Tuto el mondo ne invidia la storia e l'arte ma in Italia quando vién catà piére romane o reperti de domila ani fa, se querta tuto o parché no gh'è schéi par valorisarli o parché se deve costruìr una strada de sora come sucesso in Corso Cavour co' la via Postumia. A Negràr de Valpoleséla nel mese de maio 2020 i-é saltà fora, soto le vigne de Amaron, reperti romani de un valòr incredibile. In verità in paese, dal 1875, gh'éra ciàcole che ne contàva dei "quatri sassi", tanto che nel 1922 e nel 1975 s'a scominçià a tastàr el terén catàndo la parte sud de 'na vila romana del II secolo d.C. co' tanto de mosaici e tòchi de mure. La cosa piassè importante l'è la qualità e come s'à conservà nei secoli tuto 'sto tesoro, su un terén che forsi l'è piassé grando dei 300 metri quadri, come pensà finora da la Soraintendensa. Ma gh'è ancora da scavàr e le idee i-é tante, se i paroni de le vigne i vol véndar, forsi le Cantine del vin de la val i-è pronte a dar 'na man par valorisàr e 'nar 'vanti co' i scavi. No gh'é tempo da pèrdar, el turismo in Italia l'è storia, arte e cultura, quésta scoèrta pol dar ancr più valór a la Valpolesèla. Soratuto bisón valorisàr anca quél che gh'émo, sensa butàr ancora çiménto. El futuro de la val passa da qua, ma no tuti i riesse a capirlo. A 'olte quatro schéi spesi par una giusta causa pol dar tanta sodisfassión nel tempo. Ghe vol coràio e laòra de squadra, finora mancà nel nostro paese...... (El Diretòr 06.06.2020)
