e la césa dedicà ai Santi Martìn e Roco a Corubio in parte gotica e in parte romanica che la conserva piture del '300 del Maestro Cicogna. San Piéro in Cariàn l'è conossù oltre par la produssión del vin Valpolesèla ànca par le numaròse vile sparse chi e là: intorno a la "çità" de San Piéro in Cariàn podémo catàr Vila Verità de l'800 in stil neoclassico; Vila Borghetti-Falcieri del XIX secolo da 'ndóe se gode un bèl panorama; Vila Galli-Righi in posission magnifica con bèl parco; Vila Acquistapace-Castèllani del '500 de Scóla paladiana, con colone doriche, statue e lòsa; Vila Costanza del '600 con magnifico pòrtego e particolàr par le do fasade una davanti e 'n altra de drio; del XVI secolo l'è Vila Galtàrossa. A Bure podémo catàr Vila Buri-Forapan del '500 con afreschi decorativi e Vila Monga-Castèllani ne le forma atuàl dal XIX secolo grassie a Luigi Trezza.
A Castèlroto gh'è Vila Bellini-Carnesali del XVI secolo e Vila Sacchetti-Sagramoso del '400. A Cengia Vila Fagiuoli del '500 in stil sanmichelian. A Corubio vila Amistà del '700 costruì su disegno de Ignassio Pelegrini: In contrà Squaràn catémo Vila Fumanelli costruì nel '600 sóra ai resti de la residensa de Re Bergario del X secolo. A Pedemonte in contrà Quar Vila Perez-Bertani-Montresor de Scóla sanmicheliana e Vila De Besi del '500. Arènte a Pedemonte la belissima Vila Santa Sofia volù da la faméja Serego nel XVI secolo e costruì su disegno del Palladio mentre poco distante catémo la ceséta de Santa Sofia del XV secolo con magnifiçi afreschi e a San Fioràn de l'800 l'è Vila Lebrecht.
La Pieve de San Fioràn
La Pieve de San Fioràn l'è stà costruida de sóra a un lógo fòrsi dedicà alla divinità romana Giove Ottimo Massimo (Iovis Optimi Maximi), come 
ne dise i tòchi de piéra che gh'è nei muri e nel prà de la césa. No se sa bén quando semo passà dal paganesimo al cristianesimo ma se vardémo nel muro a nord se capisse che la trama, i sassi de l'Àdese e 'l tòco de abside tra el campanìl e la sagrestia, podaria èssar de epoca longobarda o franca (secolo VIII-IX). De sicuro g'avéa una sola navàda con colóne e capitèi decorà che tegnéa su le trave del quèrto in legno e un abside semiçircolàr piassè picenìn de quel che gh'è 'dèsso. In 'sto lógo nel 905 l'è stà scrito un diploma 'ndóe se lése che Re Berengario el g'a concesso a un so servo un poche de tere.
Fòrsi par cólpa del teremoto del 1117 ne la campagna veronese, che'l g'a butà zò case, palassi e cése, l'è stà fàta su da nóvo anca quéla de San Fioràn nel secolo XII co' forme romaniche. Disémo che no l'è tanto diversa da quéla de ancó a parte qualche ritóco, una bèla fassada de còto e piéra galina che varda al tramonto e 'na pianta a tri navàde un quèrto a cavriàde tegnù su da colóne e pilastri. De la stessa epoca gh'è anca el ciòstro dei canonici tacà a la césa, un tempo a San Fioràn l'éra presente la "Schola sacerdotum" un seminario picenìn. A metà del '400 el Vescovo Ermolao Barbaro el g'a dito de far el rosón "faciant oculum ecclessiae", che l'è stà finìo nel 1471. Del stesso periodo iè le volte de le navàde. El ciòstro l'è stà fato su da nóvo par volontà del retór don 
Cristoforo Dionisi, secondo gusto tardo-rinassimentàl tra el 1567 e 'l 1609.
El pàroco Bernardino Corradi nel 1626 el g'a volù l'altàr lateràl 'ndóe ancó catémo la pala co' la Vergine del Rosario invésse nel 1670 l'é stà tirà su 'n antro altàr a la fine de la navàda meridionàl dedicà a "l'immacolata". La césa come émo visto l'è cambià nei secoli secondo la moda del giorno, defàti anca el gusto baróco no podéa mancàr; l'arçiprete Piéro Peretti el g'a volù una configurassión in stile e tra el 1731 e 'l 1748 g'a messo man, anca se el risultàdo no l'è stà pròpio el massimo come nel caso de la "trabeazione" de la navàda çentràl sistemà de sóra i archi, le colóne e i pilastri quértadi da piture a "encausto" e marmorino, par finìr co' martèl e scopèl sui capitèi. Se pensava che a 'sto pònto Don Peretti g'avésse finìo, invésse g'a vèrto anca le fenèstre retangolari ne la navàda çentràl e realisà le vòlte ne le capèle che gh'è da le parte.
La pavimentassión in marmo che gh'è 'dèsso, l'è stà posissionà nel 1871, sessànta schèi de sóra a quéla de quarèim no desmentegandose de métarghe le tombe de faméia ogni tanto. A cavàl del Nóeçènto l'è stà slargà el presbiterio zontàndoghe la nóa abside neo-romanica. Nel 1960 s'a pensà de restauràr la césa, tornàndo al periodo pre-baroco e par fortuna s'a 
catà un reperto fórsi del costrutór de la césa originaria, del periodo tardo longobardo, utilisà come materiàl da costrussión de la canonica, con sóra scrito "S(?)TRO LEVAT/ISTA PLEBE CU/SUIS DISCI/PULIS". Nel 1967 l'è stà fata la pavimentassión del cortil tra el ciòstro e la canonica in piéra de Prun.
Dal 1989 al 2009 gh'è stà vari restauri, del quèrto, de la pavimentassión del sagrato e del pòrtego, del campanìl e de altre parte del complèsso. Tra le curiosità segnalémo quéle presenti ne la fassàda, quertà da tòchi squadrè de piéra galìna divisa in tri parti da do costoloni a sessión triangolàr, postà su do are votive de epoca romana roérsade, giusto par testimoniàr el trionfo de la Cristianità sul Paganesimo. Ma quél che se vede da distante l'è sicuramente el campanìl co' orolóio a pianta quadra in stile romanico, co' piéra galina e quarèi e 'na çèla campanaria co' bifore sui quatro lati. Drénto podémo catàr cinque campane de brònso in Reb3 con fusión de la fonderìa Cavadini del 1877 che le vién sonà secondo el sistema veronese. Quéla piassè granda la pésa 1330 kg. Una césa da visitàr nel cór de la Valpolesèla. El Diretor