Le curiosità de la Redassión
El cor del sito, un qualcosa de veramente ecessionàl, podì navigàr drènto a i reparti, lèsar la storia del sito dal 1999 co' tuta la rassegna stampa e tuti i nostri indirissi par spedìr 'na meil. Se in più te vol colaboràr, gh'è tute le istrussioni. Te pol capìr quanto impegno ghe vol par tegnér in vita el sito e quanta passión.
Oltre al sito te vedarè che in questi ani iè stà organisà eventi e colaborassioni co' i media oltre avér stampà libri. El mondo La Rena Domila l'è fantastico e pol grassie a ti, deventàr piassé grande.
Saludi dal Diretór
Grassie de èssar passà de qua. Caro letòr, rispeto a tanti, savémo de sparàr vacàde, ma nel limite de la decensa. L'è giusto no stracàrTe nel lésar el sito co' robe massa serie, ogni tanto come te pol védar, gh'è un buso par sganassàr. No butémo tuto in vaca.
Molti i pensa a la nostra léngua come a una paiassada, ma no i pensa che drio gh'è la tradissión del nostro popolo veronese. Ci séita a dir vacade no l'è bón de far cultura. Fa un giro ne la nostra redassión e te vedarè che no schersémo. No savì quante personalità iè passà de qua e quanti studiosi i n'à dimandà aiuto par esami universitari. La riçerca no se ferma mai da 'ste parti e semo sempre pronti a dar 'na man a tuti 24 h su 24 compreso Nadàl!
Se te vol contribuìr co' del materiàl, 'na poesia, un libro, 'na foto, varda la rubrica che fa par ti e spedissi 'na meil a la nostra redassió
Scrivi a la Redassión
- Diretor Andrea Toffaletti
- Redassion:
Questo indirizzo email è protetto dagli spambots. È necessario abilitare JavaScript per vederlo. - Vice Diretor Stefano Toffaletti
- Aministradór e Aministradór Delegà quél in çima
- Posta Certificata PEC Redassion
- Uebmaster & UebDesainer el primo de la lista
- Fotografo e Pub. Relassioni el secondo de la lista
- Publiche Relassioni el terso de la lista
- Consiliér Paciòca
- Segreteria Giuliana "Mama"
- Resp.Tenico & Logistico Ci vuto che sia?
- La Rena Mondo Sebi, Bené, Fernando, Berti, Silvàn, Evy, Erido
- Colaboradori con pochi femo tanto, pochi ma boni
- La Rena Digitàl & Radio Scarpa DJ Papavero
- Stampa publicassioni Edizioni ZeroTre
-
Reparto Uorcstéscion - Workstation
Nel 1998 La Rena Domila podéa contàr su un reparto tenologico tra i più importanti nel veronese configurà par internet,
L'inissio no l'è stà façile, pochi schèi, tanta passión e tuto co' le nostre forze. Semo partì co' la grafica e i montagi video par eventi a livèl amatoriàl co' l'idea de archiviàr tute le manifestassioni a Verona. Compiuter sempre piassè potenti par far nàssar Canàl Camussoni e I-Taia Uno, le nostre tv in giro par Verona. Internet l'era a l'inissio e no l'era a gratis e te dovèi pagàr la conessión tra l'altro co' un modem a carbonela.
Cossita el sito l'è stà impostà soratuto dal punto de vista grafico e dal primo de aprìl 1999 le prime pagine. Pc Windows, Linux e Macintosh la storia de la tenologia.
Nel 2001 visto l'espansión del sito in giro par el mondo, s'à pensà che i colaboradori podesse laoràr da casa, come el tele-laòro. Cossita el sito l'è deventà globàl co' 25 dipendenti nel 2003 sensa busta paga.
Dal 2006 la Rena Domila pol contàr su le divisioni: La Rena Digitàl, La Rena Mondo, La Rena Italia. In quest'ultima catémo le varie aree tra cui quéla grafica, divulgassión, media e tecno co' el reparto Uorcstéscion. Dopo studi e progeti nel 2016 el novo sito par smartfon e tablet, ma la strada da far l'è ancora longa.
