Dal 6 deçémbre 2024 al 12 de genàr 2025 podì gustarVe "I presepi nel Borgo" a Ferara de Monte Baldo. Ma parché proprio 'sto presepio e no altri? Parché questo l'è veramente speciàl co' statue in legno a grandessa naturàl realisà dai maestri de Tesero, òpare artistiche conossù in tuto el mondo. Lóngo el fantastico borgo storico, podì gustarVe le òpare, tra le vie, i vicoli, le corti e i pòrteghi. St'ano la rassegna la s'a sgrandà, defàti nel vècio palasso del Municipio gh'è el presepe mecanico realisà da Luigi Festi, una colessión de Natività forèste e le statuine conossù come "Santons" del secolo XVIII, da la Provensa. Noàntri érimo presenti a l'inaugurassión del 6 deçembre a fotografàr l'inissio de un evento unico, co' el Sindaco de Ferara Carla Giacomazzi e 'l Vescovo de Verona sensa desmentegarse de tute le autorità dei Comuni vissini e i amiçi del paese, in un clima de vera festa. Come podì mancàr a Ferara, una perla a i pié del Baldo? Come diséa el nostro Berto Barbarani:
"e i boschi alti salta su de furia soto i colpi de vento che li scuria, e no gh’è baito che se tegna saldo e no gh’è fosso che no para un progno, una note sveiandome da un sogno, da la Ferara ò visto Monte Baldo!"
