Quatro ciàcole, ricordi e tuto quel che passa par la testa a un veronese in Catalogna. I sogni e le speranse de Berti, quel che porta nel cor, e ne la so testa. La so Verona l'è sempre drénto de lu, ogni giorno.
El tesoro de La Rena Domila visto da Barçelona
Una frase del scritòr catalàn Josep Pla nel 1995 m'a cambià la vita: Aquestes “Cartes d’Itàlia” són una altra cosa: formen un llibre de sensacions organitzades al voltant del color verd fresc amb que són pintades les finestres d’Itàlia. - Queste “Lettere dall’Italia” sono un’altra 
cosa: formano un libro di sensazioni organizzate attorno al color verde fresco con cui sono colorate le finestre in Italia.(Josep Pla).
No avéa mai pensà prima al colòr de i scuri de le finestre italiane. Quela frase m'a ispira laTesi di Laurea su Josep Pla al’Univerità de Verona e i successivi studi al Dottorato all’Universitat de Girona e no capìa parché la fusse così decisiva.
Fino a quando, du ani fa, de colpo, in uno dei me pelegrinagi ne la calda istà nel Rión de la Carega de Verona, me son catà davanti a questa maravéia:
Da sempre questo particolàr l'era restà lì, sconto in qualche buso dei me neuroni e me diséa che, anca se i ani passa sensapietà, le raìse resta lì, da 'ndóe te si partì. Me sentìa obligà a ritornàr al’ombrìa de le vece strade de la Carega nei caldi pomerigi de l'istà e l'è lì 'ndóe ò capìo la frase de Pavese: possibile che a quarant’anni, e con tutto il mondo che ho visto, non sappia ancora che cos’è il mio paese? (La luna e i falò)
Per fortuna in questi più de vint'ani de vita in Catalunya, un giorno ò volù scrìvar a un mato ciamà Andrea Toffaletti, El Diretor. Se navigava col router, magari, nei pochi momenti lìbari in ufissio per podérme colegàr, visto che a casa no g'avéa la possibilità. Da poco el diretor, l'avéa scominçià a publicàr un pagina ueb in dialéto veronese: Larenadomila.
'O capìo che no avea mia desmentegà del tuto el dialéto, e che l'era strano, ma par una ragione più politica che culturàl, a casa mia me bupà e me mama i parlava in dialéto, me fradel grande, Giulio el parlaa dialéto però mi, el bociassa nato a Tombeta nel ’73 avea perso tuto. Perso tuto? No, el dialéto l’era restà lì, come el color verde dei scuri de la piassa del Domo. L’è lì, da domila ani. Nissuni el riesse a proibirlo, parché nissuni se sogna de tocarlo ne de mancarghe de rispeto. Tuti i tagliani savemo che prima semo de la nostra cità e dopo, forsi, ‘tagliani. Le me çità l’è Verona e se séito a capir e a parlar qualcosa de dialéto l’è grassie a Larenadomila.
El Toffa, un Don Chisciotte sensa Mancia, un veronese tuto mato, che el par vegnuo fora da una poesia de Barbarani, l’è riussio a tirar inansi qualcosa de impossibile: una pagina ueb in dialeto.
El diretor l’à capio che la tecnologia la passa, ma el dialéto el resta parché l’è lì, in quel postesin que g’avemo nel cor, fra a un piatin de risoto col tastasal e un bicer de Custoza fresco. Passarà i computer, Internet, la realtà virtual, i social netuorc, i feisbuc, el tuiter e i influenser, ma la spussa de seola no la diventarà mai la puzza di cipolla.
Grassie Toffaletti par la to idea e la to resistensa, e grassie anca a Silvano Ferrari de Arbissan, bibliotecario de l’Istituto Italiano de Cultura de Barcelona. Con lu emo fato tanti Canpionati de Larenadomila e ciacolavimo in veronese in mezo ai libri de Letteratura Italiana con la L e la I maiuscole e coi Professori Laureati che ne vardava con sorpresa, curiosità e un poco de compassión. Un giorno se semo vardà nele bale dei oci e se semo diti: “Semo tuti do veronesi, parché no parlemo in veronese? ” E da quel giorno lì emo smesso de parlar in taglian. “Son stufo Umberto, no ghe ne posso più!” el me diséa ogni tanto, e finalmente l’è andà in pensión. Brao Silvano, te te lo meriti e da quando no te ghe si più ti, la Biblioteca l’à serà. Giusto così.
Vint’ani l’è tanto tempo par tuti, ma no par el dialéto, che el ne varda da l’alto dei so domila ani e col soriso de Giorgio Gioco el ne dise: “Bala che vegnaaaaaaa”.
Saluti Diretor e viva Larenadomila!!!
Umberto Fedrigo (Berti) - 2019