Nel 2023 l'è previsto un investimento par i compiuter e video film no da poco. E tuto sensa sponsor e sensa guadagnàr schèi. 'Desso i "dipendenti" iè concentràdi soratuto a Verona, ognuno dal propio studio co' la possibilità de realisàr video-conferense e direte striming
Ricessión - Reception
Al quarto piàn de un grataçiél crompà nel 2022 se pol catàr la nostra segretaria pronta a darve le inidicassioni.
El clima l'è quél in tuto el stabile, se sganàssa spesso e volentieri. Tanti butèi iè passè de qua par farse esperiensa lavorativa e capìr come funsiona la nostra redassión e tanti de lori iè deventè grandi giornalisti a livèl nassionàl.
Ogni tanto vién a catarne qualchedùn par dar el propio contributo e par capìr da le nostre parole cosa gh'è a Verona che no va e anca par védar l'archivio storico. La segretaria la ve dirà cossa far e 'ndoe nar....
Ogni tanto parò la g'a la luna de traèrso, me racomando de no dir gnénte de in più e se ve dimanda la parola segreta dovì dirghe PEARA', cossita la ve porta anca el café.
Stémo schersando... anca no! Ma éla la tién soto òcio tuto e la ghe tién a la nostra Redassion.
Biblioteca
Ma quanti libri dovèmo digitalisàr? Tanti e tanti e tanti ancora.
I nostri dipendenti pol lésar uno dei tanti libri par scrrìvar al meio i propi articoli o par rispòndar a le meil de aiuto, sia a studenti che a persone amanti de le tradissioni. El piassè vecio l'è de fine '400 e te devi vérzarlo pianìn o te resta le pagine in man. Par questo l'è stà realisà un sistema de digitalisassión importante par cavàr la carta, tegnèndo solo i libri de un çerto valòr e vendedndo el resto par tiràr su schèi e investìrli in altri libri. L'è tuto 'na rua che gira. In pratica tuti volontari par el ben comune e la salvaguardia storica che conserva questo paradiso.
In totàl la biblioteca conserva più de 2000 libri cartacei e oltre 1400 digitalisadi.
Se par caso qualcuno dei nostri dipendenti scoèrze notissie storiche interessanti le vién segnalà al nostro Diretòr che nel giro de mésa giornada pol fissàr una riunión straordinaria par capìr insieme co l'omo de le statistiche e de la strategia, se la segnalassión podarà deventàr una nòa rubrica del sito. La Biblioteca l'è importantissima.
Reparto La Rena Digitàl
Altro reparto importantissimo l'è quèl 'ndove se digitalisa i libri, passando da carta a formato digitàl.
Qua la temperatura l'è costante sui 25°C co' un umidità massima del 55% in modo che i microorganismi no i possa magnàr i libri più antichi che qua i vién conservà e consultabili ne la biblioteca in formato pdf.
In più la parte de l'archivio del sito l'è un qualcosa de incredibile. Vién conservà i articoli dei vari giornali veronesi, in modo che, quando ghe da védar le promesse fate dai politici, savémo se l'è stà dita la verità. Oltre a questo, nemo a pescàr i eventi che'l nostro sito l'à organisà nel tempo e i nostri articoli o scup.
In più la parte dedicà al montagio video e a Radio Scarpa co' la sala prove riservà al Diretòr par recitàr le so poesie, el tuto insonorisà. La luçe ne la stansa, come se vede ne la foto, l'è studià in modo de no sassinàr i libri e la vista dei nostri operatori durante le longhe ore de laóro.
N.B. Sito gestido dal Diretòr sensa scopo de lucro e con passión - le foto jè da considerarse puramente indicative.
