Ogni ano l'è sempre piassè incasinà organisàr eventi, la burocrassia la copa i volontari. Anca st'ano l'è rivà el carneàl, el 28 de febràr, co' le solite polemiche. El Bacanàl del Gnoco che dimanda schèi al Comune par l'organisassión. L'è saltà fóra che el Bacanàl el g'a ciapà schèi publiçi, come i 290 mila euri dal Ministero de la Cultura come riportà dal quotidiàn L'Arena, sensa contàr Región e Provincia. Fémo presente che de solito no te pól dimandàr un finansiamento par la stessa roba da Enti difarénti. El Comùn varda come dàr el contributo al Bacanàl par el Vènardi Gnocolàr. De sicuro el Bacanàl el g'a fato l'è robe in regola come al solito, la burocrassia spaca i maroni al Carneàl e quindi polemiche. In più st'ano l'òspite d'onór l'è Valeria Marini che vedémo in tv da ani. Tanti i se dimanda come l'è possibile far vegnér una parsona cossita conossuda e quindi l'unica cossa da far l'è 'nar contro el Sindaco par el contributo al Bacanàl.
Dovì tegnér conto che la Giunta dopo le polemiche su la stéla de Nadal in Bra sensa la cóa e el marcà de Via Pallone sempre a Nadal, no pól ròmpar tanto le bale al Bacanàl, ma pól dimandàr le fature de quél speso e vardàr che el contributo dimandà el vaga bén anca in tute le voçi a Roma. Se no vién fata la sfilàda parché el contributo l'è póco quante polemiche salta fóra? Bisognarìa catàr piassè sponsor e far in modo che'l carneàl el sia manco pesante par i Veronesi. Soratuto, far in modo che tute le màscare de la çita no le vegna desmentegàde e quindi, invece de dar schèi a Valeria Marini, sarìa mèio darghe quatro schèi a ci se spàca el cul tuto l'ano par carneàl nei quartieri. Bisón che la qualità de tute le màscare la sia alta e soratuto investìr nei buteléti, visto che ci sfila el g'a 'na certa età. El carneàl el deve èssar de tuti e no de pochi! (El Diretor 25.02.2025)
> Percorso 2025 descàrga > Info Comùne de Verona Carneàl 2025