Questo sito no rapresenta una testada giornalistica, in quanto vien agiornà sensa nissuna periodicità. Partanto, no l'è da considerarse un prodoto editoriàl ai sensi della Legge n. 62 del 7.03.2001.
Dame 'na man
Se te vol darghe 'na man al nostro Diretòr, te femo de le proposte che no te podarè dir de no. Se te si un veronese che vive nel mondo, la possibilità de colaboràr l'è diese volte superiòr de ci vive in Italia. Le rubriche iè oltre 50. Tién presente che qua nissùn ciapa schèi e che la figura del volontario l'è la sola. In pratica o te gh'è passión o no te si de La Rena Domila ! La politica no la gh'è, no se parla de questo argomento sul sito e nissuni de ci vol dar 'na man, deve èssar iscrito a un partito. La Rena Domila deve restàr indipendente e fora dai zughi politiçi. I sponsor no i gh'è, o in caso contrario el pagamento l'è in natura se l'è un frutaròl, un saco de pàn se l'è un pistòr o un cunèl se l'è un becàr. Tanti schèi o gnente! Par 100 euro no volémo èssar ligà.
Te pol colaboràr anca regalando un libro o del materiàl tenologico ecc..
COLABORA CON NOANTRI
Se te vol mandàrne foto, poesie, scrìvar articoli, parlàr de storia ecc., (o anca un poche de congratulassioni... ahahah) basta 'na meil al'indirisso
La Redassiòn dopo avérghe pensà sora Te darà istrussioni su come spedìr el materìàl, par le poesie e articoli no gh'è mai problemi. No l'è dito che la to proposta la possa 'nar ben. Inveçe, se tuto va ben, vegnarà publicà e te ricevarè 'na meil. A 'olte el materiàl pol èssar publicà a distansa de mesi, se l'argomento parla de Nadàl ma semo a marso te capiré che publichèmo la roba de Pasqua! I articoli no i deve èssar longhi più de
COLABORA CON NOANTRI DA LA PROVINCIA
Se te vivi in Provincia de Verona e te vol far conòssar la to contrada, la to festa o el to paese in tuto el mondo, basta che te spedissi un articolo a
Prima de publicàr qualcosa vién sempre vardà el to materiàl da la Redassión e no l'è dito che vaga ben. Quindi no insustarte! Se vol far conòssar la to festa, vegnémo fin da ti con un contributo spese de un risoto a testa!
COLABORA CON NOANTRI DA FORA ITALIA
Se te vivi a l'éstaro, compreso Màntoa oe te vol far conossar el to paese in tuto el mondo o parlàr con altri Veronesi o Veneti, La Rena Domila te mete a disposissión una pagina.
Basta che te mandi a
1-una to foto con el paese,
2-una foto del paese,
3-una breve descrissiòn su de ti e el to paese, ricordi de la tera d'origine e tuto quel che te passa par la molona.
4-un breve articolo de diése righe, quando te pol o ogni mese che'l verà publicà ne la rubrica La Rena Mondo.
Altrimenti spedissi una to foto e un breve articolo che vegnarà publicado entro pochi giorni, se va ben a la Redassión ne la rubrica La Rena Mondo e/o La Rena Notissie.
PAR CI CAPISSE MA NO SCRIVE EL VERONESE
Scrivi el to articolo in Italiàn, se te gh'è paura de far figure magre, parò, ocio, la Redassión, la publicà solo in veronese. Se ghe ne vàl la 'pena ghe sarà la tradussión e dopo, vegnarà la publicassión; i tempi iè piassé longhi visto che ne toca laoràr piassè.
PAR SEGNALASSIONI MANIFESTASSIONI O EVENTI
Le rubriche prinçipali del sito le vién agiornà una volta al mese mentre i articoli a seconda de le situassioni. Quindi segnala la to festa, un mese prima de l'evento anca par un discorso de visibilità.
Se te gh'è un evento importante da farne presente, urgente, ricorda che 'l can no moe la coa par gnente!